بىرلىك كۇنى: اقتوبەدە قازاق تىلىندە جەتىك سويلەيتىن پوليتسيا قىزمەتكەرلەرى ماراپاتتالدى
اقتوبە. KAZINFORM - اقتوبەدە مەملەكەتتىك ءتىلدى دامىتۋعا، ۇلتتار تاتۋلىعى مەن ىنتىماقتاستىعىن نىعايتۋعا ۇلەس قوسقان پوليتسيا قىزمەتكەرلەرى ماراپاتتالدى. قازاق ءتىلىن جەتىك بىلەتىن وزگە ەتنوس وكىلدەرى دەپارتامەنتتىڭ ءتۇرلى بولىمىندە قىزمەت ەتىپ ءجۇر.
«ءبىر شاقىراق استىندا» اتتى شاراعا ءتۇرلى بولىمدە قىزمەت ەتىپ جۇرگەن پوليتسيا قىزمەتكەرلەرى قاتىستى. اسىرەسە قازاق ءتىلىن جەتىك مەڭگەرگەن وزگە ۇلت وكىلدەرىنىڭ ەڭبەگى زور.
- پوليتسيا دەپارتامەنتىندە دە وزگە ۇلت وكىلدەرى بار. ولار كۇن-ءتۇن دەمەي ەلىمىزدىڭ، حالىقىمىزدىڭ تىنىشتىعىنا ۇلەس قوسىپ ءجۇر. سۋ تاسقىنى كەزىندە ۇلتقا بولىنبەي، قىزمەتكە بولىنبەي ءبارىمىز اتسالىستىق. ءبارى اۋىزبىرشىلىكتىڭ ارقاسى دەپ ايتۋعا بولادى، - دەدى اقتوبە وبلىستىق پد باستىعى اباي ءجۇسىپوۆ.
بىرلىك كۇنى بارلىعى 8 پوليتسيا قىزمەتكەرى ماراپاتتالدى. ولارعا العىس حات بەرىلدى.
- ءبىر شاڭىراق استىنداعى دوستىق پەن ءوزارا تۇسىنىستىك ودان ءارى جالعاسىپ، ەلىمىزدەگى ۇلتارالىق تاتۋلىق ءاردايىم بەرىك بولسىن دەيمىن. ءوزىم قازاق ءتىلىن جەتىك بىلەمىن. ال پوليتسيا قىزمەتى سالاسىندا ەڭبەك ەتىپ جۇرگەنىمە 10 جىل بولدى. بوس ۋاقىتتا سپورتپەن شۇعىلدانامىن ءارى قازاق تىلىندە ولەڭ شىعارامىن، - دەدى اقتوبە قالالىق پوليتسيا باسقارماسى پاترۋلدىك پوليتسيا باتالونىنىڭ شتاب ينسپەكتورى سوفيا پونوماريەۆا.
اقتوبەلىك پوليتسيا قىزمەتكەرلەرى ءتىل ۇيرەنۋدىڭ وزىندىك ءتاسىلى مەن قىزىقتى ساتتەرىن دە ءبولىستى. ماسەلەن زاۋىت پوليتسيا ءبولىمى جەرگىلىكتى پوليتسيا باسقارماسى قىزمەتىنىڭ ينسپەكتورى ولگا اندرييچۋك جوعارى وقۋ ورنىنا تۇسكەندە قازاقشا مۇلدە سويلەي الماعان. ال ارىپتەسى كەرىسىنشە، ورىس ءتىلىن تۇسىنبەگەن سوڭ وقىتۋشىلارى ەكى ۇلت وكىلىن قاتار وتىرعىزعان. ارادا ءتورت جىل ۋاقىت وتكەندە ولگا اندرييچۋك مەملەكەتتىك ءتىلدى جەتىك مەڭگەرىپ شىقتى.
- مەن قازاقشا ەركىن سويلەي باستادىم. بۇل ۇلكەن جەتىستىك. ۇزدىك تۇلەك بولعان سوڭ ماعان قىزمەت ەتەتىن ءبولىمدى تاڭداۋعا مۇمكىن بەردى. سول سەبەپتەن دە زاۋىت پوليتسيا بولىمىنە باردىم. ءوزىم قازاق تىلىندە ءان شىرقاعاندى دا ۇناتامىن، - دەدى ولگا اندرييچۋك.
