بۇگىن قىسقى وليمپيادادا تۇڭعىش رەت التىن العان كۇن - حرونولوگيا

استانا. KAZINFORM - بۇگىن وڭتۇستىك كورەيانىڭ كانۆوندو قالاسىندا ءوتىپ جاتقان IV قىسقى جاس وسپىرىمدەر وليمپياداسىندا شاڭعىمەن تۇعىردان سەكىرۋدەن قازاقستان كومانداسىنىڭ مۇشەسى يليا ميزەرنىح ءوز ەسىمىن التىن ارىپتەرمەن جازىپ قالدىردى. ول قىسقى ويىنداردا تۇڭعىش رەت چەمپيوندىق اتاققا قول جەتكىزدى.

تاريح بەتتەرىنە قاراپ وتىرساق، قازاقستان قۇراماسى جاس وسپىرىمدەر وليمپياداسىنا 2012-جىلدان بەرى قاراي قاتىسىپ كەلەدى. ءبىراق ءالى كۇنگە التىن بۇيىرماعان ەدى. سول ولقىلىقتىڭ ورنىن بۇگىن يليا ميزەرنىح تولىقتىرىپ، كورەي ەلىندە تۇڭعىش رەت قازاقستان تۋىن جەلبىرەتىپ، ءانۇرانىن شىرقاتتى.

وسى ورايدا، قازاقستاندىق جاسوسپىرىمدەرى كانۆون وليمپياداسىنا دەيىن قاتىسقان ءۇش ويىندا قانداي جەتىستىكتەرگە قول جەتكىزگەنىن تاعى ءبىر مارتە ەسكە سالىپ وتكەندى ءجون كوردىك.

2012-جىل: ينسبرۋك (اۋستريا) وليمپياداسى

قازاقستان قۇراماسى قىسقى جاسوسپىرىمدەر وليمپياداسىنا العاش رەت 2012-جىلى ينسبرۋكتە وتكەن ويىنداردا ءوز ونەرىن ورتاعا سالدى. قازىرگە دەيىنگى ەڭ ۇلكەن جەتىستىگىمىز دە سول العاشقى اۋستريا جەرىندە تىركەلگەن بولاتىن.

اتاپ ايتساق، ۇلتتىق قۇراما مۇشەلەرى 2012-جىلى ينسبرۋكتە 1 كۇمىس جانە 2 قولا مەدالعا قول جەتكىزدى. ناتيجەسىندە جالپى كوماندالىق ەسەپتە 23-ورىنعا تابان تىرەگەن ەدى. اتالعان باستى دودادا گالينا ۆيشنيەۆسكايا-شەپورەنكو سپرينتتە كۇمىس جۇلدە، سوسىن ءىز كەسۋ سايىسىندا قولا مەدالعا قول جەتكىزدى.

ال سەرگەي مالىشيەۆ كلاسسيكالىق جۇرىسپەن 10 شاقىرىم جارىستا مارە سىزىعىن ءۇشىنشى بولىپ كەسىپ، قولا جۇلدە الىپ قايتتى.

2016-جىل: ليللەحاممەر (نورۆەگيا) وليمپياداسى

قازاقستان جاس وسپىرىمدەرى ەكىنشى رەت 2016 -جىلى ليللەحاممەردە (نورۆەگيا) وتكەن وليمپيادا ويىندارىندا باق سىنادى. ناتيجەسىندە جەرلەستەرىمىز ءباسى بيىك باسەكەنى 2 قولا مەدالمەن اياقتادى. وسىلايشا، جالپى كوماندالىق ەسەپتە 26-ورىندى مىسە تۇتتى.

نورۆەگيا تورىندە ءبىر قولا جۇلدەنى بياتلونشى ارينا پانتوۆا سپرينتتە جەڭىپ السا، ەكىنشى جۇلدەنى ەل قورجىنىنا ەليزابەت تۇرسىنبايەۆا مانەرلەپ سىرعاناۋ سپورتىنان سالدى.

2020-جىل: لوزاننا (شۆەيتساريا) وليمپياداسى

قازاق سپورتشىلارى ءۇشىنشى رەت 2020 -جىلى لوزاننادا (شۆەيتساريا) وتكەن قىسقى ويىندارعا قاتىستى. وكىنىشكە قاراي، ەل نامىسىن قورعاۋعا بارعان 26 اتلەتىمىزدىڭ بىردە-ءبىرى جەڭىس تۇعىرىنان كورىنە المادى.

مىنە، بۇگىن كانۆون-2024 جاس وسپىرىمدەر اراسىنداعى IV قىسقى وليمپيادا ويىندارىنىڭ ءبىرىنشى كۇنىندە العاشقى التىنعا قول جەتكىزدى. بۇل جۇلدەنىڭ باسى عانا بولسىن دەپ تىلەيىك.

اۆتور كۇنسۇلتان وتارباي