بيىل ادام ساۋداسىنا قاتىستى 200 گە جۋىق قىلمىس تىركەلدى
استانا. KAZINFORM - جىلدىڭ باسىنان بەرى ادام ساۋداسىنا قاتىستى 197 قىلمىس تىركەلدى. بۇل تۋرالى ەلوردادا ادام ساۋداسىنا قارسى ءىس-قيمىل تاقىرىبىنا ارعان جيىندا ءىىم ۇيىمداسقان قىلمىسقا قارسى كۇرەس دەپارتامەنتى باسشىسىنىڭ ورىنباسارى شىنار كوشەربايەۆا ءمالىم ەتتى.
«بۇل ساناتتا ۇيىمداسقان توپتار ارەكەتىنىڭ جولىن كەسىپ، زارداپ شەككەندەر انىقتالىپ، كىنالىلەر جاۋاپقا تارتىلادى. جىلدىڭ باسىنان بەرى ادام ساۋداسىنا قاتىستى 197 قىلمىس تىركەلگەن. ونىڭ ىشىندە 116-باپ بويىنشا 22 ءىس، ادام ۇرلاۋ - ءبىر ءىس، زاڭسىز باس بوستاندىعىنان ايىرۋ - 4 ءىس، ادام ساۋداسى - 17 ءىس ، كامەلەتكە تولماعانداردى جەزوكشەلىكپەن اينالىسۋعا تارتۋ - 15 ءىس، كامەلەتكە تولماعانداردى ساۋدالاۋ - 6 ءىس، ادامداردى جەزوكشەلىككە ماجبۇرلەۋ - 13 ءىس، جەزوكشەلىكپەن جانە جەڭگەتايلىقپەن اينالىسۋعا پريتوندار ۇيىمداستىرۋ - 119 ءىس»، - دەدى ش. كوشەربايەۆا.
ونىڭ ايتۋىنشا، حالىقارالىق باياندامالاردىڭ باعامداۋى بويىنشا قازاقستان وسى قىلمىستارعا جول بەرمەۋ باعىتىندا ايتارلىقتاي كۇش سالىپ جاتىر.
«الايدا ادام ساۋداسى قىلمىستارى ءالى دە تارالىپ جاتىر. ءىس جۇزىندە سەكس قۇلدىققا جانە ماجبۇرلەپ جۇمىسقا سالۋ، نارەستەلەردى ساۋدالاۋ، ادام اعزاسىن ساتۋ، قايىر تىلەۋگە ماجبۇرلەۋ سياقتى قىلمىستاردى انىقتاپ جاتامىز»، - دەدى ۆەدومستۆو وكىلى.
ەسكە سالا كەتەيىك، بيىل شىلدە ايىندا مەملەكەت باسشىسى «ادام ساۋداسىنا قارسى ءىس-قيمىل تۋرالى» قازاقستان رەسپۋبليكاسىنىڭ زاڭىنا قول قويدى.
زاڭدا ادام ساۋداسىنا قارسى ءىس-قيمىل قاعيداتتارى بەكىتىلگەن، سونداي-اق مەملەكەتتىك ورگانداردىڭ، جەرگىلىكتى اتقارۋشى ورگانداردىڭ جانە ادام ساۋداسىنا قارسى ءىس-قيمىل جونىندەگى وزگە دە سۋبەكتىلەردىڭ قۇزىرەتى بەكىتىلگەن.
اۆتور
رۋسلان عابباسوۆ
