بىلتىر ەلىمىز 87,7 ميلليون توننا مۇناي ءوندىردى
استانا. KAZINFORM - وتكەن جىلى ەلىمىزدە وتىن ەنەرگەتيكا كەشەنىندە ءوسىم بايقالدى. بۇل تۋرالى ەنەرگەتيكا ءمينيسترى الماسادام ساتقاليەۆ ءمالىم ەتتى.
- وتىن-ەنەرگەتيكا كەشەنىنىڭ نەگىزگى كورسەتكىشتەرى بويىنشا وتكەن جىلدىڭ قورىتىندىسى بويىنشا ءوسىم بايقالدى. ونىڭ ىشىندە مۇناي ءوندىرۋ 87,7 ميلليون توننا، مۇناي وڭدەۋ: 17,9 ميلليون توننا، مۇناي ونىمدەرىن ءوندىرۋ 14,5 ميلليون توننا، گاز ءوندىرۋ 59 ميلليارد تەكشە مەتر، جانار-جاعارماي ءوندىرىسى 3 ميلليون توننا، مۇناي-گاز-حيمياسى ءوندىرىسى 540 مىڭ توننا، ەلەكتر ەنەرگيا ءوندىرىسى ساعاتىنا 117,9 ميلليارد ك ۆ ت- قا جانە ساعاتىنا جاڭارتىلعان ەنەرگيا ءوندىرىسى 7,58 ميلليارد ك ۆ ت ارتتى، - دەدى الماسادام ساتقاليەۆ ۆەدومستۆونىڭ كەڭەيتىلگەن القا وتىرىسىندا.
وسىلايشا مينيستر وتكەن جىلعى وتىن-ەنەرگەتيكا كەشەنى سالاسىنىڭ جۇمىسىن «تۇراقتى» دەپ باعالادى.
سونداي-اق ۆەدومستۆو باسشىسى بيىل جەرگىلىكتى جەر قويناۋىن پايدالانۋشىلاردىڭ مەملەكەتتىك ساتىپ الۋداعى ۇلەسىن %62 عا دەيىن ۇلعايتۋ جوسپاردا بارىن ايتتى.
- جەر قويناۋىن پايدالانۋ سالاسىندا 345 كەلىسىمشارت بار، وتكەن جىلى وتكىزىلگەن اۋكسيونداردىڭ قورىتىندىسى بويىنشا گەولوگيالىق بارلاۋعا سالىنعان ينۆەستيتسيانىڭ جالپى كولەمى $72,5 ميلليون بولاتىن 14 جەر قويناۋى ۋچاسكەسى ساتىلدى. بىلتىر جەر قويناۋىن پايدالانۋشىلاردىڭ ساتىپ الۋلارىنداعى قازاقستاندىق قامتۋ ۇلەسى %61,9 (3,8 تريلليون تەڭگە). سونىمەن قاتار مۇناي-گاز سالاسىنداعى 10 جاڭا ءوندىرىستى وقشاۋلاۋ، كەمىندە ەكى ەلەكتروندىق اۋكسيون وتكىزۋ جانە «جەر قويناۋى تۋرالى» كودەكسكە تۇزەتۋلەر ەنگىزۋدى جوسپارلاپ وتىرمىز، - دەيدى ول.
ايتا كەتسەك، ءىرى مۇناي-گاز جوبالارىندا وتاندىق تاۋارلار مەن قىزمەتتەرگە قولداۋ كورسەتىلەدى.
