بيىل اباي اتىنداعى مەملەكەتتىك سىيلىق بەرىلمەيتىن بولدى
استانا. KAZINFORM - ۆيتسە-پرەزيدەنت ەرلان قاريننىڭ توراعالىعىمەن 2026-جىلعى قازاقستان رەسپۋبليكاسىنىڭ اباي اتىنداعى ادەبيەت پەن ونەر سالاسىنداعى مەملەكەتتىك سىيلىعىن بەرۋ جونىندەگى كوميسسيانىڭ قورىتىندى وتىرىسى ءوتتى.
زيالى قاۋىمنىڭ بەدەلدى وكىلدەرىنەن قۇرالعان كوميسسيا مۇشەلەرى ادەبيەت، تەاتر، مۋزىكا جانە بەينەلەۋ ونەرى سالالارى بويىنشا مەملەكەتتىك سىيلىقتى بەرۋ جونىندەگى كونكۋرستىڭ ەكىنشى كەزەڭىنە وتكەن 7 جۇمىستى قارادى.
مادەنيەت جانە اقپارات ءمينيسترى ارمان قىرىقبايەۆ ۇسىنىلعان ەڭبەكتەردىڭ قوعامداعى تالقىلانۋ بارىسى تۋرالى بايانداما جاسادى.
كوميسسيا داۋىس بەرۋ قورىتىندىسى بويىنشا 2026-جىلعى قازاقستان رەسپۋبليكاسىنىڭ اباي اتىنداعى ادەبيەت پەن ونەر سالاسىنداعى مەملەكەتتىك سىيلىعىنا ۇسىنىلعان تۋىندىلارعا قاتىستى ورتاق كەلىسىمگە كەلە المادى.
سونداي-اق وتىرىس بارىسىندا كوميسسيا قىزمەتىن جەتىلدىرۋ، اتاپ ايتقاندا، جۇمىستاردى باعالاۋ شارتتارىن قايتا قاراۋ، ساراپتامالىق سۇيەمەلدەۋ تەتىكتەرىن جەتىلدىرۋ جانە كونكۋرستىق ىرىكتەۋ راسىمدەرىن جۇيەلەۋ ۇسىنىلدى.
وسىلايشا، بيىل اباي اتىنداعى مەملەكەتتىك سىيلىق بەرىلمەيتىن بولدى.
ەسكە سالايىق، بۇعان دەيىن «تۇمار» مەن «ۇركەر» سىيلىعىنىڭ جەڭىمپازدارى انىقتالعانىن حابارلاعانبىز.
