بىلتىر وزبەكستانداعى قازاق قالامگەرلەرىنىڭ 20 عا جۋىق كىتابى جارىققا شىقتى
تاشكەنت. KAZINFORM - تاشكەنت قالاسىندا وزبەكستان جازۋشىلار وداعىنا قاراستى قازاق ادەبيەتى كەڭەسىنىڭ ەسەپ بەرۋ وتىرىسى ءوتتى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
جيىنعا كەڭەس ءتوراعاسى، مۇشەلەرى مەن وزبەكستانداعى بەلگىلى قازاق قالامگەرلەرى قاتىستى. ونىڭ بارىسىندا بىلتىر اتقارىلعان جۇمىستار قورىتىندىلانىپ، قازاق-وزبەك ادەبي بايلانىستارىن نىعايتۋ مۇمكىندىكتەرى تالقىلاندى.
- بىلتىر وزبەكستانداعى قازاق قالامگەرلەرىنىڭ 20 عا تارتا كىتابى جارىق كوردى. ەڭبەكتەردىڭ تەڭ جارتىسى قازاقستانداعى باسپالاردىڭ كومەگىمەن جاريالاندى. سونداي-اق ءبىرقاتار قازاق جازۋشىسىنىڭ شىعارماسى وزبەكستاندا باسىلىپ شىقتى. بۇل ەكى ەل اراسىنداعى ادەبي بايلانىستاردىڭ تەرەڭدەي تۇسكەنىن ايعاقتاپ وتىر، - دەدى قازاق ادەبيەتى كەڭەسىنىڭ ءتوراعاسى ءتۇرسىنالى احمەتوۆ.
2024-جىلى وزبەكستانداعى قازاق قالامگەرلەرى ابدۋللا رۇستەموۆتىڭ «قايران دۇنيە»، ساپاربەك يمانبەكوۆتىڭ «دوستارىمىز جىرلايدى» اتتى ەڭبەكتەرى جاريالاندى. سونىمەن قاتار جاراسقان مىرزامۇراتوۆتىڭ «اقيقاتتىڭ ءدامى اششى» جانە لولا ءجۇنىس قىزىنىڭ «قاراسۋ جىرلارى» كىتاپتارى باسىلىپ شىقتى.
- «وتانداستار» قورى مەن قازاقستان جازۋشىلار وداعى ۇيىمداستىرعان «ۇلى دالا» حالىقارالىق بايقاۋىندا جاراسقان مىرزامۇراتوۆ پەن لولا ءجۇنىس قىزى جەڭىمپاز اتاندى. مۇنى وزبەكستانداعى قازاق قالامگەرلەرىنىڭ جەتىستىگى دەپ سانايمىز. اتالعان ەكى جازۋشى وزبەكستان جازۋشىلار وداعىنىڭ مۇشەسى اتاندى. سونداي-اق اقىن قوشقارباي بايجىگىتوۆ تە وداقتىڭ مۇشەلىگىنە ءوتتى، - دەدى ءتۇرسىنالى احمەتوۆ.
بۇگىندە كورشىلەس مەملەكەتتە قولىنا قالام ۇستاعان 70 كە جۋىق قانداسىمىز بار، سولاردىڭ 13 ءى - وزبەكستان جازۋشىلار وداعىنا مۇشە.
ولار كوبىنە كوركەم اۋدارما، پوەزيا باعىتتارىندا جەمىستى ەڭبەك ەتىپ كەلەدى. بۇل رەتتە بىلتىر وزبەكستانداعى قازاق ادەبيەتى كەڭەسىنىڭ ءتوراعاسى ءتۇرسىنالى احمەتوۆ قازاقستان جازۋشىلار وداعىنىڭ مۇشەسى كۋالىگىن الدى.
ايتا كەتەيىك، وزبەكستانداعى قانداس قالامگەرلەردىڭ ەڭبەكتەرى وسى مەملەكەتتەگى قازاق مەكتەپتەرىنە تاراتىلادى.
