بيىل 3 مىڭ اسكەري مىندەتتى اسكەري جيىنعا شاقىرىلادى
استانا. KAZINFORM - قازاقستاندا قارۋلى كۇشتەردى دايىنداۋ جوسپارىنا سايكەس، اسكەري مىندەتتىلەرمەن كەزەكتى اسكەري جيىن وتكىزۋ جوسپارلانىپ وتىر. بۇل تۋرالى ق ر قارۋلى كۇشتەر باس شتابى باستىعىنىڭ ورىنباسارى، گەنەرال-مايور ساكەن ءجۇسىپوۆ ايتىپ بەردى.
جيىن وتكىزۋدىڭ نەگىزگى ماقساتى - بەيبىت ۋاقىتتا قىسقارتىلعان قۇرامدا ۇستالاتىن اسكەري بولىمدەردىڭ جاۋىنگەرلىك جانە جۇمىلدىرۋ ازىرلىگىن ارتتىرۋ، جۇمىلدىرۋ كەزىندە اسكەردى ورىستەتۋ ءۇشىن اسكەري وقىتىلعان رەسۋرس دايارلاۋ ولاردى زاپاستا ۇستاۋ.
«اسكەري جيىن جىل سايىن وتكىزىلەدى، ونىڭ ۇزاقتىعى 30 كۇن. بىلتىر جيىنعا 1500 ادام شاقىرىلعان ەدى. بيىل شاقىرىلاتىن ادامدار سانى 3 مىڭعا دەيىن ءوستى. ادام سانىن ۇلعايتۋ ولاردى اسكەر ءۇشىن قاجەتتى اسكەري-ەسەپتىك ماماندىقتار بويىنشا دايارلاۋ ارقىلى اسكەري وقىتىلعان رەزەرۆ جيناۋعا بايلانىستى. اسكەري جيىننان ءوتۋ اسكەري مىندەتتىلەردىڭ ماماندىقتارى بويىنشا العان داعدىسىن قالىپقا كەلتىرۋگە مۇمكىندىك بەرەدى»، - دەدى ساكەن ءجۇسىپوۆ و ك ق الاڭىندا وتكەن باسپا ءسوز كونفەرەنسياسىندا.
قولدانىستاعى زاڭدا اسكەري جيىنعا شاقىرىلاتىن ادامنىڭ شەكتى جاسى ايقىندالعان، ياعني قاتارداعى جاۋىنگەرلەر مەن سەرجانتتار ءۇشىن - 50 جاس؛ وفيتسەرلەر ءۇشىن - 60 جاس.
«اسكەري جيىنعا دەنساۋلىق جاعدايى بويىنشا جارامدى اسكەري مىندەتتىلەر شاقىرىلادى، سوندىقتان ولار الدىن الا مەديتسينالىق تەكسەرۋدەن وتەدى. ولاردى جيىن وتكىزىلەتىن جەرگە جەتكىزۋ جانە ودان كەرى قايتارۋ قورعانىس مينيسترلىگىنىڭ قاراجاتى ەسەبىنەن تەمىر جول نەمەسە اۆتوموبيل كولىگىمەن جۇرگىزىلمەك. جيىن وقۋ-جاتتىعۋ پوليگونىندا وتكىزىلەدى، اسكەري مىندەتتىلەر دالالىق لاگەردە بولادى»، - دەيدى سپيكەر.
اسكەري جيىنعا شاقىرىلعان ازاماتتار اسكەري قىزمەتشىلەر سياقتى كيىم-كەشەكپەن، تاماقپەن جانە مەديتسينالىق قىزمەت كورسەتۋمەن قامتاماسىز ەتىلەدى.
اسكەري جيىن كەزىندە اسكەري مىندەتتىلەردىڭ جۇمىس ورنى، اتقاراتىن لاۋازىمى ساقتالادى، ولارعا مەملەكەت ەسەبىنەن ورتاشا جالاقى، ال جۇمىس ىستەمەيتىن ازاماتتارعا ەڭ تومەنگى جالاقى بەرىلەدى.
سونىمەن قاتار، جيىنعا شاقىرىلعان اسكەري مىندەتتىلەر جيىن كەزىندە اسكەري قىزمەتشى دارەجەسىندە بولادى. بۇل رەتتە ولار ق ر زاڭدارىنىڭ جانە جالپى اسكەري جارعىنىڭ تالاپتارىن ساقتاۋعا ءتيىس.
