بۋىن-بۋىنىم سىرقىراسا دا، قۋىرشاق توقۋ ۇنايدى - توقىماشى
اقتوبە وبلىسى ويىل اۋدانىندا تۇراتىن گۇلسىم ەلەكبايەۆا - ەرەكشە جان. ول وسىدان 20 جىلدان استام ۋاقىت بۇرىن ارباعا تاڭىلسا دا قولىنان سىم، ىلمەك پەن ءجىبىن تاستاعان ەمەس. بۋىن-بۋىنى سىرقىراسا دا قۋىرشاق، ءتۇرلى كيىم توقىپ، كاسىپ تە اشتى. گۇلسىم ەلەكبايەۆا Kazinform تىلشىسىنە ەڭبەك پەن تاباندىلىقتىڭ ادامعا قۋانىش سىيلايتىن ساتتەرىن ايتىپ بەردى.
ەلەكبايەۆا گۇلسىم سامات قىزى - رۋحى مىقتى كاسىپكەر. ول مەكتەپ بىتىرگەن سوڭ بۋىن اۋرۋىنا شالدىعىپ، دارىگەرلەر پوليارتريت دياگنوزىن قويعان. سول ساتتەن باستاپ ءتۇرلى ەم قابىلداپ، ءومىر ءۇشىن كۇرەسىپ كەلەدى. ءار تاڭدا اياق-قولىن جازىپ، ءتۇرلى جاتتىعۋ جاساۋعا ءماجبۇر دە بولدى. دارىگەرلەر قولدى قيمىلداتۋ، ساۋساقتاردى يكەمگە كەلتىرۋ كەرەك دەگەن سوڭ بالا كۇنگى قىزىعۋشىلىعى ەسىنە ءتۇسىپ، قولىنا قايتا ىلمەك پەن ءجىپ الدى. الدىمەن ءۇي ىشىندەگى تۋىستارىنا كيىم توقىپ، كەيىن كوپشىلىكتەن تاپسىرىس قابىلداي باستادى.
«2009 -جىلى قىزىما جەڭسىز جيلەت، باس كيىم، شۇلىق توقىپ، كوپشىلىك قىزىعۋشىلىعى تۋدى. كەلىنىمە جەڭسىز جيلەت توقىپ ەدىم، مەكتەپكە بارعاندا مۇعالىمدەر قىزىعىپ، تاپسىرىس تۇسە باستادى. ءسويتىپ ءبىر جىل بويى باس كيىم، جەڭسىز جيلەت توقىدىم. ال اۋدان ورتالىعىنا قونىس اۋدارعان سوڭ بالالارعا كروسسوۆكا، شۇلىق توقىدىم. ءبىر- ەكى جىل سونىمەن اينالىستىم. 2016 -جىلى اقتوبە قالالىق سال اۋرۋىنا شالدىققان ازاماتتاردى قولداۋ ورتالىعىنىڭ ءتورايىمى قۇرالاي بايمەنوۆا مەنى كورمە- بايقاۋعا قاتىسۋعا شاقىردى. دايىندالىپ، جۇمساق مىسىق ويىنشىعىن، قىزعالداق، كىشكەنتاي قىزدارعا كويلەك توقىپ، ەكىنشى ورىن الدىم»، - دەدى ول.
كاسىپ اشۋ يدەياسىن ويىل اۋدانى كوپتوعاي اۋىلدىق وكرۋگىنىڭ اكىمى عاليا اميروۆا ورتاعا تاستاعاندا جۇرەكسىنگەنىمەن، بىردەن قابىلدايدى. ءسويتىپ بىلىكتىلىگىن ارتتىرادى، ءتۇرلى گرانت الۋعا قۇجات جينايدى.
