بيشىمبايەۆ پەن نۇكەنوۆانىڭ نەكەسىن ەكى رەت قيعان يمامعا قانداي شارا قولدانىلدى
استانا. KAZINFORM - ەكس-مينيستر قۋاندىق بيشىمبايەۆ پەن سالتانات نۇكەنوۆانىڭ نەكەسىن قيعان رەسپۋبليكالىق باس مەشىتتىڭ يمامى قانات قىدىرمينگە قاتىستى تارتىپتىك شارا قولدانىلدى.
بۇل تۋرالى مۇفتياتتىڭ باسپا ءسوز حاتشىسى اعابەك قونارباي ۇلى الەۋمەتتىك جەلىدەگى پاراقشاسىندا جازدى.
مالىمدەمەدە ايتىلعانداي، 2022-جىلدىڭ 17-قازانىندا استانا قالاسىنداعى رەسپۋبليكالىق باس مەشىتتە ق. بيشىمبايەۆ پەن س. نۇكەنوۆانىڭ ءوز وتىنىشتەرى بويىنشا كۋاگەرلەردىڭ قاتىسۋىمەن بولاشاق ەرلى-زايىپتىلاردىڭ نەكەسى قيىلعان. اتالعان ازاماتتاردان جانە ولاردىڭ تۋىستارىنان ا ح ا ت بولىمىنە تىركەلگەنىن راستايتىن كۋالىك تالاپ ەتىلگەندە «جاسالۋ ۇستىندە» دەپ جاۋاپ بەرگەن.
ال ولاردىڭ نەكەسىن قيعان رەسپۋبليكالىق باس مەشىت يمامى ق. قىدىرمينگە تارتىپتىك شارا قولدانىلىپ، ەسكەرتۋ جاسالعان.
«قازاقستان مۇسىلماندارى ءدىني باسقارماسىنىڭ (بۇدان ءارى – ق م د ب) جارعىسىنا سايكەس ق م د ب- نىڭ رەسمي ءدىني قىزمەتكەرلەرى قازاقستان رەسپۋبليكاسىنىڭ قولدانىستاعى زاڭناماسى اياسىندا جۇمىس ىستەيدى. «نەكە (ەرلى-زايىپتىلىق) جانە وتباسى تۋرالى» 2011-جىلعى 26-جەلتوقسانداعى قازاقستان رەسپۋبليكاسى كودەكسىنىڭ 2-بابىنىڭ 3-تارماعىندا تەك مەملەكەتتىك ورگاندار قيعان نەكە (ەرلى-زايىپتىلىق) عانا مويىندالاتىنى بەلگىلەنگەن. وسىعان وراي ق م د ب- نىڭ ىشكى جۇمىس ءتارتىبىنىڭ ءتيىستى تالابىنا سايكەس مەشىت قىزمەتكەرلەرى نەكە قيۋ ءراسىمى الدىندا بولاشاق ەرلى-زايىپتىلاردان ازاماتتىق حال اكتىلەرىن تىركەۋ (ا ح ا ت) بولىمىنە تىركەلگەنىن راستايتىن كۋالىكتى تالاپ ەتەدى. 2022-جىلدىڭ 17-قازانىندا استانا قالاسىنداعى رەسپۋبليكالىق باس مەشىتتە ق. بيشىمبايەۆ پەن س. نۇكەنوۆانىڭ ءوز وتىنىشتەرى بويىنشا كۋاگەرلەردىڭ قاتىسۋىمەن بولاشاق ەرلى-زايىپتىلاردىڭ نەكەسى قيىلعان. اتالعان ازاماتتاردان جانە ولاردىڭ تۋىستارىنان ا ح ا ت بولىمىنە تىركەلگەنىن راستايتىن كۋالىك تالاپ ەتىلگەندە «جاسالۋ ۇستىندە» دەپ جاۋاپ بەرگەن. سونىمەن قاتار داستۇرگە ساي ەكى جاقتىڭ اتا-انالارىنىڭ باتاسى مەن رۇقساتىن العانىن، سالت-ءداستۇر جولىمەن نەكەلەرىن قيىپ بەرۋىن وتىنگەن. اتالعان ازاماتتاردان ا ح ا ت بولىمىنە تىركەلگەنىن راستايتىن كۋالىكتى تاباندى تۇردە تالاپ ەتپەگەن، ياعني ق م د ب- نىڭ ىشكى جۇمىس ءتارتىبىن بۇزعان رەسپۋبليكالىق باس مەشىت يمامى ق. قىدىرمينگە تارتىپتىك شارا قولدانىلىپ، ەسكەرتۋ جاسالدى. قازاقستان مۇسىلماندارى ءدىني باسقارماسى ا ح ا ت بولىمىندە رەسمي تىركەلمەي نەمەسە مۇسىلمانشا نەكە قيىلماعان «ازاماتتىق نەكە» زينا بولىپ سانالاتىنىن مالىمدەيدى. جوعارىدا اتالعان تەرىس سيپاتتاعى «ازاماتتىق نەكەنىڭ» شاريعاتتاعى ۇكىمى - حارام. مۇسىلمان بالاسى ارتى وپىق جەگىزەتىن مۇنداي اۋىر ءارى لاس كۇنادان اۋلاق بولۋى ءتيىس»، - دەلىنگەن حابارلامادا.
ايتا كەتەيىك، بيشىمبايەۆ پەن ونىڭ مارقۇم ايەلى نۇكەنوۆا زاڭدى تۇردە نەكەلەسپەگەن. ءبىراق، ولار ەكى رەت ءبىر مەشىتكە بارعان جانە ەكى رەت ءبىر يمام مۇسىلمانشا نەكەسىن قيعان. بۇل تۋرالى بيشىمبايەۆ ىسىنە قاتىستى سوتتا ايتىلدى.
بۇعان دەيىن ءماجىلىس دەپۋتاتى اسحات ايماعامبەتوۆ رەسمي تىركەۋسىز مەشىتتە نەكە قيۋدى زاڭسىز ارەكەت دەپ ەسەپتەيتىنىن ءمالىم ەتكەن ەدى.
