بىرىككەن اراب امىرلىكتەرى قازاقستانعا ىزدەۋدە جۇرگەن ءۇش ادامدى ۇستاپ بەردى

ساپار بارىسىندا ب ا ءا ادىلەت ءمينيسترى جانە باس پروكۋرورىمەن كەزدەسۋ وتكىزىلىپ، قىلمىسقا قارسى كۇرەس پەن ىزدەۋدە جۇرگەن ادامداردى ەكستراديتسيالاۋ سالاسىنداعى ءوزارا ءىس-قيمىلدى نىعايتۋ ماسەلەلەرى تالقىلاندى.

قول جەتكىزىلگەن اتالعان ۋاعدالاستىقتى ىسكە اسىرۋ شەڭبەرىندە باس پروكۋراتۋرا، ۇلتتىق قاۋىپسىزدىك كوميتەتىنىڭ سىبايلاس جەمقورلىققا قارسى قىزمەتى مەن ىشكى ىستەر مينيسترلىگىنىڭ ينتەرپول ۇلتتىق ورتالىق بيۋروسىمەن بىرلەسىپ، قازاقستاننىڭ بىرىككەن اراب امىرلىكتەرىندەگى ەلشىلىگىنىڭ قولداۋىمەن قىلمىستىق جاۋاپتىلىققا تارتۋ ءۇشىن اتالعان ەلدەن قازاقستاننىڭ ءۇش ازاماتىن ەكستراديتسيالادى.

ولاردىڭ بىرەۋى 2019-2020-جىلدارى سىبايلاسىمەن بىرگە استانادا حالىقارالىق ورتالىق سالۋعا ارنالعان جەر ۋچاسكەسىن الۋعا جاردەمدەسۋگە ۋادە بەرىپ، الداۋ جولىمەن جابىرلەنۋشىنىڭ جالپى سوماسى 368 مىڭ ا ق ش دوللارى قاراجاتىن يەمدەنگەن.

تاعى ءبىر فيگۋرانت دەنساۋلىققا قاساقانا اۋىر زيان كەلتىرۋ، توناۋ مەن بۇزاقىلىق جاساعانى ءۇشىن ىزدەۋدە بولعان. ول 2021-جىلى الماتى قالاسىندا ادامدار توبى بولىپ جابىرلەنۋشىگە شابۋىل جاساپ، ونىڭ دەنساۋلىعىنا اۋىر زيان كەلتىرگەن جانە جالپى سوماسى 100 مىڭ تەڭگەدەن اساتىن جەكە مۇلكىن اشىق تۇردە يەمدەنگەن.

ءۇشىنشى كۇدىكتى وسى جىلعى جازدا استانا قالاسىندا قىتاي ازاماتىنىڭ 24200 ا ق ش دوللارىن ۇرلادى دەگەن كۇدىككە ىلىنگەن، بۇل اسا ءىرى مولشەرگە جاتادى.

اتالعان تۇلعالار قىلمىس جاساعاننان كەيىن قىلمىستىق قۋدالاۋ ورگاندارىنان جاسىرىنعان، وسىعان بايلانىستى حالىقارالىق ىزدەۋگە جاريالانعان. كەيىننەن ولاردىڭ بىرىككەن اراب امىرلىكتەرىنىڭ اۋماعىندا جۇرگەنى انىقتالىپ، قازاقستان رەسپۋبليكاسى باس پروكۋراتۋراسىنىڭ سۇراۋ سالۋى بويىنشا ەلگە ەكستراديتسيالاندى.

باس پروكۋراتۋرا قازىرگى ۋاقىتتا كۇدىكتىلەر تەرگەۋ يزولياتورىنا قامالعانىن حابارلادى. سوتقا دەيىنگى تەرگەپ-تەكسەرۋ قايتا باستالدى.