بۇگىن - ءۇش بىردەي وليمپيادا چەمپيونى تۋعان كۇن

استانا. KAZINFORM - ءساۋىر ايى - قازاق سپورتشىلارى ءۇشىن چەمپيوندار ايى. ولاي دەيتىنىمىزى وسى ايدا، ناقتىراق ايتساق، 4-ءساۋىر - قازاق سپورت تاريحىندا ءۇش بىردەي وليمپيادا چەمپيونىنىڭ تۋعان كۇنى.

ۆاسيلي جيروۆ

1974 -جىلى 4 ساۋىردە بالقاش قالاسىندا دۇنيەگە كەلگەن. كاسىپقوي بوكسشى، وليمپيادا ويىندارىنىڭ چەمپيونى، وكسپەن 12 جاسىنان باستاپ اينالىسا باستاعان. العاشقى باپكەرى - ۆ. ي. اپاچينسكي.

ول 1996، اتلانتا، ا ق ش-تا وتكەن وليمپيادا ويىندارىنىڭ چەمپيونى. سونىمەن قاتار وليمپيا ويىندارىندا ەڭ ۇزدىك بوكسشىعا بەرىلەتىن ۆ. باركەر كۋبوگىنىڭ يەگەرى. 1997 -جىلدان باستاپ تولىعىمەن كاسىپقوي بوكسقا اۋىستى. جيروۆ IBF ۆەرسياسى بويىنشا كاسىپقويلار اراسىنداعى الەم چەمپيونى (2000). «پاراسات» وردەنىمەن ماراپاتتالعان (1996). ءبىر كەزدەرى وليمپيادا چەمپيونى جانە باركەر كۋبوگىنىڭ يەگەرى اتانعان سپورتشى، كاسىپقوي بوكستا «بالقاشتىڭ بارىسى» دەگەن اتپەن كەڭىنەن تانىلدى.

بەكزات ساتتارحانوۆ

1980 -جىلى 4-ساۋىردە تۇركىستان قالاسىنداعى قاراپايىم وتباسىندا ومىرگە كەلدى. ول - ءۇيدىڭ كەنجەسى. اكەسى - سەيىلحان، اناسى - سىرلىكۇل. الەمدى مويىنداتقان بوكسشىنىڭ باعدات، بولات، ماقسات ەسىمدى اعالارى بار.

بەكزات ساتتارحانوۆ - سيدنەي وليمپياداسىنىڭ چەمپيونى. ول وليمپيادانىڭ فينالىندا الەم چەمپيونى، تاجىريبەلى ا ق ش بوكشىسى ريكاردۋ حۋارەسپەن جۇدىرىقتاستى. ناتيجەسىندە بەكزات قارسىلاسىن 22-14 ەسەبىمەن جەڭىپ، 20 جاسىندا وليمپيادا چەمپيونى اتانادى.

ساتتارحانوۆ 1995 -جىلى بوكستان جاسوپىرىمدەر اراسىنداعى حالىقارالىق جارىستا جەڭىسكە جەتىپ، باپكەرلەردىڭ كوزىنە تۇسەدى.

1996 -جىلى قوستانايدا وتكەن بوكستان جاستار اراسىنداعى جارىستا قازاقستان چەمپيونى اتانادى. كەيىن اناتولي ۆيزيرياكين اتتى باپكەردىڭ قاراماعىنا ءوتىپ، شىمكەنت قالاسىنداعى مەكتەپ-ينتەرناتتا جاتتىعا باستايدى.

1997 -جىلى قاراعاندى جانە كەلن (گەرمانيا) قالالارىندا وتكەن حالىقارالىق تۋرنيردە جەڭىسكە جەتەدى. سول جىلى شىمكەنتتەگى وليمپياداعا دايارلاۋ ورتالىعىنا قابىلدانادى.

1998 -جىلى بوكستان ارگەنتينادا وتكەن جاسوسپىرىمدەر اراسىنداعى الەم چەمپيوناتىندا كۇمىس جۇلدەگە يە بولادى. كەيىن قوستاناي قالاسىنداعى جارىستا 54 كەلى سالماقتا سىنعا ءتۇسىپ، مارات مازىمبايەۆتان جەڭىلىپ قالدى. بۇعان قاراماستان، بوكستان قازاقستان ۇلتتىق قۇراماسىنا قابىلدانادى.

1999 -جىلى ۆەنگريا جانە بولگاريادا وتكەن حالىقارالىق تۋرنيرلەردە جەڭىسكە جەتىپ، تاشكەنتتەگى ازيا بىرىنشىلىگىندە كۇمىس جۇلدەگە يە بولدى. ناتيجەسىندە سيدنەي وليمپياداسىنا جولداما الادى.

جالپى بەكزات اۋەسقوي بوكستا 143 جەكپە-جەك وتكىزىپ، 132 كەزدەسۋىندە جەڭىسكە جەتكەن.

وكىنىشكە قاراي، 2000 -جىلدىڭ 31-جەلتوقسان كۇنى جاڭا جىلعا 15 مينۋت قالعاندا شىمكەنت قالاسىنىڭ ماڭىنداعى تەمىرلان بەكەتىندە بەكزات ساتتارحانوۆ جول اپاتىنان قازا تاپتى.

دميتري بالاندين

1995 -جىلى 4-ءساۋىر كۇنى الماتىدا دۇنيەگە كەلگەن. ول برازيليانىڭ ريو-دە-جانەيرو قالاسىندا وتكەن XXXI وليمپيادا ويىندارىندا 200 مەترگە براسسپەن جۇزۋدەن قازاقستانعا تۇڭعىش التىن مەدال سىيلاعان سپورتشى.

سۋدا ءجۇزۋ سپورتىمەن 2003 -جىلى 8 جاسىنان باستاپ اينالىسا باستاعان. 2008-2012 -جىلدارى الماتىداعى دارىندى بالالارعا ارنالعان سپورت مەكتەپ- ينتەرناتىندا وقىعان.

ول سونىمەن قاتار 2014 -جىلعى ازيا ويىندارىنىڭ ءۇش دۇركىن چەمپيونى. 50، 100 جانە 200 مەتر بويىنشا قازاقستان رەكوردسمەنى. جۇزۋدەن قازاقستان تاريحىنداعى تۇڭعىش وليمپيادا چەمپيونى.

2015 -جىلى كۆاندجۋدا (كورەيا) وتكەن جازعى ۋنيۆەرسيادا ويىندارىندا ديستانتسياسى 100 مەتر براسپەن التىن، ال ديستانتسياسى 50 مەتر براسپەن قولا مەدالعا يە بولعان.

2016 -جىلى ريو-دە-جانەيرو وليمپياداسىندا جەڭىسكە جەتكەنى ءۇشىن، دميتري بالاندين II دارەجەلى بارىس وردەنىمەن ماراپاتتالعان.

اۆتور

كۇنسۇلتان وتارباي