بۇگىن ازيا ويىندارىنىڭ جابىلۋ سالتاناتى وتەدى

 بۇگىن قىتايدىڭ حاڭجوۋ قالاسىندا ءوتىپ جاتقان ازيا ويىندارىنىڭ جابىلۋ سالتاناتى وتەدى، دەپ حابارلايدى قازاقپارات ءتىلشىسى. 

ازيا ويىندارىنىڭ جابىلۋ سالتاناتى ەلوردا ۋاقىتىمەن 18.00-گە بەلگىلەنگەن.

ءدۇبىرلى دودا بيىل 23-قىركۇيەك پەن 8-قازان ارالىعىندا ءوتتى.

سايىستار 51 جارىس الاڭىندا وتكىزىلدى. بۇل ماقساتتا 14 جاڭا كەشەن سالىندى. كوپتەگەن سپورت تۇرىنەن جارىستى حاڭجوۋ قابىلدادى. ال كەيبىر جارىستار دەتسين، جينحۋا، نينبو، شاوسين مەن ۆەنجوۋ سىندى شاعىن قالالاردا بولدى.

ءدۇبىرلى دودادا ازيا وليمپيادا كەڭەسى (ا و ك) قۇرامىنداعى 45 ەلدەن 12500 دەن استام سپورتشى كەلگەنىن اتاپ ءوتتى. بۇل - رەكوردتىق كورسەتكىش. 2018 -جىلى يندونەزيادا وتكەن ازيادادا 11300 ادام تىركەلىپ، جاڭا رەكوردتىق كورسەتكىش ورناعان ەدى.

جازعى ازيا ويىندارىندا 8 سپورت تۇرىنەن پاريج وليمپياداسىنا جولداما بەرىلدى. باسەكەدە 40 سپورت تۇرىنەن جۇلدەلەر ساراپقا سالىندى.

قازىرگە دەيىن ەل قۇراماسى 79 مەدال (10 التىن، 21 كۇمىس، 48 قولا) الدى. ازىرگە جالپى كوماندالىق ەسەپتە 9-ورىندا تۇر.

قازاقستاندىق سپورتشىلار بيىل سەگىزىنشى مارتە ازيا ويىندارىنا قاتىسىپ وتىر. بۇعان دەيىن جالپى كوماندالىق ەسەپتە - 4 (77 مەدال: 25 التىن، 26 كۇمىس، 26 قولا)، 1998 -جىلى - 5 (78 مەدال: 24 التىن، 24 كۇمىس، 30 قولا)، 2002 -جىلى - 4 (76 مەدال: 20 التىن، 26 كۇمىس، 30 قولا)، 2006 -جىلى - 4 (85 مەدال: 23 التىن، 20 كۇمىس، 42 قولا)، 2010 -جىلى - 5 (79 مەدال: 18 التىن، 23 كۇمىس، 38 قولا)، 2014 -جىلى - 4 (84 مەدال: 28 التىن، 23 كۇمىس، 33 قولا)، 2018 -جىلى - 9 (76 مەدال: 15 التىن، 17 كۇمىس، 44 قولا) ورىن الدى.

ايتا كەتەيىك، كاراتەشى قىز ءمولدىر جاڭبىرباي بۇگىن ازيا ويىندارىنىڭ كۇمىس جۇلدەسىن جەڭىپ الدى.

ەندى 2026 -جىلعى ازيا ويىندارى جاپونيانىڭ ناگويا قالاسىندا وتكىزىلەدى.