بۇگىن ۇلتتىق مەرەكە - رەسپۋبليكا كۇنى

 بۇگىن قازاقستاندىقتار رەسپۋبليكا كۇنى مەرەكەسىن اتاپ ءوتىپ جاتىر، دەپ حابارلايدى Kazinform.

1990 -جىلى 25-قازاندا جوعارعى كەڭەستىڭ قاۋلىسىمەن مەملەكەتتىك ەگەمەندىك تۋرالى دەكلاراتسيا قابىلداندى. قۇجاتتا قازكسر ەگەمەندىگى جاريالانىپ، قازاقستان تاۋەلسىز مەملەكەت رەتىندە تانىلدى.

ودان بولەك دەكلاراتسيا اياسىندا ەل اۋماعىنىڭ تۇتاستىعى، وعان قول سۇعىلمايتىندىعى، قازاقستان حالقىنىڭ ءتول مادەنيەتىن، ءداستۇرىن، ءتىلىن قايتا تۇلەتۋ مەن دامىتۋ جانە ۇلتتىق ءقادىر- قاسيەتتى نىعايتۋ سەكىلدى مەملەكەتتىك قاعيداتتار بەكىتىلدى.

سونداي- اق ەگەمەندىك تۋرالى دەكلاراتسيادا ەلىمىز مەملەكەتتىك قاۋىپسىزدىك جانە ىشكى ىستەر ورگاندارىن قۇرۋ تۋرالى ايتىلعان. مەملەكەت باسشىسى، اكىمشىلىك- اتقارۋشى جوعارعى بيلىكتىڭ باسشىسى سانالدى.

قازاقستان 1991 -جىلى 16-جەلتوقساندا تاۋەلسىزدىگىن جاريالاعاننان كەيىن، 25 -قازان رەسپۋبليكا كۇنى مەرەكەسى رەتىندە اتالىپ وتىلە باستادى.

الايدا 2009 -جىلى ساۋىردە رەسپۋبليكا كۇنى مەرەكەلەر قاتارىنان الىنىپ تاستالدى. وتكەن جىلى مەملەكەت باسشىسى قاسىم- جومارت توقايەۆ رەسپۋبليكا كۇنى تاريحي مەرەكەسىن قايتارۋدى ۇسىندى. ودان بولەك، پرەزيدەنت رەسپۋبليكا كۇنىنە ۇلتتىق مەرەكە مارتەبەسىن بەرۋ تۋرالى شەشىم قابىلدادى.

وسىلايشا 2022 -جىلدان باستاپ قازاقستاندىقتار رەسپۋبليكا كۇنى مەرەكەسىن اتاپ وتەدى. بۇل كۇندەرى بارلىق وڭىرلەردە ءتۇرلى باعىتتاعى مادەني، سپورتتىق ءىس- شارالار ۇيىمداستىرىلادى.

بيىل استانادا رەسپۋبليكا كۇنى مەرەكەسىنە وراي ەلوردادا 200 دەن استام ءىس- شارا وتەدى. ونىڭ ىشىندە مادەني- بۇقارالىق، سپورتتىق جانە الەۋمەتتىك، مەرەكەلىك كونتسەرتتەر، اۆتوشەرۋلەر، كورمەلەر، بالالارعا ارنالعان كورىكتى جەرلەرگە ەكسكۋرسيالار.

سونىمەن قاتار، دوڭگەلەك ۇستەلدەر، ۇلتتىق سپورت تۇرلەرىنەن تۋرنيرلەر وتكىزۋ جانە باسقا دا كوپتەگەن ءىس- شارا جوسپارلانىپ وتىر.

ەسكە سالا كەتسەك، ىشكى ىستەر مينيسترلىگى رەسپۋبليكا كۇنى مەرەكەسى كۇنى بارلىق وڭىردە جەدەل شتاب جۇمىس ىستەيتىنى تۋرالى مالىمەت جاسادى. بۇل كۇنى قوعامدىق ءتارتىپتى 20 مىڭ پوليتسەي مەن ۇلتتىق ۇلان اسكەرى باقىلايدى.

ايتا كەتەيىك، بيىل قازاقستاندىقتار رەسپۋبليكا كۇنىنە مەرەكەسىنە وراي ءبىر كۇن (سارسەنبى) دەمالادى.