بۇگىن الماتىدا تەرروريزمگە قارسى وقۋ-جاتتىعۋ وتەدى

الماتى. KAZINFORM - ءىس-شارا كەزىندە مەترو پويىزدارىنىڭ قوزعالىسىنا شەكتەۋ قويىلمايدى.

الماتى قالاسى تەرروريزمگە قارسى جەدەل شتابىنىڭ مالىمەتىنشە، بۇگىن 22- مامىر كۇنى بەلارۋس كوشەسى، 15 مەكەنجايىندا ورنالاسقان الماتى مەتروپوليتەنى دەپوسىنىڭ اۋماعىندا ساعات 09:00 دەن 17:00 گە دەيىن جوسپارلى انتيتەررورلىق وقۋ-جاتتىعۋلار وتەدى.

وقىتۋدىڭ ماقساتى - ادام كوپ شوعىرلانعان جەرلەردە تەرروريستىك قاۋىپ- قاتەر تۋىنداعان كەزدە ءوزارا ارەكەتتەسۋ داعدىلارىن ماشىقتاندىرۋ.

- قاۋىپسىزدىك شارالارىن ساقتاۋدى جانە مەملەكەتتىك قىزمەتكەرلەردىڭ زاڭدى تالاپتارىن ورىنداۋدى سۇرايمىز. سونداي-اق رەسمي اقپارات كوزدەرىن باسشىلىققا الىپ، جالعان اقپاراتتىڭ تارالۋىنا جول بەرمەۋگە شاقىرامىز، - دەلىنگەن حابارلامادا.

سونىمەن قاتار، اكىمشىلىك قۇقىق بۇزۋ كودەكسىنىڭ 443-بابىنا سايكەس، قوعامدىق ءتارتىپتى قامتاماسىز ەتۋگە قاتىساتىن ادامنىڭ زاڭدى تالابىنا باعىنباۋ اكىمشىلىك جاۋاپقا اكەلىپ سوقتىراتىنىن ەسكەرۋ قاجەت.

وسىعان دەيىن جوسپارلى انتيتەررورلىق وقۋ-جاتتىعۋ الماتى حالىقارالىق اۋەجايىنىڭ اۋماعىندا وتكەن بولاتىن.