بيىل 22 مىڭ جول اپاتى تىركەلىپ، 2 مىڭ ادام قازا بولدى - اكىمشىلىك پوليتسيا كوميتەتى

استانا. قازاقپارات - 2024 -جىلى ەلىمىزدە 22 مىڭنان استام جول اپاتى تىركەلىپ، وندا 2 مىڭ ادام قازا بولدى. ق ر ءى ءى م اكىمشىلىك پوليتسيا كوميتەتىنىڭ ءتوراعاسى قايسار سۇلتانبايەۆ وسىلاي مالەم ەتتى.

«جولداعى جاعدايدى تۇراقتاندىرۋ ماقساتىندا مينيسترلىك كەشەندى شارالاردى ۇيىمداستىرۋدا. دەگەنمەن، تالداۋ كورسەتكەندەي ولار جەتكىلىكسىز بولىپ وتىر. 2024 -جىلى 22 مىڭنان استام جول اپاتى تىركەلىپ، وندا 2 مىڭ ادام قازا تاۋىپ، 25 مىڭنان استام ادام جاراقات الىپ وتىر. جول اپاتىنان جاراقات العاندار كورسەتكىشتەرىنىڭ ءوسۋى جول كولىك وقيعالارىن ەسەپكە الۋ ءتاسىلىنىڭ وزگەرۋىمەن دە بايلانىستى. قازىر دەنساۋلىققا كەلتىرىلگەن زيانعا قاراماستان جول اپاتىنان كەيىن مەديتسينالىق مەكەمەگە جۇگىنگەن بارلىق ادام ەسەپكە الىنۋدا»، - دەدى اكىمشىلىك پوليتسيا كوميتەتىنىڭ ءتوراعاسى و ك ق الاڭىندا وتكەن باسپا ءسوز ءماسليحاتىندا.

سپيكەردىڭ ايتۋىنشا، جولداعى ادام شىعىنى اپاتتىڭ نەگىزگى ءۇش تۇرىنە بايلانىستى:

1. اۆتوكولىكتەردىڭ بەتپە-بەت سوقتىعىسۋى؛
2. جاياۋ جۇرگىنشىلەردى قاعىپ كەتۋ؛
3. كولىكتىڭ اۋدارىلۋى.

وسى سەبەپتەردەن بولعان ادام شىعىنى جالپى جول اپاتىندا قازا تاپقانداردىڭ 73 پايىزىن قۇرايدى. اپاتتىڭ وسى ءۇش ءتۇرىنىڭ نەگىزگى سەبەبى - جىلدامدىقتى ارتتىرۋ.

سونداي-اق، كوميتەت باسشىسى جولداعى جاعدايدى باقىلاۋ اياسىندا پوليتسيا تاراپىنان جۇيەلى شارالار قابىلدانىپ جاتقانىن، «قاۋىپسىز جول»، «اۆتوبۋس»، «اۆتوكولىك»، «ابايلاڭىز، بالالار!» سەكىلدى جەدەل پروفيلاكتيكالىق شارالار وتكىزىلىپ تۇراتىنىن ايتتى.

اۆتور
ەربول جانات