بۇگىننەن باستاپ «استانا» مەن «چەلسي» اراسىنداعى ويىننىڭ بيلەتتەرى ساتىلىمعا شىعادى
استانا. KAZINFORM - بۇگىننەن باستاپ «استانا» مەن «چەلسي» اراسىنداعى ويىننىڭ بيلەتتەرى ساتىلىمعا شىعادى. بۇل تۋرالى «استانا» فۋتبول كلۋبى الەۋمەتتىك جەلىدەگى پاراقشاسىنا جازدى.
«استانا» فۋتبول كلۋبىنىڭ مالىمەتىنشە، ماتچقا دەگەن قىزىعۋشىلىق تانىتقاندار كوپ بولۋىنا بايلانىستى بيلەت ساتۋ بويىنشا كەلەسى قاۋىپسىزدىك شارتتارى قاراستىرىلعان:
ءبىر قولعا 4 دانا بيلەت ساتىلادى: ساتىپ الۋ ەلەكتروندىق پوشتا، تەلەفون ءنومىرى جانە نەسيە كارتاسىن تىركەۋ ارقىلى جۇزەگە اسىرىلادى؛
بيلەتتەر جەكە تۇلعاعا راسىمدەلەدى، تاپسىرىس بەرۋ كەزىندە ءاربىر كەلۋشىنىڭ دەرەكتەرىن ەنگىزۋ قاجەت، ماتچقا بارعان كەزدە وزىمەن بىرگە راستايتىن قۇجات بولۋى ءتيىس؛
ماتچقا قاتىسۋ قۇقىعىن بەرەتىن QR كودى بار ەلەكتروندىق بيلەت ماتچ كۇنى ەلەكتروندىق پوشتاعا جىبەرىلەدى؛
www.zakazbiletov.kz سايتىنداعى كەزەكتىڭ ارتۋىنا بايلانىستى، ونلاين كەزەك ىسكە قوسىلۋى مۇمكىن.
ەسكە سالا كەتەيىك، ۋەفا كونفەرەنتسيالار ليگاسىنىڭ جالپى كەزەڭىنىڭ ماتچى 12-جەلتوقساندا، ساعات 20:30 دا الماتىداعى ورتالىق ستاديوندا وتەدى.
