بەيجىڭدە توعىزقۇمالاقتان تۋرنير ءوتتى
استانا. kazinform - بەيجىڭدەگى قازاقستان مادەنيەت ورتالىعىندا توعىزقۇمالاقتان شەبەرلىك ساباعى مەن تۋرنير ءوتتى. «ۇلتتىق مۇرا - ۇرپاققا امانات» ءىس-شاراسى رەسپۋبليكا كۇنىنە وراي ۇيىمداستىرىلدى. بۇل تۋرالى مادەنيەت جانە اقپارات مينيسترلىگى حابارلادى.
ءىس-شارانى قازاقستاننىڭ قىتاي حالىق رەسپۋبليكاسىنداعى ەلشىلىگىنىڭ قولداۋىمەن بەيجىڭدەگى قازاقستان مادەنيەت ورتالىعى، دۇنيەجۇزىلىك توعىزقۇمالاق فەدەراتسياسى جانە ق ر توعىزقۇمالاق سپورتى فەدەراتسياسى ۇيىمداستىردى.
جيىنعا ديپلوماتتار، ستۋدەنتتەر، ءبىلىم مەن ونەر سالاسىنىڭ وكىلدەرى جانە قالا تۇرعىندارى قاتىستى. شەبەرلىك ساباعىنا كەلگەن 50 گە جۋىق ادام ويىننىڭ تاريحى مەن ەرەجەلەرىمەن تانىسىپ، قازاقتىڭ ۇلتتىق زياتكەرلىك ويىنىن ويناپ كوردى.
تۋرنيردە 32 قاتىسۋشى باق سىنادى. ولاردىڭ ەكەۋى - قازاقستان ازاماتى. ءبىرىنشى ورىندى 13 جاستاعى قازاقستاندىق يەلەندى. ەكىنشى جانە ءۇشىنشى ورىندى بەيجىڭدەگى ورتالىق ۇلتتار ۋنيۆەرسيتەتىنىڭ قىتايلىق ستۋدەنتتەرى الدى. جۇلدەگەرلەرگە توعىزقۇمالاق سپورت فەدەراتسياسىنىڭ پرەزيدەنتى اكىم تۇرسىن اتىنان ارنايى سىيلىقتار تابىستالدى.
ءىس-شارا اياسىندا بەيجىڭدەگى قازاقستان مادەنيەت ورتالىعى مەن ق ر توعىزقۇمالاق سپورتى فەدەراتسياسى ىنتىماقتاستىق تۋرالى مەموراندۋمعا قول قويدى. قۇجاتتا توعىزقۇمالاقتى قىتايدا كەڭىنەن ناسيحاتتاۋ، مادەني، ءبىلىم بەرۋ جانە سپورتتىق ءىس-شارالاردى بىرلەسىپ وتكىزۋ كوزدەلگەن.
بۇعان دەيىن قىزىلوردا وبلىسىنىڭ تانىمال ونەرپازدارى مەن شىعارماشىلىق ۇجىمدارى بەيجىڭدەگى قازاقستاننىڭ مادەني ورتالىعىندا «سۇلۋ سىردان سازدى سالەم» اتتى مەرەكەلىك كونسەرت بەردى.
