بيىل 1 ميلليون ادامدى جۇمىسقا ورنالاستىرۋ كەرەك: جوسپار قالاي ورىندالدى
استانا. KAZINFORM - ق ر ەڭبەك جانە حالىقتى الەۋمەتتىك قورعاۋ مينيسترىلىگى بيىل شامامەن 1 ميلليون ادامدى جۇمىسقا ورنالاستىرۋ مىندەتى قانشالىقتى ورىندالىپ جاتقانى جايىندا تۇسىنىك بەردى.
«ورتالىق جانە جەرگىلىكتى اتقارۋشى ورگانداردىڭ نەگىزگى مىندەتتەرىنىڭ ءبىرى - جاڭا جۇمىس ورىندارىن قۇرۋ. قازىر جۇمىس ورىندارىن قۇرۋ نەگىزىنەن سالالىق تۇجىرىمدامالار، وڭىرلەردى دامىتۋ جوسپارلارى، ينۆەستيتسيالىق جوبالار، شاعىن جانە ورتا كاسىپكەرلىكتى دامىتۋدى ىنتالاندىرۋ جونىندەگى باعدارلامالار اياسىندا ىسكە اسىرىلاتىن جوبالار ارقىلى قۇرىلادى. بيىل بەكىتىلگەن وڭىرلىك جۇمىسپەن قامتۋ كارتالارى شەڭبەرىندە 948 مىڭ ادامدى جۇمىسقا ورنالاستىرۋ جوسپارلاندى. وسى ۋاقىتقا دەيىن 735 مىڭ ادام جۇمىسقا ورنالاستىرىلدى»، - دەلىنگەن ەڭبەك مينيسترلىگىنىڭ Kazinform اگەنتتىگىنە بەرگەن جاۋابىندا.
ونىڭ ىشىندە تۇجىرىمدامالار مەن ۇلتتىق جوبالار اياسىندا 51 مىڭ ادام، جۇمىسپەن قامتۋدىڭ بەلسەندى شارالارى كومەگىمەن 189 مىڭ ادام، تۇراقتى جۇمىس ورىندارىنا 270 مىڭ ادام، شاعىن جانە ورتا بيزنەس كاسىپورىندارىنا 225 مىڭ ادام جۇمىسقا ورنالاستىرىلدى.
«اتالعان جوسپار جىل سوڭىنا دەيىن ورىندالادى دەپ جوسپارلانعان»، - دەپ اتالىپ وتكەن ۆەدومستۆو اقپاراتىندا.
جاقىندا ق ر پرەمەر- ءمينيسترىنىڭ ورىنباسارى تامارا دۇيسەنوۆا جۇمىسسىزدار قاتارىنا كىمدەر جاتاتىنىن تۇسىندىرگەن ەدى.
بۇدان بۇرىن حابارلانعانداي، ق ر پارلامەنتى ءماجىلىسى ءتوراعاسىنىڭ ورىنباسارى دانيا ەسپايەۆانىڭ ايتۋىنشا، تەحنيكالىق جانە كاسىپتىك ءبىلىم بەرۋدى رەفورمالاۋ ارقىلى جۇمىسشى كاسىپتەردىڭ بەدەلىن ارتتىرۋ قاجەت. سەبەبى قازىرگى كەزدە كاسىپتىك- تەحنيكالىق ءبىلىمى بار ماماندىقتارعا دەگەن سۇرانىس جوعارى ءبىلىمدى تۇلەكتەرگە دەگەن قاجەتتىلىكتەن 70 پايىزعا ارتىق.
