بۇگىنگى جاستار كىم بولۋدى ارماندايدى؟
استانا. KAZINFORM - جاستار - قوعامنىڭ قوزعاۋشى كۇشى، ۇلتتىڭ بولاشاعى. ولاردىڭ ماقساتى، ارمانى، ماماندىق تاڭداۋداعى وزىندىك كوزقاراسى زامان اعىمىنا بايلانىستى وزگەرىپ وتىرادى.
جاڭا بۋىن تەك تابىستى بولۋدى ەمەس، وزدەرىن جان-جاقتى دامىتىپ، قوعامعا ۇلەس قوساتىن سالادا قىزمەت ەتۋدى قالايدى. بۇرىنعى ۋاقىتتا عارىشكەر بولۋدى ارمانداۋ، دارىگەر، زاڭگەردى مارتەبەلى مامان ساناۋ سياقتى تەندەنتسيالار دا بەلگىلى ءبىر ۋاقىتقا ءتان بولدى.
بۇگىنگى جاستاردىڭ تاڭداۋى ءارتۇرلى سالالارعا ءبولىنىپ، سان سالاعا باعىتتالعان. بۇل ماقالامىزدا ۋاقىت وتكەن سايىن جاستاردىڭ ماماندىق تاڭداۋداعى تالعامى قالاي وزگەرەتىندىگى تۋرالى زەرتتەپ كورۋگە تىرىستىق.
كەڭەستىك كەزەڭدەگى جاستار كىم بولۋدى ارماندادى؟
كەڭەس وداعى كەزەڭىندە ەر بالالاردىڭ اراسىندا عارىشكەر بولۋ ارمانى كەڭىنەن تارالعان ەدى. بۇل تاڭداۋ سول كەزدەگى قوعامنىڭ يدەولوگيالىق كوزقاراسىمەن بايلانىستى بولدى. يۋري گاگاريننىڭ العاش رەت عارىشقا ۇشۋى تەك كەڭەس وداعىندا عانا ەمەس، بۇكىل الەمدە سەنساتسياعا اينالدى. سول كەزدە حالىق ءۇشىن عارىش سالاسى ۇلتتىق ماقتانىشتىڭ سيمۆولى بولىپ، كوپتەگەن بالاعا شابىت بەردى. عارىشكەرلەر تەك باتىلدىق پەن كۇشتىڭ بەينەسى عانا ەمەس، عىلىمنىڭ، تەحنيكا مەن جاڭا جەتىستىكتەردىڭ تۇلعاسى بولدى. عارىشكەر بولۋدى ارمانداعان ۇل بالالار بولاشاقتا وسى سالادا تابىسقا جەتۋدى قالادى.
قىزدار اراسىندا دارىگەر بولۋ تانىمالدىققا يە بولدى. بۇل تاڭداۋ ولار ءۇشىن ادامدارعا كومەك كورسەتىپ، قوعامنىڭ يگىلىگىنە قىزمەت ەتۋ، مارتەبەلى ماماندىق ارقىلى ادامداردى ەمدەپ، ءومىرىن جاقسارتۋعا دەگەن ۇمتىلىستى كورسەتتى. سول كەزەڭدە مەديتسينا سالاسى تۇراقتى جانە بەدەلدى كاسىپ سانالدى، ال دارىگەر بولۋ بار قۇرمەت پەن بەدەلگە يە بولۋ دەپ ەسەپتەلدى. اتا-انالار بالالارىن وسى ماماندىققا باعىتتاپ، ولاردىڭ بولاشاقتا جاۋاپتى قىزمەت اتقاراتىنىنا سەندى.
1980-1990-جىلدارى ەل ەكونوميكاسى نارىقتىق قاتىناستارعا بەت بۇرعاندىقتان، قوعامدا قۇقىقتىق ءبىلىمنىڭ ماڭىزى ارتا باستادى. جاڭا زاڭداردىڭ قابىلدانۋى، قوعامداعى قۇقىقتىق ساۋاتتىلىقتىڭ قاجەتتىلىگى جاستاردى زاڭگەر ماماندىعىنا قىزىقتىردى. زاڭگەر بولۋ قوعامداعى ادىلدىكتى قورعاپ، زاڭداردى ءتۇسىنۋ ارقىلى جەكە ومىردە دە، مانساپتا دا بيىككە جەتۋگە مۇمكىندىك بەردى. كوپتەگەن جاس زاڭگەر بولۋدى تەك كاسىبي جەتىستىك ەمەس، تابىسقا جەتۋدىڭ جولى رەتىندە قاراستىردى. بۇل ماماندىق سول ۋاقىتتاعى الەۋمەتتىك بەدەلدىڭ ءبىر كورسەتكىشى بولىپ سانالدى.