«ءوزىم بالا كەزدەن سىم، ىلمەكپەن توقىما توقيمىن. 2011 -جىلى اۋىلدا وتىرىپ، كاسىپ باستادىم. 2012 -جىلى دامۋ قورىنىڭ 100 مىڭ تەڭگە گرانتىن جەڭىپ الدىم. ول كەزدە بۇل كوپ اقشا ەدى. 2012 -جىلعا دەيىن ويىل اۋدانى شۇبارشي اۋىلىندا تۇردىم. سول 2012 -جىلى دەنساۋلىعىما بايلانىستى اۋدان ورتالىعىنا كوشىپ كەلدىم. سودان باستاپ ويىلدىڭ قوعامدىق، مادەني شاراسىنا ارالاستىم. كورمەلەرگە شىعىپ، بۇيىمدارىمدى ۇسىندىم. العاشىندا بالالارعا شۇلىق، قولعاپ توقيتىن ەدىم. مەتيس قويدىڭ ءجۇنىن ءتۇتىپ، يىرەتىن ەدىم. كەيدە ەشكىنىڭ ءتۇبىتىن دە پايدالانىم. جاڭا، ءبىراق سىيماي قالعان قالىڭ توقىما كيىمدەردىڭ ءجىبىن دە پايدالانعان كۇنىم بولدى. ال گرانت ۇتىپ العان سوڭ ءجىپ ساتىپ الدىم. 2017 -جىلعا دەيىن كۇز، قىس، كوكتەم ايلارىندا ءتۇرلى تاپسىرىس قابىلداپ، بالالارعا شۇلىق، قولعاپ توقىدىم. 2017 -جىلدىڭ كۇزىنەن باستاپ ويىنشىق توقىدىم. 2019 -جىلى رۋحاني جاڭعىرۋ باعدارلاماسى اياسىندا وبلىس اۋداندارى اراسىندا شەبەرلەر جارىسى ءوتتى. وندا مەن ءۇشىنشى ورىن، 20 مىڭ تەڭگە سەرتيفيكاتىن الدىم. سودان ويىنشىق توقۋ ءبىر جولعا قويىلدى. سول جىلى بيزنەس باستاۋ باعدارلاماسىن وقىپ، 700 مىڭ تەڭگە گرانت تا الدىم. بۇرىن جەكە كاسىپكەر رەتىندە تىركەۋلى تۇرعان ەدىم، ونى جاۋىپ، مارحابات جەكە كاسىبىن اشتىم. 2021 -جىلى قايىرىمدىلىق كەرۋەنى جوباسىنا قاتىسىپ، اسار نوميناتسياسى بويىنشا ەكىنشى ورىن الدىم. ەرەكشە بالالار ءتالىم الاتىن مەيىرىم ءۇيى مەن ارنايى مەكتەبىنە جۇمساق ويىنشىقتار سىيلاپ ەدىم. ەڭبەگىم ەلەۋسىز قالمادى. سول جىلى جەلتوقساندا اۋدان اكىمى دە ماراپاتتادى. 2022 -جىلى «اسقار شىڭعا تۋ تىككەن اۋىل ايەلدەرى» دەگەن كىتاپقا ەندىم»، - دەيدى گۇلسىم سامات قىزى.
قازىرگى كەزدە جەكە كاسىپكەردىڭ قورجىنى قوماقتى. ول ءتۇرلى ەرتەگى كەيىپكەرلەرىن اينىتپاي توقيدى، كەيدە جاڭا جىل كەيىپكەرىن تاپسىرىسپەن دايىنداپ بەرەدى. ماسەلەن، بيىل قوياندى توقىسا، ەندى ۇلۋ. كوپ ۇلگىنى، كەڭەستى ينتەرنەت ارقىلى قاراپ، ۇيرەنەدى. كەيدە ءوز شەبەرلىگىن، وي ەركىندىگىن قۇپ كورەدى.
«مەنىڭ تاپسىرىس بەرۋشىلەرىم - تانىستارىم، تۋىستارىم. كەيدە الەۋمەتتىك جەلى ارقىلى دا تاپسىرىس تۇسەدى. پوشتا ارقىلى جامبىلعا اياق كيىم جىبەرگەنمىن. ءوزىم توقىماشىلاردىڭ رەسپۋبليكالىق چاتىندا وتىرمىن. وندا كوپ ادام بار. ەرەكشە جان ءوزىم عانا. سونىمەن بىرگە اقتوبەنىڭ قولونەر شەبەرلەرى دە ءبىر چاتتا وتىر. ءوزىم «كومەكشى اجە» دەگەندى توقىدىم. بارلىعى 6 ادام تاپسىرىس بەردى. الماتى، قاراعاندى، جەزقازعانعا پوشتامەن جىبەرەمىن. توقىعان دوبىمدى ا ق ش-قا جونەلتتىم. بۇل دا جاقسى تاپسىرىس. ۇلكەن قۋىرشاقتار توقۋعا تاپسىرىس تۇسەدى، ءبىراق قولىم يكەمگە كەلمەي قينالامىن. سوندىقتان شاعىنىن توقيمىن. ەڭ ۇلكەنىنىڭ بويى 55 س م بولدى. ساپاسى ۇنايدى ادامدارعا. ويىلدا مەن توقىعان قۋىرشاقتى ساتىپ العان اپا قىزىنىڭ 4-سىنىپتا ونى ءالى قۇشاقتاپ جاتاتىنىن ايتتى. بۇل - زور قۋانىش، قۇرمەت»، - دەدى ول.
