بىلتىر قازاقستاندا جاسالعان اۆتوموبيل سانى 100 مىڭنان اسقان
مەملەكەت باسشىسى Mercedes-Benz Group كومپانياسىنىڭ باسقارما ءتوراعاسى ولا كاللەنيۋسپەن كەزدەستى، دەپ حابارلايدى قازاقپارات اقوردانىڭ باسپا ءسوز قىزمەتىنە سىلتەمە جاساپ.
كەزدەسۋدە اۆتوكولىك يندۋسترياسى جانە يننوۆاتسيالىق شەشىمدەر سالالارىنداعى ىنتىماقتاستىق پەرسپەكتيۆالارى تالقىلاندى.
پرەزيدەنت قازاقستاننىڭ ەكونوميكانى ءارتاراپتاندىرۋعا جانە ونەركاسىپ ءوندىرىسىن دامىتۋعا ۇمتىلاتىنىن اتاپ ءوتتى. بۇل ستراتەگيادا ماشينا جاساۋ سالاسى ەرەكشە ورىن الادى.
قاسىم-جومارت توقايەۆ قازىرگى تاڭدا ەلىمىزدە General Electric ،General Motors، Chevrolet ،Kia جانە Hyundai سەكىلدى تانىمال الەمدىك كومپانيالار تابىستى جۇمىس ىستەپ جاتقانىن ايتتى. بىلتىر قازاقستاندا وندىرىلگەن اۆتوموبيل سانى 100 مىڭنان اسىپ، 28 پايىزعا ۇلعايعان. ەكسپورت ەكى ەسە ءوسىپ، 3,8 ميلليارد دوللارعا جەتكەن.
نەمىس اۆتوكونسەرنىنىڭ باسشىسى پرەزيدەنتكە كومپانيانىڭ جاھاندىق جەتكىزۋ تىزبەگىن دامىتۋ ىسىندەگى تىڭ تاسىلدەر جانە قازاقستان ەكونوميكاسى ءۇشىن اشىلاتىن جاڭا مۇمكىندىكتەر تۋرالى مالىمەت بەردى.
Mercedes-Benz Group - الەمدەگى اۆتوكولىك وندىرەتىن جەتەكشى كومپانيالاردىڭ ءبىرى. 2022-جىلى كومپانيا 2,5 ميلليونعا جۋىق اۆتوموبيل قۇراستىرىپ شىعارعان.
بىلتىر Mercedes-Benz Group الەمدەگى ەڭ ءىرى كومپانيالاردىڭ Forbes Global 2000 تىزىمىندە 41-ورىنعا، ال Fortune Global 500 تىزىمىندە 38-ورىنعا يە بولعان.
وسىعان دەيىن قازاقستان مەن گەرمانيا پرەزيدەنتتەرى كوپجاقتى ىنتىماقتاستىقتى نىعايتا تۇسۋگە ۋاعدالاسقانى تۋرالى جازدىق.
قاسىم-جومارت توقايەۆ ورتالىق ازيا مەملەكەتتەرى باسشىلارىنىڭ گەرمانيا پرەزيدەنتىمەن كەزدەسۋىنە قاتىستى.
