بيىل 37 انيماتسيالىق فيلم سەناريى قارالىپ جاتىر
استانا. KAZINFORM - بيىل 37 انيماتسيالىق فيلم سەناريى قارالىپ جاتىر. بۇل جايىندا سەنات دەپۋتاتتارىنىڭ ساۋالىنا پرەمەر- مينيستر ولجاس بەكتەنوۆتىڭ جاۋابىندا ايتىلعان.
«2019-2022 -جىلدار ارالىعىندا مەملەكەتتىك قارجىلىق قولداۋ بويىنشا 8 انيماتسيالىق فيلم ءوندىرىلدى. 2024 -جىلى 37 انيماتسيالىق فيلم سەناريلەرى قارالىپ جاتىر. سونداي- اق بيىلدان باستاپ ۇلتتىق دەپ اتالۋعا ۇمىتكەر كينوجوبالاردى ىرىكتەۋ قاعيدالارىنا تۇبەگەيلى وزگەرىس ەنگىزىلىپ، ۇلتتىق فيلمدەردى ىرىكتەيتىن ساراپتاما كەڭەسىندە انيماتسيالىق كينوجوبالاردى قاراستىراتىن سەكتسيا قۇرىلدى. بۇل سەكسيانىڭ مۇشەلىگىنە انيماتسيا سالاسىنىڭ بىلىكتى ماماندارى ەندى»، - دەپ اتاپ وتەدى ۇكىمەت باسشىسى.
ولجاس بەكتەنوۆتىڭ اتاپ وتۋىنشە، ەلىمىزدىڭ مەملەكەتتىك يدەيالوگيالىق ساياساتىنىڭ ىسكە اسىرىلۋىنا ىقپال ەتۋ، بالا تاربيەسىن، ءتىل ماسەلەسىنىڭ وڭ شەشىلۋىن قامتاماسىز ەتۋ ماقساتىندا «قازاقفيلم» كينوستۋدياسىنىڭ جانىندا «قازاقانيماتسيا» شىعارماشىلىق بىرلەستىگى قۇرىلعان. ونىڭ ماقساتى - وتاندىق انيماتسيالىق سالانى جاڭعىرتۋ جانە انيماتسيالىق فيلمدەردىڭ ساپاسى مەن ۇلتتىق ناقىشتاعى مازمۇنى بويىنشا حالىقارالىق دەڭگەيگە شىعۋ جاعدايلارىن قامتاماسىز ەتۋ، سونداي- اق قىسقا مەتراجدى جانە تولىق مەتراجدى انيماتسيالىق فيلمدەر شىعارۋدى ۇلعايتۋ. سونىمەن قاتار قازاقستاننىڭ انيماتسيا كينوستۋديالارىنىڭ قاۋىمداستىعى، «قازاقستاندىق انيماتسيالىق كينوستۋديالار قاۋىمداستىعى» بىرلەستىگى بار. ولار تىعىز بايلانىستا جۇمىس ىستەيدى. حالىقارالىق انيماتسيالىق فيلمدەر قاۋىمداستىعىنا مۇشە بولۋ ماسەلەسى الداعى ۋاقىتتا قارالاتىن بولادى.
« ءوز كەزەگىندە «Balapan» تەلەارناسى مەملەكەت بيۋدجەتى اياسىندا ساپالى TV كونتەنتتى 100 پايىز مەملەكەتتىك تىلدە عانا وندىرەدى. جىل سايىن تەلەباعدارلامالار مەن انيماتسيالىق جوبالار ءوندىرىسىن ۇلعايتا وتىرىپ، تەلەارنا قازاق بالالار كونتەنتىن دامىتۋ مەن ناسيحاتتاۋعا ەلەۋلى ۇلەس قوسىپ كەلەدى»، - دەدى ولجاس بەكتەنوۆ.
