بىرگە مە، بولەك پە: قاي نۇسقا دۇرىس؟

استانا. قازاقپارات - كەيىنگى كەزدە بىردە بولەك، بىردە بىرگە جازىلاتىن سوزدەر قاتارى كوبەيگەن. ماسساگەت «قاي نۇسقا دۇرىس؟» ايدارى اياسىندا ءال-فارابي اتىنداعى قازاق ۇلتتىق ۋنيۆەرسيتەتى ا. بايتۇرسىن ۇلى اتىنداعى قازاق ءتىل ءبىلىمى كافەدراسىنىڭ اعا وقىتۋشىسى، PhD عىلىم دوكتورى جانات اسىلحان قىزىنان دۇرىس نۇسقانى سۇرادى.

«ەلدىمەكەن»، «ىقشاماۋدان»، «كوپبالالى»
ساراپشى ءتۇرلى نۇسقادا جازىلىپ جۇرگەن تىركەستەر قاتارىنا «ەلدىمەكەن»، «ىقشاماۋدان»، «كوپبالالى» سەكىلدى نۇسقالاردى جاتقىزدى.

«بۇل تىركەستەردى ورىستىڭ «ميكرورايونى» مەن «منوگودەتنىيىنا» قاراپ قوسىپ جىبەردىك دەلىك. ال «ناسەلەننىي پۋنكتىن» نەلىكتەن «ەلدىمەكەن» دەپ قوسىپ جازۋدى ادەتكە اينالدىرىپ بارامىز؟ «قانداي مەكەن؟» دەپ سۇراق قويىپ كورىڭىز. العاشقى ءسوزدىڭ بولەك سۇراققا جاۋاپ بەرەتىنىن اڭعاراسىز. ول از بولسا، ەلسىز قالعان مەكەندى قالاي بىرىكتىرىپ جازاتىنىڭىزدى ويلاپ كورىڭىز»، - دەدى جانات اسىلحان قىزى.

فيلولوگتىڭ ايتۋىنشا، «ىقشام اۋدان» («مولتەك اۋدان» نەمەسە «شاعىن اۋدان») بولەك جازىلۋى قاجەت.

PhD عىلىم دوكتورى «كوپبالالى» تىركەسى قالاي جازىلاتىنىن دا ايتتى.

«ساپالىق سىن مەن قاتىستىق سىن ەسىمنىڭ تىركەسۋى ارقىلى جاسالاتىن «كوپ بالالى»، «كوپ قاباتتى» جانە باسقا تىركەستەر دە بولەك جازىلادى. وعان كوز جەتكىزۋ ءۇشىن كۇردەلى سىن ەسىمدەردىڭ جاسالۋ جولدارىن قايتالاپ وقۋعا كەڭەس بەرەر ەدىك»، - دەدى ساراپشى.