2000-جىلدارى نارىقتىق ەكونوميكا مەن قارجىلىق ساۋاتتىلىقتىڭ ارتۋى جاستار اراسىندا ەكونوميست، قارجىگەر، بانك قىزمەتكەرى سىندى ماماندىقتاردى تانىمال ەتتى. جاستار بۇل باعىتتى تاڭداپ، قارجى سالاسىندا مانساپ قۇرۋعا ۇمتىلدى. ەكونوميكالىق ءبىلىم مەن بانك سالاسىندا جۇمىس ىستەۋ سول كەزدەگى تۇراقتى، تابىستى ءومىر سۇرۋگە مۇمكىندىك بەرەتىن ماماندىق رەتىندە قاراستىرىلدى. وسىلايشا، قارجىلىق تۇراقتىلىقتى قامتاماسىز ەتۋگە باعىتتالعان تاڭداۋلار جاڭا ءداۋىردىڭ باستى ەرەكشەلىگىنە اينالدى.
جاڭا زاماننىڭ باعىتتارى: IT جانە سيفرلىق تەحنولوگيالار
قازىرگى تاڭدا سيفرلىق ەكونوميكا مەن اقپاراتتىق تەحنولوگيالاردىڭ قارقىندى دامۋى جاستاردىڭ ماماندىققا دەگەن كوزقاراسىن تۇبەگەيلى وزگەرتتى. بۇگىنگى تاڭدا جاس ۇرپاق ءۇشىن باعدارلاماشى، IT- ينجەنەر، دەرەكتەر تالداۋشىسى سياقتى ماماندىقتار ەرەكشە سۇرانىسقا يە. جاھاندىق نارىقتا Google ،Apple ،Microsoft سياقتى ءىرى كومپانيالار جاستارعا كوپتەگەن مۇمكىندىكتەر ۇسىنىپ، ولاردى شابىتتاندىرىپ وتىر. بۇل كومپانيالار تەك تابىس كوزىن ەمەس، شىعارماشىلىق جانە جاڭاشىل ويلاۋدى دامىتۋ مۇمكىندىگىن دە ۇسىنادى. جاستار IT سالاسىندا تەك جۇمىس ىستەۋدى ەمەس، قوعامنىڭ سيفرلانۋىنا ۇلەس قوسىپ، جاڭا تەحنولوگيالاردى ەنگىزۋ ارقىلى الەمدىك دەڭگەيدە ءوز ورنىن تابۋدى قالايدى.
سونىمەن قاتار، Big Data، جاساندى ينتەللەكت، كيبەرقاۋىپسىزدىك سياقتى جاڭا باعىتتار جاستار اراسىندا ەرەكشە قىزىعۋشىلىق تانىتتى. الەمدە اقپاراتتىق تەحنولوگيالاردىڭ قارقىندى دامۋى كاسىبي مامانداردىڭ تاپشىلىعىن تۋدىرىپ وتىر. قازاقستاندا دا IT ماماندىقتارىنا سۇرانىس ارتىپ، مەملەكەت تاراپىنان ارنايى باعدارلامالار مەن گرانتتار ۇسىنىلۋدا. جاستارعا وسى سالالاردا ءبىلىم الىپ، جاڭا تەحنولوگيالاردى مەڭگەرۋ ارقىلى ەلدەگى سيفرلاندىرۋ ءۇردىسىن دامىتۋعا مۇمكىندىك بەرىلۋدە. قازاقستان رەسپۋبليكاسى وقۋ- اعارتۋ مينيسترلىگىنىڭ مالىمەتىنە سۇيەنسەك، بيىل مەملەكەتتىك ءبىلىم بەرۋ تاپسىرىسى تەحنيكالىق، ياعني گەولوگيا، ماشينا قۇراستىرۋ، ەنەرگەتيكا، ءىت، مەتاللۋرگيا، كولىك جانە تاعى دا باسقا ماماندىقتار بويىنشا كوبەيتىلگەن.
