بيىل الماتى وبلىسى تۋريستەر سانى بويىنشا رەكورد ورناتتى

الماتىتى. KAZINFORM - الماتى وبلىسى ساياحاتشىلار سانى بويىنشا بيىل رەكورد ورناتتى. جىل باسىنان بەرى ايماققا ءبىر جارىم ميلليوننان تۋريست كەلگەن. وسىلايشا وتكەن جىلمەن سالىستىرعاندا بۇل كورسەتكىش 31 پايىزعا وسكەن. سىرتتان كەلگەن قوناقتاردىڭ كوبىسى الماتى شاھارىنا ايالداعان. بۇل تۋرالى Jibek joly تەلەارناسىنىڭ جاڭالىقتارىندا ايتىلدى.

جەكە ينۆەستيتسيا ەسەبىنەن 24 تۋريستىك نىسان اشىلعان

ءۇندىستاندىق رام پرابحۋدىڭ بۇل الماتىعا ەكىنشى ساپارى. العاش كەلگەندە قالانىڭ اسەم جەرلەرىن ارالاعان. ال بۇل جولى ارنايى جوسپار قۇرىپ، قىسقى شىمبۇلاقتى تاماشالاۋعا كەلىپتى.

- ساياحات مەن ءۇشىن ۇلكەن تەراپيا. بىزدە ءۇندىستاندا قىس مۇلدەم جوق. سوندىقتان قازاقستانعا كەلىپ ىزدەگەنىمدى تاپقاندايمىن. تاۋ، تازا اۋا. ادامدارى قانداي قوناقجاي. مۇنداي تابيعات جانىما داۋا بولىپ جاتىر، - دەيدى ساياحاتشى رام پرابحۋ.

وڭىرگە ساياحاتتاپ كەلگەندەردى نەگىزىنەن تاۋلى ايماقتار قىزىقتىرادى. اسىرەسە شىمبۇلاق تاۋ شاڭعى كۋرورتى، كولساي، ىلە-الاتاۋ ۇلتتىق پاركى مەن شارىن شاتقالىنا باراتىندار كوپ. بۇل تيىسىنشە ينفراقۇرىلىمدى دامىتۋدى تالاپ ەتەدى.

- ەڭ الدىمەن قوناق ءۇي سانىن ارتتىرۋ باستى ماقسات. 2024 -جىلى جەكە ينۆەستيتسيالاردىڭ ارقاسىندا 24 تۋريستىك نىسان اشىلدى، ونىڭ ىشىندە 14 قوناقۇي، 4 گلەمپينگ، 4 حوستەل جانە 2 قوناق ءۇي بار، بۇل قوسىمشا 495 نومىردى قامتاماسىز ەتتى. سونىمەن قاتار، قازىرگى ۋاقىتتا قوسىمشا 4426 ءنومىردى قامتاماسىز ەتەتىن 30 جاڭا ءقوناقۇي قۇرىلىسى بويىنشا جوبالار جۇزەگە اسىرىلىپ وتىر، - دەيدى الماتى قالاسى تۋريزم باسقارماسى باسشىسىنىڭ ورىنباسارى م. ۋ. ا. ەركەبۇلان ابيحان.

بيىل شاھارداعى تۋريزم سالاسىن دامىتۋعا قالا بيۋدجەتىنەن 4,7 ميلليارد تەڭگە ءبولىندى. ءارى 72 ميلليارد تەڭگەدەن استام ينۆەستيتسيا تارتىلعان. ناتيجەسىندە سالىق تۇسىمدەرى دە ارتىپ، بيىلعى 8 ايدا بۇل كورسەتكىش 62 ميلليارد تەڭگەدەن استى. بۇل وتكەن جىلدىڭ وسى كەزەڭىمەن سالىستىرعاندا 39,4 پايىزعا ارتىق.

- ءبىز بۇرىن تۋريزم سالاسىن دامىتۋ ءۇشىن شەتەلدىك ءىرى ينۆەستورلارعا سەنىم ارتتىق. قازىر بۇل ۇدەرىس وزگەردى. بۇگىندە قازاقستاندىق كاسىپكەرلەر تۋريزمگە كوڭىل ءبولىپ ينفراقۇرىلىمعا بارىنشا ينۆەستيتسيا سالۋدا. بۇعان بىردەن ءبىر سەبەپ تۋريستەردىڭ سىني كوزقاراسى مەن تالاپتارى. بۇل شىنىمەن كاسىپكەرلىك نارىقتى ىنتالاندىرىپ وتىر، - دەيدى قازاقستان تۋريستىك قاۋىمداستىعىنىڭ ديرەكتورى راشيدا شايكەنوۆا.

قالاۋىن تاپسا، تۋريزم دە ەل ەكونوميكاسىن ورگە سۇيرەيتىن سالا. الەمدىك تاجىريبە ءتۋريزيمنىڭ كىرىسى تەك مۇناي ەكسپورتى، مۇناي مەن اۆتوموبيل وندىرىسىنە عانا جول بەرەتىنىن كورسەتكەن. دەمەك، قازاقستاننىڭ تۋريستىك الەۋەتى جوعارى. سوندىقتان بۇل سالانى قولداۋ مەن دامىتۋ ەل ساياساتىنىڭ باسىم باعىتى بولىپ قالا بەرمەك.