بۇگىن دىنمۇحامەد قونايەۆتىڭ تۋعان كۇنى

استانا. KAZINFORM - بۇگىن اسا كورنەكتى مەملەكەت جانە قوعام قايراتكەرى، ءۇش مارتە سوتسياليستىك ەڭبەك ەرى، قازاق ك س ر عىلىم اكادەمياسىنىڭ اكادەميگى، تەحنيكا عىلىمدارىنىڭ دوكتورى دىنمۇحامەد احمەت ۇلى قونايەۆتىڭ تۋعان كۇنى.

دىنمۇحامەد احمەت ۇلى قونايەۆ الماتى قالاسىندا تۋعان. 1936 -جىلى ماسكەۋدىڭ ءتۇستى مەتالل ينستيتۋتىن ءبىتىرىپ، تاۋ- كەن ينجەنەرى ماماندىعىن العان. 1937-1939-جىلدارى بالقاش مىس قورىتۋ كومبيناتىنىڭ قوڭىرات رۋدنيگىندە بۇرعىلاۋ ستانوگىنىڭ ءماشينيسى، تسەح باستىعى، رۋدنيكتىڭ باس ينجەنەرى جانە ونىڭ ديرەكتورى قىزمەتتەرىن اتقارادى. 1939-جىلدان «التايپوليمەتالل» كومبيناتى باس ينجەنەرىنىڭ ورىنباسارى، ريددەر رۋدنيگىنىڭ جانە لەنينوگور كەن باسقارماسىنىڭ ديرەكتورى قىزمەتتەرىن اتقاردى.

1942-1952-جىلدارى قازاق ك س ر مينيسترلەر كەڭەسىنىڭ ءتوراعاسىنىڭ ورىنباسارى بولىپ قىزمەت ەتتى. 1955-1960-جىلدارى قازاق ك س ر جوعارعى كەڭەسىنىڭ ءتوراعاسى بولدى. 1960-1986-جىلدارى قازاقستان كومپارتياسى ورتالىق كوميتەتىنىڭ ءبىرىنشى حاتشىسى قىزمەتىن اتقاردى. 1986 -جىلى 16- جەلتوقسان كۇنى قازاقستان ورتالىق كوميتەتىنىڭ ءبىرىنشى حاتشىلىعىنان الىنىپ، ورنىنا كولبين تاعايىندالدى. بۇعان نارازى بولعان قازاق جاستارىنىڭ كوتەرىلىسى جەلتوقسان وقيعاسىنا ۇلاستى. بىرنەشە مارتە كسرو جوعارى كەڭەسىنىڭ دەپۋتاتى بولىپ سايلاندى.

دىنمۇحامەد احمەت ۇلى قونايەۆ رەسپۋبليكا پارتيا ۇيىمىن باسقارعان شيرەك عاسىرعا جۋىق ىشىندە ءوزىنىڭ ۇلكەن مادەنيەتتىلىگىمەن، ءيمانجۇزدى ىزەتتىلىگىمەن، تانىلىپ، حالىق ءداستۇرىن جاقسى بىلەتىن، تاعىلىمى تەرەڭ، وي- ورەسى بيىك قايراتكەر، ناعىز ۇلت قايراتكەرى ەكەنىن كورسەتتى. كەيىن مەملەكەت ىسىنەن قول ۇزگەن كەزدە دە ول ءبىلىمدار بىلىكتى جان رەتىندە ەلدە ءجۇرىپ جاتقان رەفورما باعىتتارىن، قوعامدى دەموكراتيالاندىرۋ قاجەت ەكەنىن تەرەڭ ءتۇسىنىپ، قولداي ءبىلدى. دىنمۇحامەد احمەت ۇلى قونايەۆ 1993 -جىلعى تامىزدىڭ 22 سىندە، 82 جاسقا قاراعان شاعىندا كەنەتتەن قايتىس بولدى.