بۇگىن ەل اۋماعىندا جەل كۇشەيىپ، داۋىل سوعادى - قازگيدرومەت

استانا. KAZINFORM - «قازگيدرومەت» ر م ك ەل اۋماعىندا 10-مامىردا بولاتىن قاۋىپتى مەتەورولوگيالىق قۇبىلىستارعا بولجام جاسادى.

دەرەككە قاراعاندا، وڭتۇستىك تسيكلونى جانە ونىمەن بايلانىسقان اتموسفەرالىق فرونتالدى بولىكتەر قازاقستان تەرريتورياسىمەن جىلجي وتىرىپ، وزىمەن بىرگە نايزاعاي، بۇرشاق پەن جاڭبىر الىپ كەلەدى. سونىمەن قاتار جەلدىڭ كۇشەيىپ، ەلىمىزدىڭ سولتۇستىگى، شىعىسى مەن وڭتۇستىك-شىعىسىنىڭ تاۋلى اۋداندارىندا قاتتى جاڭبىر جاۋادى.

- قىزىلوردا، جامبىل، تۇركىستان، ماڭعىستاۋ، قاراعاندى، اباي، جەتىسۋ وبلىستارىندا، الماتى وبلىسىنىڭ سولتۇستىگى مەن ورتالىعىندا، اتىراۋ وبلىسىنىڭ وڭتۇستىك-باتىسىندا، باتىس قازاقستان وبلىسىنىڭ باتىسىندا، اقتوبە، پاۆلودار وبلىستارىنىڭ وڭتۇسگىگى، وڭتۇستىك-شىعىسى، باتىسىندا، قوستاناي وبلىسىنىڭ وڭتۇستىگىندە، شىعىس قازاقستان وبلىسىنىڭ سولتۇستىك-باتىسى مەن وڭتۇستىگىندە، اقمولا وبلىسىنىڭ باتىسى، وڭتۇستىگى مەن شىعىسىندا جوعارى ءورت قاۋپى كۇتىلەدى، - دەپ جازدى سينوپتيكتەر.

تۇركىستان وبلىسىنىڭ باتىسىندا، ءشولدى اۋداندارىندا، قىزىلوردا وبلىسىنىڭ شىعىسىندا، ورتالىعىندا، جامبىل وبلىسىنىڭ باتىسى مەن ورتالىعىندا، جەتىسۋ وبلىسىنىڭ باتىسىندا توتەنشە ءورت قاۋىپى ساقتالادى.

ايتا كەتەيىك، بۇگىن قازاقستاننىڭ 16 وبلىسى مەن استانادا نايزاعاي ويناپ، بۇرشاق جاۋادى.