بەيجىڭدە جامبىل جابايەۆتىڭ 180 جىلدىعى اتالىپ ءوتتى
استانا. KAZINFORM - بەيجىڭدەگى قازاقستاننىڭ مادەني ورتالىعىندا قازاقتىڭ ۇلى اقىنى جامبىل جابايەۆتىڭ تۋعانىنا 180 جىل تولۋىنا وراي «جامبىل - عاسىر اقىنى» اتتى كەش ءوتتى، دەپ حابارلايدى ق ر مادەنيەت جانە اقپارات مينيسترلىگىنىڭ باسپا ءسوز قىزمەتى.
ءىس-شاراعا الماتى وبلىسى اكىمىنىڭ ءبىرىنشى ورىنباسارى قانات ەسبولاتوۆ، اقىننىڭ نەمەرەسى، جامبىل جابايەۆ اتىنداعى ادەبي-مەموريالدىق مۋزەيدىڭ ديرەكتورى سالتانات جامبىلوۆا، قىتاي جازۋشىسى ءارى اۋدارماشى اكبار ءماجيت، قازاقستاننىڭ قىتايداعى ەلشىلىگىنىڭ ديپلوماتتارى، سونداي-اق ق ح ر- دىڭ شىعارماشىلىق، عىلىمي جانە ىسكەرلىك توپتارىنىڭ وكىلدەرى قاتىستى.
كەش اياسىندا جامبىل جابايەۆتىڭ ءومىرى مەن شىعارماشىلىعىنا ارنالعان تاقىرىپتىق كورمە ۇيىمداستىرىلدى.
كورمەگە اقىننىڭ كىتاپتارى، فوتوسۋرەتتەرى، بەينەلەۋ، ساندىك-قولدانبالى ونەر تۋىندىلارى جانە ەتنوگرافيالىق جادىگەرلەر قويىلدى.
مەرەكەلىك كەش «جامبىل - عاسىر اقىنى» كونسەرتىمەن جالعاستى. ساحنادا ءسۇيىنباي اتىنداعى الماتى وبلىستىق فيلارمونياسىنىڭ ونەرپازدارى ونەر كورسەتتى.
وسىعان دەيىن بەيجىڭدە نۇرعيسا تىلەنديەۆتىڭ مەرەيتويىنا ارنالعان مادەني كەش وتكەنى تۋرالى جازدىق.
