بۇگىننەن باستاپ كەدەيلىك شەگى حالىقتىڭ مەدياندىق كىرىسىنەن ايقىندالادى
استانا. KAZINFORM - بۇگىننەن باستاپ اتاۋلى الەۋمەتتىك كومەك تاعايىنداۋ ءۇشىن كەدەيلىك شەگى حالىقتىڭ مەدياندىق كىرىسىنەن ايقىندالادى.
ەڭبەك جانە حالىقتى الەۋمەتتىك قورعاۋ مينيسترلىگى ۇلتتىق ستاتيستيكا بيۋروسىمەن بىرلەسىپ، وتباسىنىڭ سيفرلىق كارتاسى دەرەكتەرى بويىنشا توقسان سايىنعى مەدياندىق كىرىس مولشەرىنە ەسەپتەۋلەر جۇرگىزدى. ولاردىڭ ناتيجەلەرى بويىنشا كەدەيلىك شەگى مەدياندىق كىرىستىڭ 35 پايىز دەڭگەيىندە، ءبىراق قازىرگى دەڭگەيدەن تومەن ەمەس، ياعني وڭىرلىك ەڭ تومەن كۇنكورىس دەڭگەيىنىڭ 70 پايىز دەڭگەيىندە ايقىندالعان. كەدەيلىك شەگىن انىقتاۋدا مەدياندىق كىرىستى ەنگىزۋ اتاۋلى الەۋمەتتىك كومەك مولشەرىنىڭ ازايۋىنا اكەلمەيتىنىن اتاپ ءوتۋ ماڭىزدى. سونىمەن قاتار، ااك الۋشىلار سانى 755 وتباسىنا نەمەسە 3,8 مىڭنان استام ادامعا ءوسۋى مۇمكىن دەپ بولجانۋدا.
بيىل ماتەريالدىق جاعدايدى زەرتتەۋ نەگىزىندە وتباسىلاردىڭ ااك كورسەتۋگە مۇقتاجدىعى تۋرالى قورىتىندىلار شىعاراتىن ۋچاسكەلىك كوميسسيالاردىڭ قىزمەتىن تسيفرلاندىرۋ جۇزەگە اسىرىلادى. بۇل كوميسسيالار ءۇشىن FSM Social موبيلدى قوسىمشاسى جاسالدى. ونىڭ ارتىقشىلىعى: گەولوكاتسيانى انىقتاۋ (ءوتىنىش بەرۋشىنىڭ ناقتى گەوگرافيالىق ورنى)؛ جەدەل شەشىم قابىلداۋ جانە قورىتىندى شىعارۋ ءراسىمىن وڭايلاتۋ؛ زەرتتەۋ جۇرگىزۋ جانە شەشىم شىعارۋ كەزىندە فورمالدى ءتاسىلدى الىپ تاستاۋ. موبيلدى قوسىمشا پيلوتتىق رەجيمدە الماتى وبلىسىنىڭ قونايەۆ قالاسىندا سىنالدى. 2025 -جىلعى قاڭتاردان باستاپ FSM Social قوسىمشاسىن بۇكىل ەل بويىنشا ەنگىزۋ جوسپارلانعان.
بۇعان دەيىن 2025 -جىلعى 1-قاڭتاردان باستاپ قازاقستاندا بىرنەشە ماڭىزدى وزگەرىس كۇشىنە ەنگەنىن جازعان ەدىك.
