بيلل گەيتس: جاساندى ينتەللەكت ميلليارد ادامنىڭ ومىرىنە قاۋىپ ءتوندىرۋى مۇمكىن
استانا. قازاقپارات - Microsoft كومپانياسىنىڭ نەگىزىن قالاۋشى بيلل گەيتس جاساندى ينتەللەكت ادامزاتقا اۋقىمدى قاۋىپ تۋدىرۋى مۇمكىن ەكەنىن ايتىپ، ا ق ش بيلىگىن بۇل سالانى زاڭمەن رەتتەۋگە شاقىردى، دەپ حابارلايدى Deutsche Welle.
گەيتستىڭ پىكىرىنشە، جاساندى ينتەللەكتىنىڭ قۋاتى ميلليارد ادامنىڭ قازا تابۋىنا اكەلەتىن وقيعالاردى تۋىنداتۋعا جەتكىلىكتى دەڭگەيگە جەتۋى مۇمكىن.
- ادامزاتتى 100 پايىز جويىپ جىبەرۋ وتە قيىن بولعانىمەن، جامان نيەتتى ادامدار مەن جاساندى ينتەللەكتىنىڭ ەڭ جاڭا قۇرالدارىنىڭ ۇيلەسىمى سەكىلدى قۋاتتى قارۋ بۇرىن-سوڭدى بولعان ەمەس،- دەدى بيلل گەيتس NBC تەلەارناسىنا بەرگەن سۇحباتىندا.
ول جاساندى ينتەللەكت سالاسىنداعى ءوزىن-ءوزى رەتتەۋ تەتىكتەرى جەتكىلىكسىز دەپ سانايدى. سوندىقتان ا ق ش بيلىگى تەحنولوگيانى دامىتۋ كەزىندە قاۋىپسىزدىك شارالارى مەن باقىلاۋ تەتىكتەرىن بەلگىلەيتىن زاڭدار قابىلداۋى قاجەت ەكەنىن ايتتى.
- زاڭناما سالاعا بەلگىلى ءبىر قوسىمشا سالماق تۇسىرەدى، ءبىراق كومپانيالاردىڭ جۇمىسىن ايتارلىقتاي باياۋلاتپايدى،-دەدى ول.
جاساندى ينتەللەكت مودەلدەرىنىڭ ناقتى كومپانيالارعا جاساعان كەيىنگى شابۋىلدارىنان سوڭ ءىرى تەحنولوگيا ازىرلەۋشىلەرىنىڭ باسشىلارى دا ج ي دامۋىن باياۋلاتۋ يدەياسىن قولداعان.
مۇنداي ۇسىنىستى Anthropic كومپانياسىنىڭ باسشىسى داريو امودەي دە ايتقان. ول جاساندى ينتەللەكتىنى باقىلاۋدان ايىرىلىپ قالۋ قاۋپىنە، سونداي-اق تەحنولوگيانىڭ كيبەرشابۋىلدار مەن بيوتەرروريزم ماقساتىندا پايدالانىلۋى مۇمكىن ەكەنىنە نازار اۋداردى.
ايتا كەتەيىك، اۆستراليا ۇكىمەتىنىڭ جۇيەسىنە جاساندى ينتەللەكت زاڭسىز كىرگەن.
