بۇگىن ۇكىمەت وتىرىسىندا قانداي ماسەلەلەر كوتەرىلمەك
استانا. KAZINFORM - بۇگىن ساعات 10:00-دە ۇكىمەتتىڭ كەزەكتى وتىرىسى باستالادى. وندا قازىرگى جانە الداعى كەزەڭدەگى ماڭىزدى 2 ماسەلە قارالادى دەپ جوسپارلانعان.
ناقتىراق ايتقاندا، ۇكىمەت وتىرىسىنىڭ كۇن تارتىبىنە مىنا ماسەلەلەر شىعارىلىپ وتىر:
. 2025 -جىلعى ورتكە قارسى ماۋسىمعا دايىندىق بويىنشا قابىلدانىپ جاتقان شارالار
. سۋ تاسقىنى جاعدايى.
اتالعان ماسەلەلەر بويىنشا سۋ رەسۋرستارى جانە يرريگاتسيا، ەكولوگيا جانە تابيعي رەسۋرستار، توتەنشە جاعدايلار مينيسترلىكتەرىنىڭ باسشىلىعى، سونداي-اق ءبىرقاتار وبلىستىڭ اكىمى بايانداما جاسايدى.
ماسەلەن، سۋ رەسۋرستارى جانە يرريگاتسيا ءمينيسترى ۇكىمەت وتىرىسىندا سۋ تاسقىنى جاعدايىن باياندايدى. ول 2030 -جىلعا دەيىنگى سۋ رەسۋرستارىن باسقارۋ جۇيەسىن دامىتۋ تۇجىرىمداماسى جۇزەگە اسىرىلىپ جاتقانىنا توقتالماق. مينيستر بايانداماسىندا سۋ تاسقىنى كەزەڭىنە دايىندىق جۇمىستارى قالاي جۇرگىزىلگەنىن ەگجەي- تەگجەيلى ايتادى. سونداي-اق ەلدەگى سۋ قويمالارىنداعى سوڭعى احۋال جايلى مالىمەتتەرمەن بولىسەدى.
ەسكە سالا كەتەسەك، جاقىندا پرەزيدەنت سۋ كودەكسىنە قول قويعان بولاتىن.
ال، توتەنشە جاعدايلار ۆيتسە-ءمينيسترى ءورت قاۋپى كەزەڭىنە دايىندىق ماسەلەسىنە، سۋ تاسقىنىنا قاتىستى قازىرگى احۋالعا جان-جاقتى توقتالادى.
ەكولوگيا ءمينيسترى قازگيدرومەتتىڭ الدىن الا بولجامىنا سايكەس، بيىل جاز وتكەن جىلدارعا قاراعاندا ىستىق بولاتىنىن، وسىعان بايلانىستى وبلىس اكىمدىكتەرى ورمان ورتتەرىنىڭ الدىن الۋ بويىنشا جان-جاقتى شارالار قابىلداپ، ورمان شارۋاشىلىقتارىنىڭ كۇشتەرى مەن قۇرالدارىن تولىق جاۋىنگەرلىك دايىندىققا كەلتىرۋى قاجەتتىگىن باسا ايتادى.
وتىرىس بىتكەننەن كەيىن باسپا ءسوز ءماسليحاتى وتكىزىلەدى. وندا سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ، ەكولوگيا جانە تابيعي رەسۋرستار ءمينيسترى ەرلان نىسانبايەۆ، توتەنشە جاعدايلار ۆيتسە- ءمينيسترى كەگەن تۇرسىنبايەۆ باق وكىلدەرىنىڭ ساۋالدارىنا جاۋاپ بەرەدى.
ۇكىمەت وتىرىسىنىڭ تىكەلەي تاراتىلىمى PrimeMinister.kz سايتىندا، YouTube رەسمي ارناسىندا، Facebook الەۋمەتتىك جەلىسىندە، سونداي-اق UKIMET Telegram-كانالىندا جۇرەدى.
باسپا ءسوز كونفەرەنسياسىنىڭ تىكەلەي تاراتىلىمىن YouTube رەسمي ارناسىنان جانە Facebook الەۋمەتتىك جەلىسىنەن كورۋگە بولادى.
ەسكە سالساق، وتكەن اپتادا ۇكىمەت وتىرىسىندا تۋريزم سالاسىن دامىتۋ جانە تسيفرلاندىرۋ ماسەلەلەرى قارالدى. وتىرىس بارىسىندا تۋريزم جانە سپورت ءمينيسترى ەربول مىرزابوسىنوۆ فەرمەرلەرگە ءوز ۋچاسكەلەرىندە اگروتۋريزممەن اينالىسۋ قۇقىعىن بەرۋ ماسەلەسىن كوتەردى. سونىمەن قاتار مينيستر قازاقستاندا قوناق ءۇي جۇيەسىنە رەفورما جۇرگىزىلەتىنىن ايتتى. بۇدان بولەك مىرزابوسىنوۆ ەلىمىزگە كەلگەن شەتەلدىك تۋريستەر ساناعى قالاي جۇرگىزىلەتىنىن ءتۇسىندىردى. تۋريزم جانە سپورت ءمينيسترى ەلىمىزگە كەلگەن شەتەلدىك تۋريستەردى تاكسي قىزمەتى مەن ۆاليۋتا ايىرباستاۋدا الداپ كەتۋ جايتتارى بارىن ايتتى.
اۆتور
مارلان جيەمباي
