بۇگىنگى اۋىزاشار 90- جىلدارداعى ديسكوتەكاعا اينالىپ كەتپەۋى كەرەك - نۇرلان بايجىگىت ۇلى
استانا. KAZINFORM - «ورازا قابىل بولسىن!» باعدارلاماسىنىڭ كەزەكتى ەفيرى ورازا جانە سارەسى مەن اۋىزاشاردىڭ ادەپتەرى، ساۋاپ جيناۋ ماسەلەسى، تويعا اينالعان اۋىزاشار جايىنا ارنالدى.
ءدىن تانۋشى توقشىلىقتىڭ قادىرىن، جوقشىلىقتىڭ قاسيەتى تۋرالى تاعلىمدى وي ايتتى. «اۋىزاشارعا كىمدەردى شاقىرعان دۇرىس نەمەسە كىمدەردىڭ كەلگەنى ساۋاپتىراق؟ »، «اۋىز بەكىتۋ دۇعاسىن ارابشا ايتامىز با، قازاقشا ايتامىز با؟» دەگەن ءجيى قويىلاتىن سۇراقتارعا دا جاۋاپ بەردى.
«اۋىزاشار ۋاقىتى بۇل تەك تاماق ىشەتىن كەز ەمەس، بۇل كۇنانىڭ توگىلەتىن ءساتى» دەي كەلە تويعا اينالعان اۋىزاشاردىڭ ءمانى مەن ماڭىزىنا توقتالدى.
«جالپى، ءجۇز، ەكى ءجۇز ادامنىڭ باسىن قوسىپ بەرىلەتىن اۋقىمدى اۋىزاشاردا جاراتقاندى، پايعامباردى ۇلىقتايتىن سالاۋاتتى، قازاقتىڭ جىر-تەرمەلەرى، ءان-كۇيلەرى، جاراپازان نەمەسە قۇران جاتتاۋدان جارىس، تەرمە ايتۋدان سايىس، وتاندى ءسۇيۋ، تاربيەلى عيبراتتار، ۇلتتىق ويىندار ويناتىلسا، مۇندا تۇرعان ەشتەڭە جوق. باستىسى، «90-نىڭ ديسكوتەكاسى» دەپ ارتى تارسىل-گۇرسىلدىڭ بيىنە ۇلاسىپ كەتپەۋى كەرەك»، - دەدى نۇرلان بايجىگىت ۇلى.
