بىرنەشە وبلىستا قاڭتار وقيعاسى كەزىندە ۇرلانعان قارۋ-جاراقتار تابىلدى
استانا. KAZINFORM - جەدەل-ىزدەستىرۋ ءىس-شارالارى بارىسىندا پوليتسەيلەر بىرنەشە وبلىستىڭ اۋماعىندا قارۋ جاسىرىلعان ءتورت ورىندى تاپتى، دەپ حابارلايدى Polisia.kz.
ولاردىڭ ۇشەۋىندە قاڭتار وقيعاسى كەزىندە ۇرلانعان قارۋ-جاراق پەن وق-دارىلەر انىقتالدى.
ىشكى ىستەر مينيسترلىگى زاڭسىز اينالىمنان قارۋدى، ونىڭ ىشىندە قاڭتار وقيعاسى كەزىندە ۇرلانعان قارۋ-جاراقتى تابۋ جانە تاركىلەۋ بويىنشا جۇمىستى جالعاستىرۋدا. ماسەلەن، جاركەنت قالاسىنىڭ ماڭىندا قاراۋسىز قالعان عيماراتتا Remington 11-87 ماركالى تەگىس ۇڭعىلى مىلتىق تابىلىپ، تاركىلەندى (قاڭتار وقيعاسى كەزىندە ۇرلانعان).
جامبىل وبلىسى بىرلەسۋ اۋىلىنىڭ شەتىندە قارۋ جاسىرىلعان جەر تابىلدى، وندا Benelli مودەلىنىڭ تەگىس ۇڭعىلى مىلتىعى (قاڭتار وقيعاسى كەزىندە ۇرلانعان)، قوس ۇڭعىلى اڭشى مىلتىعى، قول گراناتاسى جانە ءتورت پاترون تاركىلەندى.
سونىمەن قاتار جاڭاتاس قالاسىنىڭ جانىندا تەگىس ەكى ۇڭعىلى مىلتىق، گاز تاپانشاسى جانە ءۇش وق-ءدارى جاسىرىلعان ورىن انىقتالدى. الماتى وبلىسىنداعى كەنتتەردىڭ بىرىندە ارىقتان ءارتۇرلى كاليبرلى ەكى اڭشى مىلتىعى (ولاردىڭ ءبىرى قاڭتار وقيعاسى كەزىندە ۇرلانعان)، جارىق-شۋ گراناتاسى، ا ك-74 ماگازينى، جەتى پاترون جانە قارا تاكتيكالىق بەتپەردە تابىلدى. نومىرلەر جويىلعان قارۋ-جاراق پەن وق-دارىلەرگە قاتىستى قوسىمشا تەكسەرۋلەر جۇرگىزىلەدى.
- ۆەدومستۆو وسى باعىتتاعى جۇمىستى جۇيەلى تۇردە جالعاستىرۋدا. سوڭعى ءۇش جىلدا جەدەل ءىس-شارالاردىڭ، ءتىنتۋ مەن رەيدتەردىڭ ارقاسىندا ءتۇرلى 8119 قارۋ، 845 گراناتا، 114 مىڭنان استام وق-ءدارى تابىلىپ، تاركىلەندى. سونداي-اق قارۋ جاسىرىلعان 738 ورىن تابىلدى، - دەلىنگەن ءى ءى م باسپا ءسوز قىزمەتى تاراتقان اقپاراتتا.
وسىعان دەيىن اقپان ايىنىڭ باسىندا قاڭتار وقيعاسى كەزىندە ۇرلانعان قارۋ-جاراقتار تابىلعانىن جازعان ەدىك.
