بىلتىر قازاقستاننىڭ يوردانيامەن تاۋار اينالىمى 6 ميلليون دوللاردى قۇرادى
استانا. KAZINFORM - قازاقستان مەن يوردانيا اراسىنداعى ەكونوميكالىق ىنتىماقتاستىق ارتادى، دەپ حابارلايدى ۇكىمەتتىڭ باسپا ءسوز قىزمەتى.
اممان قالاسىندا قازاقستان رەسپۋبليكاسى پرەمەر-ءمينيسترىنىڭ ورىنباسارى - ۇلتتىق ەكونوميكا ءمينيسترى نۇرلان بايبازاروۆ پەن يوردانيا حاشيميت كورولدىگىنىڭ ونەركاسىپ، ساۋدا جانە جابدىقتاۋ ءمينيسترى يارۋب ءال- كۋدتىڭ بىرلەسكەن توراعالىعىمەن ساۋدا-ەكونوميكالىق جانە مادەني-گۋمانيتارلىق ىنتىماقتاستىق جونىندەگى قازاقستان-يوردانيا ۇكىمەتارالىق كوميسسياسىنىڭ 5-وتىرىسى ءوتتى.
ەكى ەلدىڭ دەلەگاتسيا وكىلدەرى ساۋدا جانە ينۆەستيتسيا، اۋىل شارۋاشىلىعى، ەنەرگەتيكا، كولىك، تۋريزم، دەنساۋلىق ساقتاۋ، مادەنيەت جانە ءبىلىم بەرۋ سالالارىنداعى ىنتىماقتاستىقتى، سونداي-اق سيفرلاندىرۋ سالاسىنداعى تاجىريبە الماسۋ ماسەلەلەرىن تالقىلادى.
2023-جىلدىڭ قورىتىندىسى بويىنشا قازاقستاننىڭ يوردانيامەن تاۋار اينالىمى 4,2 ەسەگە ءوسىپ، $6 ميلليوندى قۇرادى. سونىمەن بىرگە بىرلەسكەن كوميسسيانىڭ ءتوراعالارى تاۋار اينالىمىن ودان ءارى ءوسىرۋ ءۇشىن قولدا بار الەۋەتتى اتاپ ءوتتى.
ەكسپورتتىق تاۋار ءتىزىلىمىن كەڭەيتۋ ماقساتىندا قازاقستان بيداي مەن اۋىل شارۋاشىلىعى ونىمدەرىنىڭ باسقا دا تۇرلەرىن قوسقاندا، 15 تاۋار پوزيتسياسى بويىنشا يوردانيا نارىعىنا شيكىزاتتىق ەمەس تاۋارلاردى جەتكىزۋدى ارتتىرۋعا دايىن.
بۇل رەتتە قازاقستان يوردانيالىق كومپانيالاردىڭ ەلىمىزدىڭ اۋماعىندا ەت، استىق، بۇرشاق جانە باسقا دا ونىمدەر وندىرەتىن كاسىپورىنداردى قۇرۋعا قاتىسۋعا مۇددەلى.
يوردانيا تاراپى قازاقستاندىق استىقتى بالامالى كولىك جولدارى، ونىڭ ىشىندە كاسپيي تەڭىزى ارقىلى يمپورتتاۋعا جوعارى قىزىعۋشىلىق تانىتتى. قازاقستان ءوز تاراپىنان تاۋارلاردى يوردانيا نارىعىنا جانە MENA مەملەكەتتەرى (تاياۋ شىعىس جانە سولتۇستىك افريكا ەلدەرى) نارىقتارىنا ەكسپورتتاۋ ءۇشىن اكابا پورتىنىڭ الەۋەتىن پايدالانۋعا مۇددەلى.
تۋريزمدى دامىتۋعا جانە ەكونوميكالىق بايلانىستاردى نىعايتۋعا ىقپال ەتەتىن يوردانيا اۋە كومپانيالارىنىڭ قازاقستانعا تىكەلەي رەيستەردى اشۋ ءۇشىن «اشىق اسپان» رەجيمىن قولدانۋ ماسەلەسىن تالقىلاۋ ماڭىزدى قادام بولدى.
تاراپتار ۋراندى قوسقاندا، گەولوگيالىق بارلاۋ جانە پايدالى قازبالاردى ءوندىرۋ سالاسىنداعى بىرلەسكەن جوبالاردى ىسكە اسىرۋ پەرسپەكتيۆالارىن اتاپ ءوتتى. يوردانيانىڭ مەملەكەتتىك ۋران كومپانياسىمەن (JUMCO) «قازاتومونەركاسىپ» ۇلتتىق اتوم كومپانياسىنىڭ كورولدىكتىڭ ۋران جوبالارىنا قاتىسۋى تۋرالى ۋاعدالاستىقتارعا قول جەتكىزىلدى.
قاتىسۋشىلار ەكى ەلدىڭ ىسكەر توپتارىنىڭ، ونىڭ ىشىندە ەكىجاقتى ساۋدا-ەكونوميكالىق ميسسيالاردى ۇيىمداستىرۋ ارقىلى تىكەلەي ءوزارا ارەكەتتەسۋىنىڭ قاجەتتىگىن اتاپ ءوتتى. وسى ماقساتتاردا قازاقستان-يوردانيا ىسكەرلىك كەڭەسىنىڭ جۇمىسى جانداناتىن بولادى، ونىڭ وتىرىسىن كەلەسى جىلى استانادا وتكىزۋ ۇسىنىلدى.
ايتا كەتەيىك، وسىعان دەيىن نۇرلان بايبازاروۆ قانداي جاعداي ۆاليۋتا نارىعىن تۇراقتاندىراتىنىن ايتتى.
