بۇگىن - تۇركيادا ۇلتتىق ازا تۇتۋ كۇنى
استانا. KAZINFORM - تۇركيا پرەزيدەنتى رەجەپ تايىپ ەردوعان بۇگىن حاماس ساياسي بيۋروسىنىڭ ءتوراعاسى يسمايل حانيانىڭ شەيىت بولۋىنا بايلانىستى ءبىر كۇندىك ۇلتتىق ازا تۇتۋ جاريالادى، دەپ حابارلايدى Kazinform.
رەجەپ تايىپ ەردوعان الەۋمەتتىك جەلىدەگى پاراقشاسىندا تۇركيانىڭ پالەستينا ماسەلەسىن قولدايتىنىن كورسەتۋ ءۇشىن قاسيەتتى جۇما كۇنى ۇلتتىق ازا تۇتۋ ءۇشىن تاڭدالعانىن اتاپ ءوتتى.
- پالەستينا ءىسىن قولدايتىنىمىزدى جانە پالەستينالىق باۋىرلاستارىمىزبەن ىنتىماقتاستىعىمىزدى كورسەتۋ ءۇشىن 2-تامىز، جۇما كۇنى حاماس ساياسي بيۋروسىنىڭ ءتوراعاسى يسمايل حانيانىڭ ءشاھيد بولۋىنا بايلانىستى ءبىر كۇندىك ۇلتتىق ازا تۇتۋ جاريالاندى. يسمايل حانيانى جانە بارلىق پالەستينالىق شاھيدتەردى مەيىرىممەن ەسكە الامىن. جەكە ءوز اتىمنان جانە ەلىمىزدىڭ اتىنان پالەستينا حالقىنا كوڭىل ايتامىن، - دەدى تۇركيا باسشىسى الەۋمەتتىك جەلىدە.
بۇعان دەيىن تۇركيا حالقىنىڭ يراندا ولتىرىلگەن حاماس ساياسي بيۋروسىنىڭ باسشىسى يسمايل حانياعا جاناشىرلىقپەن كوپتەگەن جازبالار جاريالاۋىنا بايلانىستى تۇركيانىڭ بۇكىل اۋماعىندا Instagram-عا كىرۋگە تىيىم سالىنعانى ايتىلعان بولاتىن.
اۆتور
جاراسقان نۇرىبايەۆ
