بيىل اسكەري جيىندارعا شاقىرىلاتىن ازاماتتار سانى 2 ەسەگە ارتتى
2024-جىلى ءبىر ايلىق اسكەري جيىندارعا 3000 ادام شاقىرىلادى. كۆوتا سانى بىلتىرعىمەن سالىستىرعاندا ەكى ەسە كوپ، دەپ حابارلايدى Kazinform.
قورعانىس مينيسترلىگى باسپا ءسوز قىزمەتى بەرگەن اقپاراتقا سايكەس، اسكەري جيىنعا شاقىرۋشىلاردىڭ لاۋازىمى، جۇمىس ورنى مەن جالاقىسى ساقتالادى. ال جۇمىسسىزدارعا مەملەكەت ەسەبىنەن ەڭ تومەنگى جالاقى تولەنەدى. اسكەري مىندەتتىلەردى ترانسپورتپەن قامتاماسىز ەتۋ قورعانىس مينيسترلىگى ەسەبىنەن جۇرگىزىلەدى.
اسكەري جيىن 2007-جىلدان باستاپ جۇرگىزىلىپ كەلەدى. جيىن اسكەري بولىمشەلەردىڭ وقۋ-اسكەري جاتتىعۋىن كوتەرۋ جانە اسكەري وقىتىلعان زاپاستاعى ادامداردى كوبەيتۋ ماقساتىندا قولعا الىندى. شاقىرتىلعاندار اسكەري قىزمەتكە ماشىقتانادى.
ارناۋلى جيىنعا:
- قورعانىس، قۇقىق قورعاۋ، قاۋىپسىزدىككە قاتىستى مەملەكەتتىك ورگاندا جۇمىس ىستەيتىندەر،
- مەملەكەتتىك جانە ازاماتتىق اۆياتسيا قىزمەتكەرلەرى،
- كوكتەمگى ەگىس جانە كۇزگى جيىن-تەرىم كەزىنە اۋىل شارۋاشىلىعى سالاسىندا ەڭبەك ەتەتىندەر،
- وقۋ جىلىندا ءبىلىم بەرۋ مەكەمەلەرىنىڭ پەداگوگ ماماندارى،
- ءبىلىم بەرۋ ۇيىمدارىندا كۇندىزگى بولىمدە وقىپ جۇرگەن ازاماتتار،
- اسكەري مىندەتتى ايەلدەر،
- 18 جاسقا دەيىنگى ءۇش بالاسى بار ازاماتتار،
- تەرگەۋدەگى نەمەسە پروتسەسسۋالدىق ىسكە تارتىلعان ازاماتتار،
- جەرگىلىكتى اتقارۋشى ورگانداردىڭ دەپۋتاتتارى شاقىرىلمايدى.
