بەيجىڭدە قازاقستاننىڭ سۋ جونىندەگى باستامالارى تالقىلاندى
استانا. KAZINFORM - بۇگىن قازاقستاننىڭ بەيجىڭدەگى مادەني ورتالىعىندا قازاقستان مەن قىتايدىڭ جەتەكشى ساراپشىلارىنىڭ قاتىسۋىمەن «سۋ: تۇراقتى دامۋ جانە سۋ باستامالارى» تاقىرىبىندا دوڭگەلەك ۇستەل ءوتتى.
العاشقى ءسوزدى باستاعان قازاقستاننىڭ قىتايداعى ەلشىسى شاحرات نۇرىشيەۆ حالىقارالىق قاۋىمداستىقتىڭ بىرلەسە كۇش جۇمساۋىن قاجەت ەتەتىن سۋ پروبلەمالارىنىڭ جاھاندىق سيپاتىن جانە مۇنىڭ قازاقستان ءۇشىن ەرەكشە ماڭىزىن اتاپ ءوتتى.
- وسى جاعدايدا قازاقستان پرەزيدەنتى قاسىم-جومارت توقايەۆتىڭ قازاقستاندا ش ى ۇ سۋ تالداۋ ورتالىعىن جانە ب ۇ ۇ قامقورلىعىمەن حالىقارالىق سۋ ۇيىمىن قۇرۋ جونىندەگى باستامالارى سۋ پروبلەمالارىنا جاۋاپ رەتىندە بىرلەسكەن شەشىمدەر ازىرلەۋگە ىقپال ەتۋگە باعىتتالعانى ەرەكشە ماڭىزدى، - دەپ اتاپ ءوتتى ول.
قازاق ديپلوماتىنىڭ ايتۋىنشا، قازاقستان مەن قىتايدىڭ سۋ سالاسىنداعى ىنتىماقتاستىق تاجىريبەسى ەكى ەلگە ستراتەگيالىق سەرىكتەستىكتىڭ كەلەسى كەزەڭىنە وتۋگە مۇمكىندىك بەرەدى.
- قازاقستان مەن قىتايدىڭ ءوزارا سەنىم مەن تاتۋ كورشىلىك قاتىناسىنا نەگىزدەلگەن، زاماناۋي عىلىم مەن تەحنيكانىڭ سوڭعى جەتىستىكتەرىن پايدالانا وتىرىپ، سۋ ىنتىماقتاستىعىنىڭ جاڭا مودەلىن بىرلەسىپ ازىرلەۋگە ۇلكەن مۇمكىندىك بار، - دەپ قورىتىندىلادى شاحرات نۇرىشيەۆ.
قازاقستاندىق ديپلوماتتار قازاقستاننىڭ حالىقارالىق باستامالارىن ەگجەي-تەگجەيلى ءتۇسىندىردى. سىرتقى ىستەر مينيسترلىگىنىڭ دەپارتامەنت ديرەكتورى ديدار تەمەنوۆ ب ۇ ۇ جانىنداعى سۋ ۇيىمىن قۇرۋ جوباسىن ۇسىندى. ال ش ى ۇ جانىنداعى تۇراقتى وكىل راقىمجان راحىموۆ ش ى ۇ- عا مۇشە مەملەكەتتەردىڭ سۋ پروبلەمالارىن تالداۋ ورتالىعىن قۇرۋ تۇجىرىمداماسىن باياندادى.
سۋ رەسۋرستارىنىڭ اقپاراتتىق-تالداۋ ورتالىعىنىڭ وكىلى دانيار ساعاديەۆ سۋ رەسۋرستارىن بىرلەسىپ پايدالانۋ جانە تۇراقتى دامۋ ءۇشىن ىنتىماقتاستىقتى دامىتۋ ماسەلەسىن قوزعادى.
گەوگرافيا جانە سۋ قاۋىپسىزدىگى ينستيتۋتىنىڭ وكىلى سايات ءالىمقۇلوۆ ءوز بايانداماسىن قازاقستان مەن قىتايدىڭ ترانسشەكارالىق وزەندەر بويىنشا ءوزارا ارەكەتتەسۋىنە ارنادى. ال قازاق سۋ رەسۋرستارىن زەرتتەۋ ينستيتۋتىنىڭ وكىلى سەرىك سايروۆ كليماتتىڭ وزگەرۋى جاعدايىنداعى سۋ رەسۋرستارىنا نازار اۋداردى.
ءوز كەزەگىندە قىتايلىق ساراپشىلار ءوز ەلدەرىنىڭ سۋ ۇنەمدەۋ تەحنولوگيالارىنداعى تاجىريبەسىمەن تانىستىردى جانە حالىقارالىق ىنتىماقتاستىقتى كەڭەيتۋگە دايىن ەكەنىن ءبىلدىردى.
- ءبىز سۋ ۇنەمدەيتىن سۋارۋ، تسيفرلاندىرۋ، قايتا وڭدەلگەن سۋدى پايدالانۋ جانە قۇرعاقشىلىقتى باقىلاۋ سالالارىندا قازاقستاندى قوسا العاندا، حالىقارالىق سەرىكتەستەرمەن پراكتيكالىق ىنتىماقتاستىقتى اسىعا كۇتەمىز، - دەپ اتاپ ءوتتى قىتاي سۋ رەسۋرستارى جانە گيدروەنەرگەتيكا اكادەمياسى سۋ رەسۋرستارى ينستيتۋتىنىڭ ديرەكتورىنىڭ ورىنباسارى حە فان.
ايتا كەتەيىك، سولتۇستىك ارالعا ءبىر جىلعا جەتپەي 1,2 ميلليارد تەكشە مەتر سۋ جىبەرىلدى.
