بۇگىنگىنىڭ باتىرى: وقۋشى اقان اكىمجانوۆ بالكونداعى بالانى قالاي قۇتقارعانىن ايتتى
استانا. KAZINFORM - استاناداعى تۇرعىن ءۇي كەشەندەرىنىڭ بىرىندە 31-مەكتەپ-گيمنازيانىڭ 7 «د» سىنىپ وقۋشىسى اقان اكىمجانوۆ قايعىلى جاعدايدىڭ الدىن الدى. 20-مامىردا ءتورتىنشى قاباتتا ورنالاسقان پاتەردىڭ بالكونىندا ءىلىنىپ تۇرعان 5 جاسار بالانى قۇتقارىپ قالدى.
بەيبىت كۇننىڭ باتىرىنا اينالىپ شىعا كەلگەن اقان Kazinform تىلشىسىنە شاعىن سۇحبات بەردى.
سول كۇنى اقان دوستارىمەن بىرگە اۋلادا ويناپ ءجۇرىپ، 4-قاباتتىڭ بالكونىندا ءىلىنىپ تۇرعان بالانى كورەدى. كەيىن بەلگىلى بولعانداي، 5 جاسار بالا بۇل ۇيگە قوناققا كەلىپ، اناسىن ىزدەي باستاعان.
- اقان، قيىندىققا تاپ بولعان كىشكەنتاي بالانى كورگەن كەزدە نە ويلادىڭ؟
- ويلانباستان سومكەمدى تاستاپ، وعان كومەككە جۇگىردىم. ليفتىمەن كوتەرىلىپ بارا جاتقاندا قالاي قۇتقاراتىنىمدى ويلاستىرا باستادىم. ءبىر جاعىنان ۇلگەرمەيمىن بە دەپ تە قورىقتىم. بالكونعا جەدەل جەتىپ، بالانى قولىنان تارتىپ، كوتەرىپ الدىم. مەنىمەن بىرگە بولعان دوستارىم دا كومەكتەسكىسى كەلدى، ءبىراق ولار قۇلاپ كەتكەن جاعدايدا قۇتقارۋ امالدارىن جاساۋ ءۇشىن اۋلادا قالدى.
- بالانى قۇتقارىپ العاننان كەيىن ونىمەن سويلەسە الدىڭ با؟
- بالانى ليفتىمەن تۇسىرگەنىمدە ول جىلاي باستادى. ونى تەز الىپ كەتتى، سوندىقتان دا بالاقايمەن تانىسۋعا ۋاقىتىم بولمادى. كەيىن اتا-اناسى كەلىپ، العىسىن ايتتى. بارلىعى جاقسى اياقتالعانىنا قۋانىشتىمىن. مەنىڭ ورنىمدا بولعان كەز كەلگەن ادام كومەككە ۇمتىلۋشى ەدى.
- بۇل جاعدايدان قانداي ساباق الدىڭ؟
- ءسىز وزىڭىزگە، جاقىندارىڭىزعا نەمەسە سىزگە مۇلدەم بوتەن ادامدارعا ءاپ-ساتتە نە بولاتىنىن ەشقاشان بىلمەيسىز. ەگەر ادام قيىندىققا تاپ بولعاندا وعان كومەكتەسۋگە مۇمكىندىگىڭىز بولسا، قول ۇشىن سوزۋ كەرەك. مەنىڭ كىشكەنتاي باۋىرىم بار. وعان ۇلگى بولعىم كەلەدى. ومىردە كەز كەلگەن جاعداي بولۋى مۇمكىن. جاقىن ادامدارىمنىڭ ءبىرى قيىندىققا تاپ بولسا، جانىنداعى ادامدار دا مىندەتتى تۇردە كومەكتەسەدى دەپ ۇمىتتەنەمىن.
- ءسىزدىڭ دوستارىڭىز، سىنىپتاستارىڭىز بولعان وقيعا سىزدەن سۇرادى ما؟ ولار سىزگە نە ايتتى؟
- ارينە، سۇرادى. مەنى ماقتان تۇتاتىندارىن جەتكىزدى.
اقاننىڭ اناسى زۋحرا اكىمجانوۆا بەس بالا تاربيەلەپ وتىر. اقان وتباسىنداعى ءتورتىنشى پەرزەنت ەكەن.
«بۇل جاڭالىقتى ەستىگەندە اقان مەن 5 جاستاعى بالا ءۇشىن الاڭدادىم. تاباندىلىق تانىتىپ، كومەك قولىن سوزۋعا تىرىسقان ۇلىمدى ماقتان تۇتامىن. سىنىپ جەتەكشىسىمەن سويلەسكەندە، ول بولعان وقيعادان كەيىن اقاننىڭ مەكتەپكە بارعانىن جانە ەشكىمگە ەشتەڭە ايتپاعانىن ايتتى. ماقتانعىسى كەلمەدى مە ەكەن؟ ونىڭ دوستارى مەن سىنىپتاستارى فوتوسۋرەتتەر مەن بەينەلەردى كورسەتىپ، ءمان-جايدى جەتكىزە باستاعان. اقاننىڭ ەسەيىپ، باتىل، سابىرلى، بايسالدى ازاماتقا اينالىپ كەلە جاتقانىنا قۋانامىن»، - دەيدى اناسى.
ەستەرىڭىزگە سالساق، استانا قالاسىنىڭ اكىمى جەڭىس قاسىمبەك اقانعا العىس رەتىندە پلانشەت پەن 1 ميلليون تەڭگە سىياقى تابىستاعان بولاتىن.
اۆتور ورالحان قوجانوۆ
