بيشىمبايەۆ ىسىندە اتى اتالعان كاسىپكەر العاش رەت مالىمدەمە جاسادى

ەكس-مينيستر قۋاندىق بيشىمبايەۆقا قاتىستى سوت وتىرىسىندا قازاقستاندىق تانىمال كاسىپكەر رايىمبەك باتالوۆتىڭ دا ەسىمى اتالعان بولاتىن.

رايىمبەك باتالوۆ وزىنە قاتىستى ايىپتاۋلاردان كەيىن جاۋاپ بەرۋدى ۇيعارعان.

بۇعان دەيىنگى سوت وتىرىستارىنىڭ بىرىندە بيشىمبايەۆ «مارقۇم نۇكەنوۆانىڭ باتالوۆپەن بۇرىن قارىم-قاتىناسى بولعان» دەگەن مالىمدەمە جاسادى. كەشەگى سوت وتىرىسىندا بيشىمبايەۆتىڭ ۇيالى تەلەفونىنان وقيعا بولعان كۇنگى ۆيدەولار كورسەتىلدى. كادرلارداعى داۋىستاردا بيشىمبايەۆ نۇكەنوۆادان باتالوۆپەن قانداي قارىم-قاتىناسى بولعانىن سۇرايتىنى ەستىلەدى.

رايىمبەك باتالوۆ وسى جايتقا قاتىستى پىكىر ءبىلدىردى. ونىڭ سوزىنشە، بۇل سوتقا قاتىستى اياعىنا دەيىن پىكىر بىلدىرگىسى كەلمەگەن. الايدا ايتىلىپ جاتقان سۇمدىق اقپاراتتاردان كەيىن مالىمدەمە جاساۋعا بەل بۋعان. ول ءوز تاراپىنا قاتىستى ايتىلعان اقپاراتتىڭ ءبارى بوس ساندىراق، وتىرىك ەكەنىن جەتكىزدى.

«بۇل وتىرىككە سەنبەۋگە، بلوگەرلەر مەن ب ا ق وكىلدەرىن جالعان اقپارات تاراتپاۋعا شاقىرامىن. اۋىر قازاعا ۇشىراپ وتىرعان سالتاناتتىڭ جاقىندارى قىزدارىنىڭ نامىسىن قورعاۋعا ءماجبۇر بولىپ وتىرعانى وتە وكىنىشتى. نۇكەنوۆتەر وتباسىنا شىن جۇرەكتەن كوڭىل ايتامىن»، - دەدى ول.

ەسكە سالايىق، بۇعان دەيىن كاسىپكەر رايىمبەك باتالوۆتىڭ ايەلى لەنارا باتالوۆا بيشىمبايەۆ ىسىنە قاتىستى پىكىر ءبىلدىردى.

1-ساۋىردە وتكەن سوت وتىرىسىندا قۋاندىق بيشىمبايەۆ سالتانات نۇكەنوۆا بەلگىلى كاسىپكەردىڭ كوڭىلدەسى بولعانىن مالىمدەگەن بولاتىن. ول كاسىپكەر ناقتى كىم ەكەنىن ايتپاسا دا ەسىمى رايىمبەك ەكەنىن اتاپ وتكەن بولاتىن. كوپتەگەن دەرەككوز بۇل كاسىپكەر رايىمبەك باتالوۆ ەكەنىن جازعان بولاتىن. ارتىنشا جەلى قولدانۋشىلارى باتالوۆتىڭ ايەلى لەنارا باتالوۆانىڭ پاراقشاسىنا شابۋىل جاساپ، كۇيەۋى تۋرالى پىكىر جازا باستاعان بولاتىن.

«مەن بولعان جايتقا قاتىستى پىكىر بىلدىرسەم دەپ ەدىم. سەبەبى مەنىڭ ينستاگرامىم «جارىلايىن» دەپ تۇر. كەشە ەل بولىپ اتىشۋلى پروتسەسكە كۋا بولدىق. پروتسەسس 1-ساۋىرگە سايكەس كەلىپ قالدى. ونىڭ مازمۇنى دا سوعان ساي بولعان سەكىلدى. ءبىز اتىشۋلى ءىستى ەمەس، «پۋست گوۆوريات» شوۋىن كورىپ وتىرعانداي بولدىق. سوتتا مەنىڭ وتباسىمنىڭ ابىرويىنا نۇقسان كەلتىرگەن نەگىزسىز، ويعا قونىمسىز نارسەلەرگە قاتىستى نە دەرىمدى بىلمەيمىن. سالتاناتتىڭ جاقىندارىنا سابىر مەن كۇش-قۋات تىلەيمىن جانە ادىلدىك ورنايدى دەپ سەنەمىن. ءبىز سىزدەرمەن بىرگەمىز»، - دەدى لەنارا باتالوۆا بۇعان دەيىن.