بۇگىننەن باستاپ ءتارتىپ بۇزساڭىز قانشا ايىپپۇل ارقالايسىز

استانا. KAZINFORM - بۇگىننەن باستاپ ەلىمىزدە ايلىق ەسەپتىك كورسەتكىش 3932 تەڭگە بولىپ بەكىتىلدى. وتكەن جىلى 3692 تەڭگە بولعان ەدى.

ال قوعامدىق ورىنداردا ءتارتىپ بۇزعان ازاماتتارعا سالىناتىن ايىپپۇلدىڭ مولشەرى ءدال وسى ا ە ك- كە بايلانىستى. دەمەك، ءتارتىپ بۇزىپ، ايىپپۇل ارقالاساڭىز بۇل وتباسىلىق بيۋجەتىڭىزگە ايتارلىقتاي سالماق سالاتىنى ءسوزسىز. سوندىقتان ءدا تارتىپ بۇزىپ، ايىپپۇل ارقالاماس ءۇشىن وقىرمان نازارىنا قانداي جاعدايدا قانشا قارجىدان قاعىلاتىنىن ۇسىنامىز:

— رامىزدەردى قورلاۋ — 11796000 تەڭگە؛

— پودەزگە كىرەبەرىستە نە پاتەردىڭ ەسىگىنىڭ الدىنا قوقىس سالىنعان دوربانى قالدىرۋ — 78640 تەڭگە؛

— كەشكى ساعات وننان كەيىن شۋلاپ، ەلدىڭ تىنىشتىعىن الۋ — 19660 تەڭگە؛

— قوعامدىق ورىندا تۇكىرۋ — 19660 تەڭگە؛

— كولىكتە وتىرىپ تەلەفون پايدالانۋ نە قاۋىپسىزدىك بەلبەۋىن تاقپاۋ — 19660 تەڭگە؛

— قۇجاتسىز كولىك جۇرگىزۋ — 78640 تەڭگە؛

— اۆتوبۋستا جولاقى تولەمەۋ — 7864 تەڭگە؛

— كامەلەتكە تولماعان جاس ءوسپىرىمنىڭ تۇنگى وننان كەيىن ويىن-ساۋىق مەكەمەلەرىندە ءجۇرۋى — 11796 تەڭگە؛

— جولدى بەلگىلەنبەگەن جەردەن قيىپ ءوتۋ — 7864 تەڭگە؛

— كولىك جىلدامدىعىن اسىرۋ — 19660 تەڭگەدەن 117960 تەڭگەگە دەيىن؛

— قوعامدىق ورىندا بالاعات ءسوز ايتۋ — 78640 تەڭگە؛

— مۇعالىمدى نە دارىگەردى بالاعاتتاۋ — 39320 تەڭگە.

— قوعامدىق ورىندا ىشىمدىك ءىشۋ نە ماساڭ كۇيدە ءجۇرۋ — 19660 تەڭگە؛

— كامەلەتكە تولماعاندارعا تەمەكى ونىمدەرىن ساتۋ — 58980 تەڭگەدەن 393200 تەڭگەگە دەيىن؛

— جالا جابۋ — 629120 تەڭگە؛

— جەكە دەرەكتەردى زاڭسىز جيناۋ جانە وڭدەۋ — 39320 تەڭگەدەن 275240 تەڭگە؛

— قاساقانا جالعان جارناما جاساۋ — 393200 تەڭگەدەن 3932000 تەڭگەگە دەيىن؛

— بلوگەرلىكپەن جالعان اقپارات تاراتۋ — 117960 تەڭگەدەن 393200 تەڭگەگە دەيىن؛

— ءتولقۇجاتتى نەمەسە جەكە كۋالىكتى كەپىلزات رەتىندە الۋ — 19660 تەڭگە؛

— قوعامدىق ورىندا جابىسۋ (ساۋدا جاساۋ، قايىر تىلەۋ، بال اشۋ، جەزوكشەلىك) — 19660 تەڭگە.