بيىل 31-جەلتوقسان دەمالىس بولا ما؟
استانا. KAZINFORM - جاڭا جىل الدىنداعى قاربالاس جاقىنداعان سايىن ادەتتەگىدەي كوپشىلىكتى «31-جەلتوقسان دەمالىس بولا ما؟» دەگەن سۇراق مازالايتىنى انىق. ەڭبەك جانە حالىقتى الەۋمەتتىك قورعاۋ مينيسترلىگى وسى ساۋالعا رەسمي جاۋاپ بەردى.
ۆەدومستۆو مالىمەتىنشە، «مەرەكەلەر تۋرالى» زاڭعا سايكەس تەك ۇلتتىق جانە مەملەكەتتىك مەرەكەلەر دەمالىس كۇندەرى بولىپ جاريالانادى. مۇنداي ءاربىر كۇن - جاي عانا قوسىمشا دەمالىس كۇنى ەمەس، ماڭىزدى تاريحي، مادەني نەمەسە قوعامدىق-ساياسي وقيعالارعا ارنالعان كۇن.
جاڭا جىل (1-2-قاڭتار) - مەملەكەتتىك مەرەكە، ال 31-جەلتوقسان زاڭدا بەلگىلەنگەن ۇلتتىق جانە مەملەكەتتىك مەرەكەلەرگە جاتپايدى. سوندىقتان بۇل كۇن دەمالىس بولىپ ەسەپتەلمەيدى.
الايدا قولدانىستاعى ەڭبەك زاڭناماسى جۇمىس بەرۋشىلەرگە قىزمەتكەرلەردىڭ جاعدايىن جاساۋ ءۇشىن تولىق ەركىندىك بەرەدى. ول ءۇشىن زاڭدارعا وزگەرىس ەنگىزۋدى كۇتۋدىڭ قاجەتى جوق، ماسەلەنى كومپانيا ىشىندە دە شەشۋگە بولادى.
كومپانيا قىزمەتكەرلەردى 31-جەلتوقساندا قالاي رەسمي تۇردە جۇمىستان بوساتا الادى:
قىسقارتىلعان كۇن: جۇمىس ۋاقىتىن بىرنەشە ساعاتقا ازايتۋ.
ىڭعايلى كەستە: بۇل ساعاتتاردىڭ ورنىن ءبىر اي ىشىندە الدىن الا وتەۋگە رۇقسات بەرۋ.
تولىق دەمالىس كۇنى: 31-جەلتوقساندى ۇجىمدىق شارت نەمەسە جۇمىس بەرۋشىنىڭ ىشكى اكتىسى ارقىلى قوسىمشا مەرەكە/دەمالىس كۇنى رەتىندە بەكىتۋ.
