بۇگىن ازيا ويىندارىندا قازاقستان قۇراماسىنىڭ ەكى بوكسشىسى جەكپە-جەك وتكىزەدى

 بۇگىن، 3-قازاندا قازاقستاننىڭ ەكى بوكسشىسى حاڭجوۋدا (قىتاي) ءوتىپ جاتقان ازيا ويىندارىنىڭ فينالىنا شىعۋ ءۇشىن جەكپە-جەك وتكىزەدى. 

Бокс
Фото: Фото: Olympic.kz

قازاقپارات بۇل تۋرالى Sports.kz سايتىنا سىلتەمە جاساپ حابارلايدى.

اسلانبەك شىمبەرگەنوۆ كۇندىزگى سەسسيادا ونەر كورسەتەدى. وتانداسىمىز 71 كەلىگە دەيىنگى سالماقتاعى جارتىلاي فينالدا جاپوندىق سيەۆون وكادزاۆامەن جۇدىرىقتاسادى. جەكپە-جەك استانا ۋاقىتىمەن 14:15-تە باستالادى.

ال كەشكى سەسسيادا قامشىبەك قوڭقابايەۆ شارشى الاڭعا شىعادى. ول 92 كەلىدەن جوعارى سالماقتاعى جارتىلاي فينالدىق جەكپە-جەگىن ءۇندىستاندىق نارەندەرمەن وتكىزەدى. جەكپە-جەك استانا ۋاقىتىمەن ساعات 19:00-دە باستالادى.

قازاق بوكسشىلارى قاتىساتىن ەكى جەكپە- جەكتىڭ تىكەلەي ترانسلياتسياسىن Qazsport تەلەارناسىنان كورۋگە بولادى.

ازيا ويىندارىنىڭ فينالىنا شىعۋ اسلانبەك شىمبەرگەنوۆ پەن قامشىبەك قوڭقابايەۆقا 2024 -جىلى پاريجدە (فرانسيا) وتەتىن وليمپيادا ويىندارىنا قاتىسۋ ليتسەنزياسىنا اۆتوماتتى تۇردە كەپىلدىك بەرەتىنىن ايتا كەتۋ كەرەك.

حاڭجوۋداعى ازيا ويىندارىنىڭ بوكستان ەرلەر اراسىنداعى تۋرنيرىندە بارلىق سالماق دارەجەسىندە فينالعا شىققاندار وليمپيادا ليتسەنزياسىن الادى.

سوڭعى جاڭالىقتار