بىلتىرعى بيۋجەت ەسەبىنە 14 دەپۋتاتتىڭ كوڭىلى تولماي، قارسى داۋىس بەردى
استانا. KAZINFORM - پارلامەنت پالاتالارىنىڭ بىرلەسكەن وتىرىسىندا دەپۋتاتتار ۇكىمەتتىڭ 2023-جىلعى رەسپۋبليكالىق بيۋجەتتىڭ اتقارىلۋى تۋرالى ەسەبى مەن جوعارى اۋديتورلىق پالاتانىڭ قورىتىندىسىن قابىلدادى.

تالقىلاۋ كەزىندە سەنات دەپۋتاتتارى، ءماجىلىستىڭ «اۋىل»، Respublica, Amanat پارتيالارىنىڭ فراكسيالارى ۇكىمەت ەسەبىن بەكىتۋدى قولدادى.
ال «قازاقستان حالىق پارتياسىنىڭ»، «اقجول» پارتياسىنىڭ فراكسيالارى ەسەپتى قابىلداۋدان باس تارتاتىنىن ءمالىم ەتتى.
جالپىۇلتتىق سوتسيال-دەموكراتيالىق پارتيا فراكسياسى داۋىس بەرۋدەن قالىس قالدى.
داۋىس بەرۋگە قاتىسقان دەپۋتاتتاردىڭ ىشىندە ءماجىلىستىڭ 14 دەپۋتاتى ۇكىمەت ەسەبىن قابىلداۋدان باس تارتىپ داۋىس بەردى.
قارجى ءمينيسترى ءمادي تاكيەۆتىڭ ايتۋىنشا، 2023-جىلى جالپى ىشكى ءونىم 5,1 پايىز وسكەن. جىلدىق ينفلياتسيا دەڭگەيى 2 ەسە تومەندەپ، 9,8 پايىز كولەمىندە تۇراقتالعان.
جالپى بيۋجەت تاپشىلىعى 3,1 تريلليون تەڭگە نەمەسە جالپى ىشكى ءونىمنىڭ 2,6 پايىزىنا تەڭ بولعان.
مەملەكەتتىك بورىش 27,2 تريلليون تەڭگە نەمەسە جالپى ىشكى ءونىمنىڭ22,8 پايىزىنا جەتكەن.
رەسپۋبليكالىق بيۋجەتتىڭ كىرىس جوسپارى 99,9 پايىز ورىندالىپ، بيۋجەتكە 19 تريلليون تەڭگە تۇسكەن. ال شىعىس جوسپارى 99,6 پايىز اتقارىلىپ، 22,4 تريلليون تەڭگە بولعان.
يگەرىلمەگەن قاراجات - 73 ميلليارد تەڭگە.
ۇلتتىق قوردىڭ اكتيۆتەرى 13,4 پايىز ۇلعايىپ، 60 ميلليارد دوللارعا جەتكەن. بيۋجەت قاراجاتىن ءتيىمسىز پايدالانۋ كولەمى 489 ميلليارد تەڭگە بولعان.