بيىل پاۆلودار وبلىسىنا كەلەتىن قانداستارعا 902 كۆوتا ءبولىندى
پاۆلودار. KAZINFORM - سىرتتان كەلەتىن قانداستارعا 902 كۆوتا ءبولىنىپ وتىر. وڭىردە مەديتسينا، ءبىلىم بەرۋ، اۋىل شارۋاشىلىعى جانە مادەنيەت سالالارى بويىنشا ماماندار تاپشىلىعى بايقالادى.
2024-جىلى پاۆلودار وبلىسىنا سىرتتان كەلەتىن قانداستار مەن قونىس اۋدارۋشىلاردى قابىلداۋعا 3505 ادامعا كۆوتا ءبولىنىپ وتىر. ونىڭ ىشىندە قانداستارعا - 902، ىشكى قونىس اۋدارۋشىلارعا - 2603 كۆوتا بولىنگەن.
«كوشىپ كەلۋشىلەردى وبلىستىڭ بارلىق قالالارى مەن اۋداندارىندا (3 قالا، 10 اۋدان) ورنالاستىرۋ جوسپارلانىپ وتىر. پاۆلودار وبلىسىنا مەديتسينا، ءبىلىم بەرۋ، اۋىل شارۋاشىلىعى جانە مادەنيەت سالالارى بويىنشا ماماندار قاجەت. مۇنى كوشى-قون بارىسىندا ەسكەرەتىن بولامىز. قونىس اۋدارۋشىلاردى ىنتالاندىرۋ ماقساتىندا 2023-جىلدان باستاپ تۇرعىن ءۇي ساتىپ الۋ ءۇشىن باسپانا قۇنىنىڭ %50 ىن قۇرايتىن، ءبىراق 4 ميلليون تەڭگەدەن اسپايتىن مولشەردە قارجىلىق كومەككە قۇقىعى بار ەكونوميكالىق ۇتقىرلىق سەرتيفيكاتى ەنگىزىلدى. جىل قورىتىندىسى بويىنشا پاۆلودار وبلىسىندا 542 وتباسىعا تۇرعىن ءۇي ساتىپ الۋ ءۇشىن ەكونوميكالىق ۇتقىرلىق سەرتيفيكاتتارى تولەندى»، دەپ اتاپ كورسەتتى پاۆلودار وبلىسىنىڭ جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى الميرا ديسيۋپوۆا Kazinform اگەنتتىگىنىڭ تىلشىسىنە بەرگەن جاۋابىندا.
اتاپ وتەيىك، 2023-جىلى وبلىس 3343 ادامعا كۆوتا بولگەن. ونىڭ ىشىندە 972 ادام قانداستار، 2371 ادام ىشكى قونىس اۋدارۋشىلار. وڭىرلىك كۆوتا %100 ورىندالدى.
