بەيجىڭدە Visit Aktobe روۋد-شوۋى ءوتتى
اقتوبە وبلىسى قىتايلىق تۋروپەراتورلارعا قازاقستان ءوڭىرىنىڭ تۋريستىك الەۋەتىن تانىستىردى. كەشە بەيجىڭدە Visit Aktobe روۋد-شوۋى ءوتتى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
««Visit Aktobe» تۋريستىك اقپاراتتىق ورتالىق ديرەكتورى ەرسايىن سيۋنوۆتىڭ سوزىنشە، قىتايداعى بۇگىنگى روۋد-شوۋ اقتوبە وبلىسىنىڭ تۋريستىك الەۋەتىن دامىتۋعا باعىتتالعان. قازىرگى كۇنى وڭىردە 30 عا جۋىق تۋريستىك باعىت ىسكە قوسىلدى. سونىمەن قاتار، بولاشاعى زور باعىتتاردىڭ ءبىرى - ەكولوگيالىق تۋريزمدى دامىتۋ باستى نازاردا بولىپ تۇر.
ول قىتايدا اقتوبە وبلىسىنىڭ 12 تۋريستىك لوكاتسياسى تانىستىرىلاتىنىن ايتتى. Visit Aktobe روۋد-شوۋى قىتاي مەگاپوليسى شاڭحاي قالاسىندا دا وتەدى.
تانىستىرۋ كەزىندە «Visit Aktobe» تۋريستىك اقپاراتتىق ورتالىق» وكىلدەرى ءىس-شارانىڭ كاسىبي قاتىسۋشىلارىنا اقتوبە وبلىسىنداعى تۋريستىك ورىندار تۋرالى بايانداپ بەردى.
بۇدان بولەك، قىتايداعى روۋد-شوۋ اياسىندا قازاقستاننىڭ تۋريستىك سالا وكىلدەرى مەن قىتايلىق تۋروپەراتورلار اراسىندا ىسكەرلىك كەزدەسۋلەر، قازاقستاندىق قولونەر شەبەرلەرىنەن شەبەرلىك ساعاتتارى، بىرەگەي كادەسىي مەن بۇيىمدار كورمەسى، سونىمەن قاتار ۇلتتىق تاتتىلەردەن ءدام تاتۋ جوسپارلانعان.
2024 -جىل قىتايدا قازاقستان تۋريزمى جىلى بولىپ جاريالانعانىن ەسكە سالا كەتەيىك.
اۆتور
بالنۇر قوجاگەلدى
