بيشىمبايەۆتىڭ ءىسى: پەتيتسياعا 150 مىڭعا جۋىق قازاقستاندىق قول قويدى

باس پروكۋرور بەرىك اسىلوۆ ەكس-شەنەۋنىك، ايەلىن ءولتىردى دەگەن كۇدىكپەن ۇستالعان قۋاندىق بيشىمبايەۆتىڭ ىسىنە قاتىستى پىكىر ءبىلدىردى، دەپ حابارلايدى Kazinform.

«جۋىقتا ازاماتشا س. نۇكەنوۆانىڭ استانا قالاسىندا كىسى قولىنان كوز جۇمۋى ينتەرنەت كەڭىستىكتى ءدۇر سىلكىندىردى. وتباسىنداعى جانە تۇرمىستىق زورلىق-زومبىلىقتان قورعاۋ تۋرالى پەتيتسياعا 150 مىڭعا جۋىق قازاقستاندىق قول قويدى. بۇل باعىتتا جۇمىس جالعاسا بەرەدى»، - دەدى بەرىك اسىلوۆ ۆەدومستۆونىڭ زاڭدىلىقتى ساقتاۋ جونىندەگى ۇيلەستىرۋ كەڭەسىنىڭ جيىنىندا.

سونداي-اق ب. اسىلوۆ تۇرمىستىق زورلىق-زومبىلىقتان مەملەكەتكە كەلەر قاۋىپ قانداي ەكەنىن ايتتى.

«وتباسىنداعى كەلەڭسىزدىكتەر، زورلىق-زومبىلىق فاكتىلەرى مەملەكەتىمىزدىڭ العا دامۋىنا كەرى اسەرىن تيگىزەدى. سوندىقتان پرەزيدەنتىمىز ايتقانداي، مۇنداي زاڭ بۇزۋ ارەكەتتەرىمەن تۇتاس قوعام بولىپ كۇرەسۋ قاجەت»، - دەدى باس پروكۋرور.

ەسكە سالايىق، بيىلعى 9- قاراشادا استاناداعى باۋ مەيرامحاناسىندا بۇرىنعى ۇلتتىق ەكونوميكا ءمينيسترى قۋاندىق بيشىمبايەۆ ءوزىنىڭ جۇبايىن سوققىعا جىقتى. ايەل جەدەل جاردەم كەلگەنشە كوز جۇمدى.

كەيىن ىشكى ىستەر مينيسترلىگى قۋاندىق بيشىمبايەۆتىڭ ۇستالعانىن راستادى.

ەلوردا پوليتسيا دەپارتامەنتى ق ر قىلمىستىق كودەكسىنىڭ 99-بابى 1-بولىگى بويىنشا تەرگەۋ امالدارىن باستادى.

11- قاراشادا استانا قالاسىنىڭ مامانداندىرىلعان اۋدانارالىق تەرگەۋ سوتى كۇدىكتى قۋاندىق بيشىمبايەۆتى 2 ايعا قاماۋعا الۋ بويىنشا بۇلتارتپاۋ شاراسىن سانكسيالادى.

12- قاراشادا كىسى ءولىمى بولعان «گاسترو-ورتالىق» مەيرامحاناسىنىڭ ديرەكتورى ۇستالدى.

15- قاراشا وتكەن كەڭەستە پرەزيدەنت ق. توقايەۆ ءى ءى م- گە بيشىمبايەۆتىڭ ءىسىن ەرەكشە باقىلاۋعا الۋدى تاپسىردى.