IT سالاسىندا ءبىلىم الۋ جاستاردى ويلاۋ داعدىلارىن دامىتۋعا، كرەاتيۆتىلىكتى ارتتىرۋعا، پروبلەمالاردى شەشۋ قابىلەتتەرىن جەتىلدىرۋگە باعىتتايدى. كوپتەگەن جاستار الگوريتمدەرمەن جۇمىس ىستەيتىن ماماندىقتاردى تاڭداۋعا تىرىسادى، سەبەبى بۇل ماماندىقتار بۇگىنگى تاڭدا الەۋمەتتىك، ەكونوميكالىق جانە ساياسي اسپەكتىلەردى باسقارۋعا قاجەتتى داعدىلاردى قامتيدى. ناتيجەسىندە، جاستار كومپيۋتەرلىك عىلىمدار، دەرەكتەردى وڭدەۋ، باعدارلامالاۋ تىلدەرى، كيبەرقاۋىپسىزدىك جانە تاعى باسقا باعىتتاردا ءبىلىم الىپ، ءوز كاسىبي جولدارىن تاڭدايدى.
2024-جىلعى تانىمال ماماندىقتار
«365 Data Science» اقپاراتىنا سايكەس، بۇگىندە 2024-جىلى تانىمالدىلىعى ارتقان بىرنەشە ماماندىق بار. وسى رەتتە ولاردىڭ ءبىرقاتارىنا توقتالا كەتەيىك.
جاساندى ينتەللەكت مامانى - بولاشاقتا عانا ەمەس، قازىرگى ۋاقىتتا دا ەڭ قاجەتتى ماماندىقتاردىڭ ءبىرى بولىپ وتىر. 2027-جىلعا قاراي جاساندى ينتەللەكت جانە ماشينامەن وقىتۋ سالاسىنداعى ماماندارعا سۇرانىس %40 عا ارتادى. بۇگىنگى كۇنى جاساندى ينتەللەكت ءارتۇرلى سالالار مەن ماماندىقتارعا قارقىندى ەنىپ كەلەدى. AI دى مەڭگەرۋ سىزگە كەز كەلگەن سالادا جۇمىس ىستەۋگە جانە جىلىنا 100,000 ا ق ش دوللارىنان استام تابىس تابۋعا مۇمكىندىك بەرەدى.
الداعى جىلدارى ۇلكەن دەرەكتەردى (big data) تالداۋ ماماندارىنا دەگەن سۇرانىس ارتادى دەپ كۇتىلۋدە. بۇل - ءتۇرلى ۇلكەن دەرەكتەر جيىنىن ستاتيستيكالىق تالداۋ جانە ماتەماتيكالىق مودەلدەر قۇرۋ ارقىلى زەرتتەيتىن ماماندىق. بيزنەس-اناليتيكتەر ەرەكشە سۇرانىسقا يە بولادى، ويتكەنى ولار بيزنەس شەشىمدەردىڭ تيىمدىلىگىن ارتتىرۋ ءۇشىن بولجامدار جاسايدى.
مەدبيكە ماماندىعى الەمنىڭ كوپتەگەن ەلدەرىندە جىل سايىن سۇرانىسقا يە ءۇش ماماندىقتىڭ ءبىرى بولىپ تابىلادى. بىرنەشە ەلدە جۇمىس ىستەۋگە مۇمكىندىك بەرەتىن امبەباپ مەديتسينالىق ماماندىقتى يگەرگەننەن كەيىن ءسىز كەز كەلگەن قالاعان ەلدە ءومىر ءسۇرىپ، جۇمىس ىستەي الاسىز. شەتەلدە مەدبيكەلەردىڭ جالاقىسى جىلىنا 50,000 ا ق ش دوللارىنان، ال دارىگەرلەردىڭ جالاقىسى 80,000 ا ق ش دوللارىنان باستالادى.
بۇگىندە بارلىق كاسىپورىندار تۇراقتى دامۋ قاعيداتتارىنا سايكەس جۇمىس ىستەۋدىڭ جانە قورشاعان ورتاعا مينيمالدى اسەر ەتۋدىڭ ماڭىزدىلىعىن تۇسىنەدى. ەكولوگيالىق تازالىقتى ەنگىزۋ قابىلەتى الداعى جىلدارى سۇرانىسقا يە بولادى. تۇراقتى دامۋ بويىنشا ماماندارعا جىلىنا 60,000 ا ق ش دوللارىنان جوعارى جالاقى تولەنەدى.
