بىلتىر تۇركيانىڭ تۋريزمنەن تۇسكەن تابىسى رەكوردتىق كورسەتكىشكە جەتتى
استانا. قازاقپارات - 2024 -جىلى تۇركيانىڭ تۋريزمنەن تۇسەتىن كىرىسى جىلدىق ماندە 8,3 پايىزعا ءوسىپ، 61,1 ميلليارد ا ق ش دوللارىنا جەتتى، دەپ جازادى شينحۋا.

بۇل تۋرالى جۇما كۇنى تۇرىك ستاتيستيكا ينستيتۋتى حابارلادى.
- تۋريزمنەن تۇسەتىن تۇسىمدەر ورتا مەرزىمدى باعدارلامانىڭ نىسانالى كورسەتكىشتەرىنەن اسىپ، 2024 -جىلدىڭ قورىتىندىسى بويىنشا 61,1 ميلليارد ا ق ش دوللارىن قۇراپ، ءبىزدىڭ تاريحىمىزداعى ەڭ جوعارى دەڭگەيگە جەتتى، - دەپ جازدى X الەۋمەتتىك جەلىسىندە رەسپۋبليكانىڭ ۆيتسە-پرەزيدەنتى دجيەۆدەت يىلماز.
ونىڭ ايتۋىنشا، وتكەن جىلى تۇركياعا بارلىعى 62,2 ميلليون تۋريست كەلگەن. بۇل كورسەتكىش تە بيلىكتىڭ بولجامىنان اسىپ تۇسكەن كورىنەدى.
ۆيتسە-پرەزيدەنت اتاپ وتكەندەي، ەندى تۇركيا ۇكىمەتى تۋريزمنەن 63,6 ميلليارد دوللار تابىس تابۋدى جوسپارلاپ، 2025 -جىلى وسى وڭ ديناميكانىڭ ساقتالۋىن كۇتۋدە.
رەسمي ستاتيستيكاعا سايكەس، تۋريستىك كىرىستىڭ شامامەن 17 پايىزى ەلگە ساپارمەن كەلگەن رەزيدەنت ەمەس تۇرىك ازاماتتارىنان تۇسكەن. بۇل رەتتە تۋريزمنەن تۇسەتىن تۇسىمدەردىڭ جالپى كولەمىنىڭ 43,9 ميلليارد ا ق ش دوللارى ساياحاتشىلاردىڭ جەكە شىعىندارى قۇراعان. ال پاكەتتىك تۋرلارعا ولار شامامەن 17,4 ميلليارد ا ق ش دوللارىن جۇمساعان.
بۇدان بۇرىن تۇركيا جاسوسپىرىمدەردىڭ الەۋمەتتىك جەلىنى پايدالانۋىنا شەكتەۋ ەنگىزگەنىن حابارلاعان ەدىك.