بۇگىن ءبىرقاتار وڭىردە ساعات ءتىلى 60 مينۋتقا كەيىن شەگەرىلدى
استانا. KAZINFORM - قازاقستاندا ءبىرىڭعاي ۋاقىت بەلدەۋى (UTC+5) ورنادى. استانانىڭ EXPO الاڭىنداعى «نۇر الەم» سفەراسىندا ساعات ءتىلى ءبىر ساعاتقا ارتقا جىلجىدى.
«قازاقستان رەسپۋبليكاسىنىڭ اۋماعىنداعى ۋاقىتتى ەسەپتەۋ ءتارتىبى تۋرالى» ۇكىمەت قاۋلىسىنا ەنگىزىلگەن وزگەرتۋلەرگە سايكەس، استانا، الماتى، شىمكەنت قالالارى مەن اقمولا، الماتى، جامبىل، قاراعاندى، قوستاناي، پاۆلودار، سولتۇستىك قازاقستان، تۇركىستان، شىعىس قازاقستان، اباي، جەتىسۋ، ۇلىتاۋ وبلىستارىندا 29- اقپاننان 1- ناۋرىزعا قاراعان ءتۇنى (ساعات 00:00 دە) جەرگىلىكتى ۋاقىت 1 ساعاتقا ارتقا قويىلدى.
بۇگىنگى كۇنگە دەيىن قازاقستاندا UTC+5 جانە UTC+6 ەكى ۋاقىت بەلدەۋى بار. ەل اۋماعىنىڭ كوپ بولىگى (باتىس وبلىستاردى قوسپاعاندا) UTC+6 ايماعىندا ورنالاسقان.
قازاقستاندا ءبىرتۇتاس ۋاقىت بەلدەۋىن ەنگىزۋدى ۋاقىتتى ەسەپتەۋ ماسەلەسى جونىندەگى جۇمىس توبىنا كىرگەن قازاقستاندىق عالىمدار مەن ساراپشىلار ۇسىنعان بولاتىن.
جۇمىس توبى 2023-جىلدىڭ ساۋىرىندە قازاقستاندىقتاردىڭ ەڭ قولايلى ۋاقىت بەلدەۋىنە كوشۋ تۋرالى بىرنەشە مارتە بەرىلگەن وتىنىشىنە بايلانىستى قۇرىلدى.
ونىڭ قۇرامىنا عىلىمي ينستيتۋتتار، مەديتسينالىق ۋنيۆەرسيتەتتەر، ورتالىق جانە جەرگىلىكتى مەملەكەتتىك ورگانداردىڭ وكىلدەرى، پارلامەنت دەپۋتاتتارى جانە ت. ب. كىردى.
ءبىر جىل ىشىندە مەديتسينا، فيزيولوگيا، گەوگرافيا، مەترولوگيا جانە ت. ب. سالالاردى قامتيتىن جۇمىس توبىنىڭ مۇشەلەرى قازاقستاندا قولايلى ۋاقىت بەلدەۋىن بەلگىلەۋ ماسەلەسىن زەرتتەدى.
جۇمىس توبى UTC+5 ءبىرىڭعاي ۋاقىت بەلدەۋىنە كوشۋ - ەڭ دۇرىس جانە وڭتايلى جول دەپ تاپتى. بۇل رەتتە قازاقستاننىڭ كوپتەگەن ايماقتارى تابيعي ۋاقىتقا ەڭ جاقىن ۋاقىتتى پايدالاناتىن بولادى.
جۇمىس توبى حالىقارالىق تاجىريبەنى زەرتتەپ، ونىڭ بارىسىندا الەمنىڭ 175 ەلىندە ءبىرتۇتاس ساعات بەلدەۋى جۇمىس ىستەيتىنىن، ال ءبىر ساعاتتىق بەلدەۋدە نەبارى 22 مەملەكەت تۇراتىنىن انىقتادى.
بۇعان دەيىن ۋاقىت بەلدەۋىنىڭ وزگەرۋىنە قالاي بەيىمدەلۋ كەرەكتىگى حابارلانعان بولاتىن. پويىز بەن ۇشاقتى جىبەرىپ الماۋ تۋرالى ۇسىنىستار دا ايتىلدى.
سيفرلىق دامۋ مينيسترلىگى قازاقستاندىقتار ءۇشىن گادجەتتەر مەن كومپيۋتەردى جاڭارتۋ جانە جاڭا ۋاقىت بەلدەۋىنە ۋاقتىلى كوشۋ بويىنشا امبەباپ نۇسقاۋلىق دايىنداعان ەدى.