قازىرگى ۋاقىتتا «بۇلتتى» ەسەپتەۋلەر نارىقتاعى ەڭ تانىمال داعدىلاردىڭ ءبىرى بولىپ تابىلادى. باعدارلاماشىلار مەن ۆەب-ازىرلەۋشىلەر الداعى جىلدارى وزەكتىلىگى مەن قاجەتتىلىگىن جوعالتپايدى. ولار قاشىقتان جۇمىس ىستەپ، جىلىنا 40,000 ا ق ش دوللارىنان باستاپ تابىس تابا الادى.
سيفرلىق ماركەتينگ - سيفرلاندىرۋدىڭ جارقىن مىسالى. بۇل سالاداعى ماماندار زاماناۋي سيفرلىق تەحنولوگيالار مەن پلاتفورمالاردى قولدانىپ، تۇتىنۋشىلاردى تارتىپ، ونىمدەر مەن قىزمەتتەردى ساتادى.
ءبىز سيفرلى قاۋىپ-قاتەرى بار داۋىردە ءومىر ءسۇرىپ جاتىرمىز. كومپيۋتەرلىك قاۋىپسىزدىك ماماندارىنىڭ مىندەتى - كومپيۋتەرلەردى، جەلىلەردى جانە ماڭىزدى مالىمەتتەردى قاۋىپتەردەن قورعاۋ. بۇل سالاداعى تاجىريبەلى مامانداردىڭ جىلدىق تابىسى 100,000 ا ق ش دوللارىنا دەيىن جەتەدى.
سونداي-اق ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا 2024-جىلعى 14-قازاندا وتكەن ماجىلىستە قازاقستاندا سۇرانىسقا يە بولاتىن جاڭا ماماندىقتاردىڭ ءتىزىمىن جاريالاعان ەدى.
سۆەتلانا جاقىپوۆانىڭ سوزىنشە، بولجامنىڭ قىسقا مەرزىمدى، ورتا مەرزىمدى جانە ۇزاق مەرزىمدى تۇرلەرى بار.
قىسقا مەرزىمدى بولجام جۇمىس ىستەپ تۇرعان كاسىپورىندار مەن بوس جۇمىس ورىندارىن جاريالايتىن كاسىپكەرلەردىڭ وتىنىمدەرى نەگىزىندە قالىپتاسادى، ونىڭ نەگىزىندە ۇزاق مەرزىمدى بولجام قازاقستاندىق نارىقتا پايدا بولاتىن بولاشاق سالالار تۋرالى اقپاراتتى قامتيدى. ءبىز ەلىمىزدە سۇرانىسقا يە بولاتىن جاڭا ماماندىقتاردىڭ تولىق ءتىزىمىن ۇسىنۋعا دايىنبىز، - دەدى ول.
ەڭبەك جانە حالىقتى الەۋمەتتىك قورعاۋ ءمينيسترىنىڭ ايتۋىنشا، تىزىمگە جاساندى ينتەللەكت ماماندارى، اتوم ەلەكتر ستانتسياسىنىڭ جۇمىسشىلارى، بلوكچەين تەحنولوگياسى بويىنشا ماماندار، IT ديزاينەرلەرى، باعدارلاماشىلار جانە سيفرلىق ەگىز ازىرلەۋشىلەر سياقتى ماماندىقتار كىرەدى.
كرەاتيۆتى يندۋستريالاردىڭ ءوسۋى: الەۋمەتتىك مەديا مەن كونتەنت ءوندىرىسى
قازىرگى تاڭدا الەۋمەتتىك مەديا مەن ينتەرنەت پلاتفورمالارى جاستارعا جاڭا مۇمكىندىكتەر ۇسىنىپ، ولاردىڭ شىعارماشىلىق قابىلەتتەرىن اشۋعا جاعداي جاسادى. بۇل يندۋستريادا بلوگەرلىك، كونتەنتمەيكەر، گرافيكالىق ديزاينەر، انيماتسيا جاساۋشى، مەديا پروديۋسەر سياقتى ماماندىقتار ەرەكشە سۇرانىسقا يە. الەۋمەتتىك جەلىلەردىڭ تانىمال بولۋى جاستارعا وزىندىك برەند قالىپتاستىرۋعا، ءوز ويلارىن كوپشىلىككە جەتكىزۋگە مۇمكىندىك بەرىپ وتىر. ،Instagram YouTube ،TikTok سىندى پلاتفورمالار جاس ماماندارعا ءوز ونەرىن تانىستىرىپ، ميلليونداعان اۋديتورياعا جەتۋگە جاعداي جاساپ، تابىسقا جەتۋ قۇرالىنا اينالۋدا. كرەاتيۆتى يندۋستريالار ارقىلى جاستار وزدەرىنىڭ ەرەكشە كوزقاراسىن كورسەتىپ، شىعارماشىلىق ەركىندىككە قول جەتكىزۋدە.