گۇلسىم سامات قىزى وڭىردەگى قوعامدىق شارالارعا بەلسەندى قاتىسادى. ول - «ۇكىلى ءۇمىت» كلۋبىنىڭ مۇشەسى. اۋداننىڭ قوعامدىق كەڭەسىنىڭ قاتارىندا بار. ونىڭ بار يدەياسىن جەرگىلىكتى بەلسەندىلەر دە قولداپ، كومەكتەسىپ وتىرادى. كەيىپكەرىمىز ءسوز اراسىندا ايسۇلۋ كەنەسارى قىزىنا، اقمارال سابىرجان قىزىنا دەگەن ىقىلاسىن ءبىلدىردى. سەبەبى، وقۋشىلارمەن، ستۋدەنتتەرمەن كەزدەسۋلەر بولسا دا بۇل ادامدار جانىنان تابىلادى.
«قازىر دەنساۋلىعىما بايلانىستى قولىما ينە-ءجىپ ۇستاي الماي قالىپ ءجۇرمىن. اۋىرماي-سىرقاماي ءىسىمدى جالعاستىرسام دەگەن ويىم بار. ۇيرەتكىم دە كەلەدى. ءبىراق قازىرگى بالالار تەلەفوندا وتىرادى. بالانىڭ ءوز قىزىعۋشىلىعى بولماسا ون جەردەن توپەلەپ ۇيرەتسەڭ دە ۇيرەنبەيدى عوي. كوللەدجگە دە بارىپ، شەبەرلىك ساباعىن وتكىزدىم. ءبىر-ەكى ستۋدەنت حابارلاسامىز دەپ ەدى، ءبىراق كەلمەدى. ەشقانداي قىزىعۋشىلىق جوق. جاقىندا وقۋشىلارمەن كەزدەسۋ وتكىزىپ، قازاقتىڭ ويۋ-ورنەگى تۋرالى ايتىلدى. مەن اياق كيىمگە ويۋ سالۋدى ۇيرەتىپ، شەبەرلىك ساباعىن وتكىزدىم. ءبىر بالا شىقپادى ۇيرەنەتىن»، - دەپ قىنجىلدى شەبەر.
گۇلسىم ەلەكبايەۆانى اقتوبەدەگى ءجىپ ساتاتىن دۇكەن يەلەرى جاقسى تانيدى. كەيدە ءوزى، كەيدە باۋىرلارى بارىپ، ءتۇرلى ءجىپ ساتىپ الادى. ول ەڭبەكتىڭ بار قيىندىقتى جەڭۋگە كۇش بەرەتىنىن تاعى ءبىر مارتە ايتىپ بەردى.
«قازاقتا «جۇرگەنگە جورگەم ىلىنەدى»، «ولمەگەنگە ءولى بالىق جولىعادى» دەگەن بار. ادامنىڭ قولىنان كەلمەيتىنى جوق. تەك نيەت بولۋى كەرەك. ماقسات قويۋ كەرەك، ارمانداۋ كەرەك. ماقساتىڭ ايقىن بولسا، ارماندار ورىندالادى. دەنى ساۋ ادامنىڭ ساناسىندا بولۋى كەرەك ءبارى. ساناسىندا ەڭبەك ەتۋ دەگەن بولسا، قازىر ەكى قولعا ءبىر كۇرەك تابىلادى. قازىر ءوزىم اياق كيىم توقىپ جاتىرمىن. ويىنشىققا تاپسىرىس ءتۇسىپ تۇر، اتتەڭ، دەنساۋلىعىما بايلانىستى جۇمىس كىدىرىپ تۇر. دەنساۋلىعىم سىر بەرگەن كەزدە ءوزىم توقتاتىپ قويامىن. ادامدار ونى تۇسىنەدى. بۋىن- بۋىنىم سىرقىراسا دا قۋىرشاق توقۋ ماعان ۇنايدى»، - دەدى ول.
