بۇگىن الماتىدا قالىڭ قار جاۋادى: تۇرعىندارعا ەسكەرتۋ جاسالدى

الماتى. KAZINFORM - الماتىدا سارسەنبى كۇنى، ياعني 8-قاڭتار كۇنى قار جاۋىپ، تۇمان جانە كوكتايعاق بولادى.

وسىعان بايلانىستى الماتىنىڭ كوممۋنالدىق قىزمەتى كۇشەيتىلگەن جۇمىس رەجيمىنە كوشتى.

«قازگيدرومەت» ر م ك-نىڭ مالىمەتىنشە، 8-اڭتار كۇنى تۇندە جانە تاڭەرتەڭ قالادا قاردىڭ قالىڭدىعى 9 م م-گە دەيىن جەتىپ، كوكتايعاق بولۋى مۇمكىن. اۋا تەمپەراتۋراسى تۇندە 5-…-7 گرادۋسقا دەيىن تومەندەپ، كۇندىز 2-…0 گرادۋس شاماسىندا بولادى.

7-قاڭتار كۇنى 438 ارنايى تەحنيكا مەن 968 جۇمىسشى دايىندالدى. 2024-2025 -جىلدارى قىسقى ماۋسىم باستالعالى بەرى 220 مىڭ تەكشە مەتر قار شىعارىلدى.

جولدى ۋاقىتىلى ءارى ءتيىمدى تازارتۋ ءۇشىن كوممۋنالدىق ينفراقۇرىلىمدى دامىتۋ باسقارماسى قالا تۇرعىندارىنا مىناداي ەسكەرتۋ جاسايدى:

- اۆتوكولىكتەردى، اسىرەسە تۇنگى ۋاقىتتا، جول جيەگىندە قويماۋعا.

- جولدار مەن اۆتوتۇراقتار بويىنا ورناتىلعان ەسكەرتۋ كونۋستارىنا نازار اۋدارۋعا.

- قار شىعارۋ جۇمىستارى تاۋلى جانە تاۋ بوكتەرىندەگى اۋدانداردا ەرەكشە نازارعا الىنىپ، قار كۇرەۋ جۇمىستارى بەلسەندى جۇرگىزىلەدى.

ماماندار، كوكتايعاققا بايلانىستى كولىك جۇرگىزۋشىلەرىنەن جىلدامدىق رەجيمى مەن كولىكتەر اراسىنداعى قاشىقتىقتى ساقتاۋ جانە قار شىعارۋ تەحنيكاسى جۇمىس ىستەپ جاتقان اۋماقتاردا كولىك قويماۋعا شاقىرادى.

- جاياۋ جۇرگىنشىلەر جولدان وتكەندە، اسىرەسە كوشە دۇرىس كورىنبەي قالعان كەزدە جانە جول تايعاق بولعان جاعدايدا، اسا ساق بولعانى ءجون، - دەپ اتاپ ءوتتى الماتىنىڭ كوممۋنالدىق ينفراقۇرىلىمدى دامىتۋ باسقارماسىنان.