بۇل سالا اسىرەسە قازاقستاندا دا ۇلكەن سۇرانىسقا يە بولۋدا. جاستار فوتوسۋرەت، گرافيكالىق ديزاين، ۆيدەو جاساۋ سىندى ونەرلەرىن كورسەتىپ، تانىمال بلوگەرلەر مەن مەديا ماماندارعا اينالۋدا. كرەاتيۆتى يندۋستريالار ارقىلى جۇمىس ىستەۋ تەك شىعارماشىلىق قابىلەتتى ەمەس، نارىقتا باسەكەگە قابىلەتتىلىكتى، ماركەتينگتىك داعدىلاردى دا تالاپ ەتەدى. بۇل سالادا جۇمىس ىستەگەن جاستار جوعارى تەحنولوگيالىق قۇرالدارمەن، باعدارلامالارمەن جانە ادىستەرمەن جۇمىس ىستەي وتىرىپ، كرەاتيۆتى ويلاۋدى دامىتۋدا.
بۇدان بولەك، كونتەنت ءوندىرىسى جاستار ءۇشىن تەك تابىس كوزى ەمەس، سونىمەن قاتار الەۋمەتتىك ماسەلەلەرگە نازار اۋدارۋ، ءوز يدەيالارىن قوعاممەن ءبولىسۋ، اقپارات تاراتۋ ارقىلى جاۋاپكەرشىلىكتى ارتتىرۋ مۇمكىندىگىن بەرەدى. ولار وزدەرىنىڭ پىكىرلەرى مەن ويلارىن، تاجىريبەلەرى مەن سەزىمدەرىن جەتكىزىپ، قوعامدى دامىتۋعا، سونىمەن قاتار، الەۋمەتتىك وزگەرىستەرگە ىقپال ەتۋدە.
ەكولوگيا جانە تۇراقتى دامۋ: قوعامعا جاۋاپكەرشىلىكپەن قاراۋ
جاھاندىق ەكولوگيالىق ماسەلەلەرگە نازار اۋدارۋ قازىرگى جاستاردىڭ باستى ەرەكشەلىكتەرىنىڭ ءبىرى بولىپ وتىر. كليماتتىڭ وزگەرۋى، ەكولوگيالىق داعدارىس، سۋدىڭ، اۋانىڭ لاستانۋى سياقتى ماسەلەلەر جاستاردى الاڭداتىپ، ولاردى ەكولوگيا مەن تۇراقتى دامۋ سالاسىنا بەت بۇرعىزۋدا. قازاقستاننىڭ دا ەكولوگيالىق ماسەلەلەرى بار بولعاندىقتان، جاستار ەكولوگياعا بايلانىستى جوبالارعا قاتىسىپ، قورشاعان ورتاعا دەگەن جاۋاپكەرشىلىكتى ارتتىرۋدا.
ەكولوگيالىق ءبىلىم الىپ، تۇراقتى دامۋ سالاسىندا ماماندانۋ - تەك كاسىبي جەتىستىك ەمەس، قوعامعا پايدالى بولۋدى بىلدىرەدى. بۇل سالادا جۇمىس ىستەيتىن جاستار قوقىس وڭدەۋ، جاڭارتىلاتىن ەنەرگيا كوزدەرىن قولدانۋ، سۋدى ۇنەمدەۋ، ورماندى قورعاۋ سياقتى ماڭىزدى جوبالارمەن اينالىسادى. ولار تەك جەكە ومىرگە ەمەس، بۇكىل الەمگە پايداسىن تيگىزۋگە ۇمتىلادى. تۇراقتى دامۋ بويىنشا ءبىلىم الۋ ارقىلى جاستار بولاشاق ۇرپاققا تازا، دەنى ساۋ تابيعات قالدىرۋدى ماقسات ەتەدى.
