بىرنەشە رەت ۇرلىق جاساعان اۋەجاي جۇمىسشىسى سوتتالدى
الماتى. KAZINFORM - الماتى اۋەجايىنداعى جۇكتى ۋاقىتشا ساقتاۋ قويماسىنىڭ 29 جاستاعى جۇمىسشىسى جالپى سوماسى 7 ميلليون تەڭگەدەن اساتىن بوتەننىڭ مۇلكىن ۇرلاعانى ءۇشىن 3,6 جىلعا سوتتالدى.
ىشكى ىستەر مينيسترلىگىنەن حابارلاعانداي، 29 جاستاعى ازامات «الماتى-دۋباي»، «الماتى-پراگا» جانە «الماتى-گونكونگ» حالىقارالىق باعىتتارىندا بوتەننىڭ مۇلكىن بىرنەشە رەت ۇرلاعان.
«ۇستالعان ازامات اۋەجايدىڭ ۋاقىتشا ساقتاۋ قويماسىندا جۇك تيەۋشى بولىپ جۇمىس ىستەپ ءجۇرىپ، وسى جىلدىڭ قاڭتار-ناۋرىز ايلارى ارالىعىندا جالپى سوماسى 7645371 تەڭگە بولاتىن مۇلىكتى ۇرلاعان. كولىك پوليتسەيلەرىمەن جەدەل تارتىپتە ۇرلىق فاكتىسى بويىنشا سوتقا دەيىنگى تەرگەپ-تەكسەرۋ جۇرگىزۋى بارىسىندا زاتتاي دالەلدەمەلەر تاركىلەندى» - دەپ حابارلادى مينيسترلىكتەن.
الماتى قالاسى تۇركسىب اۋداندىق سوتىنىڭ ۇكىمىمەن ەر ادام كىنالى دەپ تانىلىپ، وعان 3 جىل 6 ايعا باس بوستاندىعىنان ايىرۋ جازاسى تاعايىندالدى.
