بيشىمبايەۆتى ۇستاۋ كەزىندە پوليتسەيلەر تالاپتاردى بۇزدى ما - مينيسترلىك ۆيدەوداعى دەرەكتەردى تەكسەرەدى

استانا. KAZINFORM - ىشكى ىستەر ءمينيسترىنىڭ ورىنباسارى يگور لەپەحا ۇلتتىق ەكونوميكا ەكس-ءمينيسترى قۋاندىق بيشىمبايەۆتى ۇستاۋ كەزىندە پوليتسەيلەردىڭ كۇدىكتىنىڭ قولىنان كىسەندى شەشىپ، تەمەكى تارتۋعا رۇقسات بەرۋ ارەكەتىنە قاتىستى پىكىر ءبىلدىردى.

ايتا كەتەيىك، وسىعان دەيىن عالامتور جەلىسىندە بيشىمبايەۆتى ۇستاۋعا قاتىسقان پوليتسەيدىڭ بەينە ءتۇسىرىلىم جاساعان جەتونىنىڭ ۆيدەوسى تاراعان ەدى. وسى ۆيدەودا كۇدىكتىنىڭ پوليتسەي كولىگىنىڭ جانىندا تەمەكى تارتىپ تۇرعانى تۇسىرىلگەن.

«جەتونداعى بۇل بەينەنى كورگەن جوقپىن. ۆيدەوداعى دەرەكتەردى زەرتتەپ كورەيىك. ولار وعان تەمەكى تارتۋعا رۇقسات بەرمەۋى كەرەك ەدى، ءبىراق ولار كىسەندى شەشە الادى. ياعني، كۇدىكتىنى جەتكىزۋدىڭ ءتيىستى تالاپتارى بار. ماسەلەن، كولىككە دەيىن جۇرگەن كەزدە ول كىسەندە بولۋى كەرەك. ال پوليتسەي كولىگىنە وتىرعاندا، قولىنان كىسەندى شەشۋگە رۇقسات ەتىلەدى»، - دەدى ي. لەپەحا سەناتتىڭ جالپى وتىرىسىنان كەيىن تىلشىلەر سۇراعىنا جاۋاپ بەرە وتىرىپ.

ونىڭ ايتۋىنشا، بۇل ارەكەتتەر پوليتسەيلەردى ازاپتادى دەپ ايىپتاماۋى ءۇشىن جاسالادى.

«كىسەندى شەشۋگە قاتىستى تالاپتى بۇزۋ ءىس-قيمىلىن كورىپ تۇرعان جوقپىن. تەمەكى تارتۋ دەرەگىنە توقتالساق، بۇل جاعدايدى تەكسەرۋ كەرەك. بارلىق ارەكەتتەرىمىزدى باعالايتىن ءتيىستى بولىمشەمىز بار. سول بولىمشەنىڭ باسشىسىنا وسى دەرەكتى تەكسەرۋ جونىندە نۇسقاۋ بەرەمىن»، - دەدى ءمينيستردىڭ ورىنباسارى.