ەكولوگيانى ساقتاۋ، تابيعي رەسۋرستاردى ۇتىمدى پايدالانۋ، ەكولوگيالىق سانا قالىپتاستىرۋ جاستار اراسىندا كەڭىنەن ناسيحاتتالۋدا. ولار ەكولوگيالىق ۇيىمدارعا قوسىلىپ، الەۋمەتتىك جوبالارعا قاتىسىپ، ەكولوگيالىق ءبىلىم بەرۋ باعدارلامالارىن ۇيىمداستىرىپ، قوعامدى ەكولوگيا ماسەلەلەرىنە تارتۋدا. بۇل جاستاردىڭ ءوز جاۋاپكەرشىلىگىن سەزىنۋىمەن قاتار، قوعامداعى ەكولوگيالىق مادەنيەتتى دامىتۋعا ۇلەس قوسۋعا باعىتتالعان.
كاسىپكەرلىك: يننوۆاتسيا مەن كرەاتيۆتىلىكتىڭ جاڭا مۇمكىندىكتەرى
قازاقستاننىڭ جاستار اراسىندا كاسىپكەرلىك سالاسىنا قىزىعۋشىلىق ارتىپ، ولار ءوز بيزنەستەرىن اشۋعا بەلسەندىلىك تانىتۋدا. جاستار ستارتاپتار، يننوۆاتسيالىق جوبالار، جاڭا ونىمدەر مەن قىزمەتتەردى نارىققا ەنگىزۋ ارقىلى كاسىپكەرلىك الەمىنە قادام باسۋدا. كاسىپكەرلىك جاستاردىڭ شىعارماشىلىق جانە يننوۆاتسيالىق قابىلەتتەرىن دامىتۋعا، ءوز يدەياسىن جۇزەگە اسىرۋعا مۇمكىندىك بەرەدى.
كاسىپكەرلىكتىڭ دامۋى جاستارعا ءوز بيزنەسىن اشۋ، ەكونوميكالىق داعدىلارىن جەتىلدىرۋ، قارجىلىق ساۋاتتىلىعىن ارتتىرۋ، جاۋاپكەرشىلىك سەزىمىن قالىپتاستىرۋ ارقىلى تابىسقا جەتۋدىڭ ءتيىمدى جولىن ۇسىنادى. جاستار الەۋمەتتىك ماسەلەلەردىڭ شەشىمىن ىزدەپ، ەكولوگيالىق جوبالار، الەۋمەتتىك كاسىپكەرلىك، ستارتاپتار ارقىلى قوعامعا پايداسىن تيگىزۋگە ۇمتىلادى.
سونىمەن قاتار، مەملەكەت تاراپىنان كاسىپكەرلىكتى دامىتۋعا ارنالعان باعدارلامالار مەن گرانتتار، ينكۋباتسيالىق ورتالىقتار جاستاردىڭ كاسىپكەرلىك الەۋەتىن ارتتىرۋدا. كوپتەگەن جاس كاسىپكەرلەر ءتۇرلى ترەنينگتەر، سەمينارلار مەن كۋرستارعا قاتىسىپ، ءبىلىمى مەن تاجىريبەسىن جەتىلدىرۋدە.
جاڭا بۋىننىڭ باعىتتارى مەن مۇمكىندىكتەرى
بۇگىنگى جاستار وزدەرىنىڭ تاڭداۋىمەن، ارمانىمەن ەلىمىزدىڭ بولاشاعىنا ۇلكەن اسەرىن تيگىزدە الادى. IT، كرەاتيۆتى يندۋستريا، كاسىپكەرلىك سىندى ءتۇرلى سالالار بۇگىنگى جاستاردىڭ كاسىبي باعدارلارىنىڭ كورسەتكىشى بولىپ وتىر. ءاربىر جاس ماماننىڭ ءوز سالاسىندا بەلسەندى بولىپ، داعدىلارىن دامىتۋى ارقىلى مەملەكەتتىڭ بولاشاعىنا ىقپال ەتۋ مۇمكىندىگى بار. جاڭا بۋىننىڭ تاڭداۋى مەن قۇندىلىعى قازاقستان قوعامىن تەك ەكونوميكالىق ەمەس، الەۋمەتتىك، ەكولوگيالىق تۇرعىدان دا العا جەتەلەيدى.
وسىلايشا، جاستارىمىز قوعامنىڭ جاڭا بەت-بەينەسى بولىپ، ەكونوميكانىڭ جاڭا باعىتىن قالىپتاستىرىپ، الەمنىڭ دامۋىندا ەرەكشە مۇمكىندىكتەرگە جول اشادا. جاستار - بۇل ەلىمىزدىڭ بولاشاعى. ولاردى قولداپ، كاسىبي دەڭگەيدە وسۋىنە مۇمكىندىك بەرۋ - قوعامنىڭ مىندەتى.
el.kz
