بيشىمبايەۆ سوتىن الەم بولىپ تاماشالاۋ ادىلدىككە سۇرانىستىڭ بار ەكەنىن كورسەتەدى - مينيستر
استانا. KAZINFORM - ءماجىلىستىڭ كۋلۋارىندا ادىلەت ءمينيسترى ازامات ەسقارايەۆ بيشىمبايەۆ سوتىنىڭ ترانسلياتسياسىنا قاتىستى پىكىر ءبىلدىردى.
«قۋاندىق بيشىمبايەۆتىڭ سوتىن كەيبىر حالىقارالىق ارنالار كورسەتىپ جاتىر. الەمنىڭ ءار تۇكپىرىنەن وسى پروتسەستى تەلەسەريال كورگەندەي اڭدىپ وتىرعاندار بار. بۇعان قالاي قارايسىز؟ ونى كورسەتۋ قۇقىعىن ساتىپ الۋعا نيەت بىلدىرگەندەر بار ما؟» دەپ سۇرادى جۋرناليست مينيستردەن ءماجىلىستىڭ جالپى وتىرىسىنان كەيىن.
ازامات ەسقارايەۆ بۇل ماسەلە ادىلەت مينيسترلىگىنىڭ قۇزىرىنان تىس ەكەنىن اتاپ ءوتتى.
«بىلمەيمىن. ول مەنىڭ قۇزىرەتىمە كىرمەيدى. بۇل بۇكىل الەمدە ادىلدىككە سۇرانىس بار ەكەنىن كورسەتەدى دەپ تۇسىنەمىن. ونى جوعارعى سوت سياقتى ۋاكىلەتتى ورگان شەشەدى. سوت اكىمشىلىگى ءوزى قاراۋى كەرەك»، - دەدى ول.
ەسكە سالا كەتەيىك، قۋاندىق بيشىمبايەۆتىڭ سوتى قارالىم مەن قىزىعۋشىلىق جاعىنان كەي رەيتينگى جوعارى سەريالداردان اسىپ كەتتى.
